Indian Army માટે બનાવાયા કરંટ વાળા બુટ! સૈનિકોના દરેક પગલાથી પેદા થશે વીજળી

Indore IIT Special Shoe For Indian Army: ભારતની આન બાન અને શાન છે ભારતીય સેના. ભારતીય સેનાની ત્રણેય પાંખોના જવાનો અને તેમની શૌર્ય ગાથા ગાવા બેસો તો વર્ષો વીતી જાય પણ તેમની વીર ગાથાઓ ખૂટશે નહીં. ભારતીય સેના વિશ્વની કોઈપણ સેનાથી ઓછી નથી. ભારતીય સેના સામે દુશ્મનો ધ્રૂજી ઉઠે છે. અત્યાધુનિક ગેજેટ્સથી સજ્જ ભારતીય સેનાના સૈનિકો દરેક અવરોધને પાર કરવામાં માહિર છે. હવે ભારતીય સૈનિકો માટે ખાસ પ્રકારના જૂતા તૈયાર કરવામાં આવ્યા છે.

અદ્યતન ટેક્નોલોજીથી બનેલી, આ ઘણી રીતે ખાસ છે. આ શૂઝ IIT ઈન્દોર દ્વારા તૈયાર કરવામાં આવ્યા છે. આ જૂતાની ખાસિયત એ છે કે જ્યારે સૈનિકો તેને પહેરીને ચાલશે ત્યારે તેમના દરેક પગલાથી વીજળી ઉત્પન્ન થશે. ઈન્ડિયન ઈન્સ્ટિટ્યૂટ ઓફ ટેક્નોલોજી (IIT) ઈન્દોરે સૈનિકો માટે અદ્યતન ટેક્નોલોજીવાળા ખાસ શૂઝ તૈયાર કર્યા છે. આ પગરખાં પહેરીને ચાલવાથી માત્ર વીજળી ઉત્પન્ન થશે નહીં પરંતુ સૈનિકોની ચોક્કસ જગ્યા જાણવામાં પણ મદદ મળશે.

IIT અધિકારીઓએ જણાવ્યું કે IIT ઇન્દોરે સંરક્ષણ સંશોધન અને વિકાસ સંગઠન (DRDO)ને આવા જૂતાની 10 જોડી મોકલી છે. આઈઆઈટી ઈન્દોરના પ્રોફેસર આઈએ પલાનીના નેતૃત્વમાં આ ખાસ શૂઝ તૈયાર કરવામાં આવ્યા છે.વીજળી ઉત્પન્ન કરવા માટે, આ શૂઝ બનાવવામાં ખાસ ટ્રાઇબો-ઇલેક્ટ્રિક નેનોજનરેટર (TENG) ટેક્નોલોજીનો ઉપયોગ કરવામાં આવ્યો છે. જેના કારણે તેમને ધારણ કરવામાં આવતા દરેક પગલા સાથે વીજળી ઉત્પન્ન થશે. તેમણે જણાવ્યું કે આ વીજળીને જૂતાના તળિયામાં સ્થાપિત ગેજેટમાં સંગ્રહિત કરવામાં આવશે. અને આ વીજળીથી સૈનિકો તેમના નાના ઉપકરણોને ચાર્જ કરી શકશે અથવા ઓપરેટ કરી શકશે.

અધિકારીઓએ જણાવ્યું કે 'ગ્લોબલ પોઝિશનિંગ સિસ્ટમ' (GPS) અને 'રેડિયો ફ્રીક્વન્સી આઇડેન્ટિફિકેશન' (RFID) ટેક્નોલોજીથી સજ્જ જૂતાની મદદથી રિયલ ટાઇમમાં સૈન્ય કર્મચારીઓનું સ્થાન પણ જાણી શકાય છે. આઈઆઈટી ઈન્દોરના ડિરેક્ટર પ્રોફેસર સુહાસ જોશીએ જણાવ્યું હતું કે આ શૂઝની નવીન વિશેષતાઓ લશ્કરી કર્મચારીઓની સુરક્ષા, સંકલન અને કાર્યક્ષમતાને મજબૂત બનાવશે.

અધિકારીઓએ જણાવ્યું કે ટેંગ ટેક્નોલોજીથી સજ્જ જૂતાનો ઉપયોગ અલ્ઝાઈમરથી પીડિત વૃદ્ધ લોકો, શાળાએ જતા બાળકો અને પર્વતારોહકોનું સ્થાન શોધવા માટે પણ થઈ શકે છે. આ સિવાય આ શૂઝ ફેક્ટરીઓમાં કામદારોની હાજરી અને તેમના કામ પર નજર રાખવામાં મદદરૂપ સાબિત થઈ શકે છે. તેણે કહ્યું કે આ શૂઝની મદદથી ખેલાડીઓના પગની હિલચાલનું સચોટ વિશ્લેષણ પણ કરી શકાય છે જેથી વધુ સારી તાલીમ દ્વારા તેમનું પ્રદર્શન સુધારી શકાય.