ICC ટેસ્ટ રેન્કિંગમાં વિરાટ કોહલીને નુકસાન, 10 વર્ષ બાદ ટોપ-20માંથી થયો બહાર

દુબઈઃ સ્ટાર ભારતીય બેટર વિરાટ કોહલીને બુધવારે આઈસીસીએ જાહેર કરેલા લેટેસ્ટ ટેસ્ટ રેન્કિંગમાં નુકસાન થયું છે. ન્યૂઝીલેન્ડ વિરુદ્ધ ખરાબ પ્રદર્શનને કારણે કોહલી બેટરોના રેન્કિંગમાં ટોપ-20માંથી બહાર થયો છે. 2014 બાદ પ્રતમવાર આવું બન્યું છે, જ્યારે કોહલી બેટરોના રેન્કિંગમાં ટોપ-20માંથી બહાર થઈ ગયો છે. કોહલીએ ન્યૂઝીલેન્ડ સામે ત્રણ મેચની ટેસ્ટ સિરીઝમાં માત્ર 93 રન બનાવ્યા હતા. કોહલી હવે આઈસીસી ટેસ્ટ રેન્કિંગમાં 22માં સ્થાન પર છે.

ભારતીય અનુભવી બેટર વિરાટ કોહલી અને રોહિત શર્મા તાજેતરમાં ન્યૂઝીલેન્ડ સામે સમાપ્ત થયેલી સિરીઝમાં ફ્લોપ રહ્યાં હતા અને સસ્તામાં આઉટ થયા હતા. ટેસ્ટ ક્રિકેટના ઈતિહાસમાં ન્યૂઝીલેન્ડ પ્રથમ ટીમ હતી, જેણે ભારતને તેના ઘરમાં 3-0થી કારમો પરાજય આપ્યો હતો. ભારતીય કેપ્ટન રોહિત શર્મા પણ રન બનાવવામાં નિષ્ફળ રહ્યો હતો. તેને બે સ્થાનનું નુકસાન થયું છે અને તે 26માં સ્થાને છે.

આ પણ વાંચોઃ 'ઐતિહાસિક ફજેતી'ના સૂત્રધાર હતા ગંભીર? BCCI હવે એક્શન મોડમાં! લેવાઈ શકે છે આ પગલું

ટેસ્ટ બેટરોના રેન્કિંડમાં ટોપ પર જો રૂટ છે, તેણે પાકિસ્તાન સામે પ્રથમ ટેસ્ટમાં બેવડી સદી ફટકારી હતી. રૂટ બાદ કેન વિલિયમસન અને હેરી બ્રૂક છે. ભારતના યુવા બેટર યશસ્વી જાયસવાલને પણ એક સ્થાનનું નુકસાન થયું અને તે ચોથા સ્થાને ખસી ગયો છે. વિકેટકીપર બેટર રિષભ પંતને પાંચ સ્થાનનો ફાયદો થયો અને તે પાંચમાં સ્થાને પહોંચી ગયો છે. જ્યારે શુભમન ગિલ 16માં સ્થાને છે.

ભારતનો અનુભવી સ્પિનર રવિન્દ્ર જાડેજા લેટેસ્ટ રેન્કિંગમાં બે સ્થાનના ફાયદા સાથે છઠ્ઠા સ્થાને પહોંચી ગયો છે. આર અશ્વિન પાંચમાં સ્થાને છે. જાડેજાએ મુંબઈ ટેસ્ટમાં 10 વિકેટ લીધી હતી. વોશિંગટન સુંદર ટેસ્ટ બોલરોની રેન્કિંગમાં 46માં સ્થાને પહોંચી ગયો છે. જ્યારે એજાઝ પટેલ 22માં સ્થાન પર પહોંચ્યો છે. એજાઝને 12 સ્થાનનો ફાયદો થયો છે.