ଶାଳୀ ପାଇଁ ଗଲା ଭିଣୋଇ ଜୀବନ! ସାନଭାଇର ବେକ ମୋଡ଼ି ଦେଲା ବଡ଼

ବଲାଙ୍ଗିର: ଶାଳୀ ପାଇଁ ଗଲା ଭିଣୋଇ ଜୀବନ! ସାନଭାଇର ବେକ ମୋଡ଼ି ଦେଲା ବଡ଼। ଏପରି ଏକ ଲୋମହର୍ଷଣକାରୀ ହତ୍ୟାକାଣ୍ଡ ବଲାଙ୍ଗୀର ରୋଡ ରେଳ ଷ୍ଟେସନ ନିକଟରେ ଥିବା ଚମରାପଡାରେ ଘଟିଛି। ସଦର ଥାନା ଚମାରପଡ଼ା ଗାଁରେ ଶୁକ୍ରବାର ରାତିରେ ସାମାନ୍ୟ ବଚସାରୁ ସାନଭାଇର ଗଳା ଚିପି ବଡ଼ଭାଇ ହତ୍ୟା କରିଥିବା ଅଭିଯୋଗ ହୋଇଛି।

ମିଳିଥିବା ସୂଚନାନୁସାରେ, ବଲାଙ୍ଗିର ରୋଡ ରେଳ ଷ୍ଟେସନ ନିକଟରେ ଥିବା ଚମରାପଡାରେ ଶୁକ୍ରବାର ରାତିରେ ଏକ ଜଘନ୍ୟ ହତ୍ୟାକାଣ୍ଡ ଘଟିଛି। ସାନଭାଇର ଶାଳୀକୁ ଅଶାଳୀନ ଭାଷାରେ କମେଣ୍ଟମରାକୁ କେନ୍ଦ୍ରକରି ବଡଭାଇ ସାନଭାଇକୁ ବେକ ମୋଡି ହତ୍ୟା କରିଥିବା ଅଭିଯୋଗ ହୋଇଛି। ମୃତକ ଜଣକଙ୍କ ନାମ ଜୋସେଫ ରୋହିଦାସ। ହତ୍ୟା ଘଟଣାରେ ଅଭିଯୁକ୍ତ ବଡଭାଇ ରାଜିନ ରୋହିଦାସକୁ ଟାଉନ୍ ଥାନା ପୋଲିସ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି।

ମୃତ ଜୋସେଫ ଓ ହତ୍ୟାକାରୀ ରାଜିନ ଦୁଇ ଭାଇ। ଉଭୟ କବାଡି କାମ କରି ପରିବାର ପ୍ରତିପୋଷଣ କରନ୍ତି। ଜୋସେଫଙ୍କ ଘରେ ତାଙ୍କ ଅବିବାହିତା ଶାଳୀ ରହୁଥିଲେ। ଜୋସେଫଙ୍କ ଶାଳୀକୁ ବଡଭାଇ ରାଜିନ ବିଭିନ୍ନ ସମୟରେ ମଦ୍ୟପାନ କରି ଅଶାଳୀନ ଭାଷାରେ କମେଣ୍ଟ କରୁଥିଲା। ଯାହାକୁ ନେଇ ଶୁକ୍ରବାର ସନ୍ଧ୍ୟାରେ ଦୁଇ ଭାଇ ମଧ୍ୟରେ ବଚସା ହୋଇଥିଲା।

ଅଭିଯୋଗ ପ୍ରକାରେ, ଶୁକ୍ରବାର ରାତିରେ ଜୋସେଫ ତାଙ୍କ ଝିଅ ସହିତ ବାହାରେ ଠେଲାରେ ଶୋଇଥିଲେ। ଏହି ସମୟରେ ରାଜିନ, ସାନ ଭାଇ ଜୋସେଫକୁ ଆକ୍ରମଣ କରିଥିଲା। ଆକ୍ରମଣରୁ ଜୋସେଫଙ୍କ ଝିଅ ଅଳ୍ପକେ ବର୍ତ୍ତୀ ଯାଇଥିଲେ। କିନ୍ତୁ  ରାଜିନ, ଜୋସେଫଙ୍କ ବେକ ଚିପି ଅତି ନିର୍ମମ ଭାବେ ହତ୍ୟା କରିଥିଲେ। ପରିବାର ଲୋକେ ଜୋସେଫଙ୍କୁ ଡାକ୍ତରଖାନା ନେଇଥିଲେ କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।