Runway 34: ପ୍ରଥମ ଥର ବିମାନ ଉଡ଼ାଇ ଫସିଗଲେ ସିଙ୍ଘମ, ବଞ୍ଚାଇବେ କି ଅମିତାଭ୍ ବଚ୍ଚନ?

ମୁମ୍ବାଇ: ନିଜର ଦମଦାର ଅଭିନୟ ମାଧ୍ୟମରେ ଅଭିନେତା ଅଜୟ ଦେବଗନ ବଲିଉଡରେ ନିଜର ଏକ ଭିନ୍ନ ପରିଚୟ ସୃଷ୍ଟି କରିପାରିଛନ୍ତି। ତାଙ୍କର ଆଗାମୀ ଚଳଚ୍ଚିତ୍ର 'ରନୱେ-୩୪'ର ଟ୍ରେଲର ଏବେ ରିଲିଜ ହୋଇଛି। 'ରନୱେ-୩୪' ଚଳଚ୍ଚିତ୍ରର ଟ୍ରେଲରକୁ ଦର୍ଶକମାନେ ବି ଖୁବ୍ ପସନ୍ଦ କରିଛନ୍ତି। ଏହି ଚଳଚ୍ଚିତ୍ରରେ ଅଜୟ ଦେବଗନଙ୍କ ସହ ବିଗ୍ ବି ଅମିତାଭ ବଚ୍ଚନ ମଧ୍ୟ ମୁଖ୍ୟ ଭୂମିକାରେ ଅଭିନୟ କରୁଛନ୍ତି। 

ଅଜୟ ଦେବଗନ (Actor Ajay Devgan) ବିଭିନ୍ନ ଚଳଚ୍ଚିତ୍ରରେ ଭିନ୍ନ ଭିନ୍ନ ଭୂମିକାରେ ଅଭିନୟ କରିସାରିଛନ୍ତି। ଆକ୍ସନ୍, ରୋମାଣ୍ଟିକ, କମେଡି, ଖଳନାୟକ ଏବଂ ସେନା ଅଧିକାରୀ ଭୂମିକାରେ ତାଙ୍କୁ ଦେଖିବାକୁ ମିଳିଛି। ତେବେ ପ୍ରଥମ ଥର ପାଇଁ ସେ ଜଣେ ପାଇଲଟ ଭୂମିକାରେ ନଜର ଆସିବେ। 'ରନୱେ-୩୪'ର ଟ୍ରେଲରରେ ସିଙ୍ଘମ ଫେମ୍ ବିମାନ ଉଡାଉଥିବା ଦେଖାଯାଉଛି। ଏହି ଚଳଚ୍ଚିତ୍ରରେ ଅଜୟଙ୍କ ସହ ଚୁଲବୁଲି ଅଭିନେତ୍ରୀ ରାକୁଲପ୍ରୀତ ସିଂ ଅଭିନୟ କରିଛନ୍ତି। ପୂର୍ବରୁ 'ଦେ ଦେ ପ୍ୟାର ଦେ'ରେ ରାକୁଲ ପ୍ରୀତ ସିଂ (Rakul Preet Singh) ଓ ଅଜୟ ଦେବଗନ ଏକାଠି ନଜର ଆସିଥିଲେ। ରନୱେ-୩୪ ବ୍ୟତୀତ 'ଥ୍ୟାଙ୍କ ଗଡ୍'ରେ ମଧ୍ୟ ରାକୁଲ ଓ ଅଜୟଙ୍କ ଯୋଡ଼ିକୁ ଦେଖିବାକୁ ମିଳିବ। ଏହି ଚଳଚ୍ଚିତ୍ରର ସୁଟିଂ ଏବେ ଚାଲିଛି।

'Runway 34' ଏକ ସତ୍ୟ ଘଟଣା ଉପରେ ଆଧାରିତ ଚଳଚ୍ଚିତ୍ର। ଏପ୍ରିଲ ୨୯ ତାରିଖରେ 'ରନୱେ-୩୪' ମୁକ୍ତିଲାଭ କରିବ। ଏହି ଚଳଚ୍ଚିତ୍ରରେ ବଲିଉଡ ବାଦଶା ତଥା ବିଗ୍ ବି ଅମିତାଭ ବଚ୍ଚନ, ରାକୁଲପ୍ରୀତ ସିଂ, ଆକାଂକ୍ଷା ସିଂହ, ବୋମନ ଇରାନୀ, ଅଙ୍ଗିରା ଧୀର ପ୍ରମୁଖ ଅଭିନୟ କରିଛନ୍ତି। ଏହି ଚଳଚ୍ଚିତ୍ରରେ ଅଜୟ ଦେବଗନଙ୍କ ଭୂମିକା ତାଙ୍କର ଅନ୍ୟ ସମସ୍ତ ଚଳଚ୍ଚିତ୍ରଠାରୁ ଟିକେ ଭିନ୍ନ ରହିଛି। ଟ୍ରେଲର ରିଲିଜ ହେବା ପରେ ବଡ଼ ପରଦାରେ ଅମିତାଭ ବଚ୍ଚନ ଏବଂ ଅଜୟ ଦେବଗନଙ୍କ ଯୋଡ଼ିକୁ ଦେଖିବାକୁ ପ୍ରଶଂସକ ବେଶ୍ ଉତ୍ସାହିତ ଅଛନ୍ତି। ତେବେ ଏହି ଚଳଚ୍ଚିତ୍ରଟି ଭଲ ବ୍ୟବସାୟ କରିବା ସହ ଦର୍ଶକଙ୍କ ମନ ଜିଣିବ ବୋଲି ପ୍ରଯୋଜକ ଓ ନିର୍ଦ୍ଦେଶକ ଅଜୟ ଦେବଗନ ଆଶା ବାନ୍ଧିଛନ୍ତି।

'ପ୍ୟାରୀ ବେହେନା' ଚଳଚ୍ଚିତ୍ରରୁ ଅଭିନେତା ଅଜୟ ଦେବଗନ ନିଜର ବଲିଉଡ୍ କ୍ୟାରିଅର୍ ଆରମ୍ଭ କରିଥିଲେ। ଏହି ଚଳଚ୍ଚିତ୍ର ୧୯୮୫ ମସିହାରେ ରିଲିଜ ହେଇଥିଲା। ପରେ ୧୯୯୧ ମସିହାରେ ଚଳଚ୍ଚିତ୍ର 'ଫୁଲ ଔର କାଣ୍ଟେ'ରେ ଅଭିନୟ କରି ଅଜୟ ଦର୍ଶକଙ୍କ ମନ ଜିଣିଥିଲେ। ଅଜୟଙ୍କ ବାଇକ ଷ୍ଟଣ୍ଟ ସହ ରୋମାଣ୍ଟିକ ଗୀତରେ ସେ କରିଥିବା ନୃତ୍ୟକୁ ଦର୍ଶକ ସେତେବେଳେ ବହୁତ ପସନ୍ଦ କରିଥିଲେ। କିଛିଦିନ ତଳେ ରିଲିଜ ହୋଇଥିବା 'ଗଙ୍ଗୁବାଇ କାଠିଆୱାଡି'ରେ ରହୀମ ଲାଲା ଭୂମିକାରେ ଅଭିନୟ କରି ଅଜୟ ଦେବଗନ ଦର୍ଶକଙ୍କ ମନ ଜିଣିଥିଲେ।