ରେଡ୍ ଜୋନରେ ୪ ଜିଲ୍ଲା: ସଂକ୍ରମଣ ବଢିଲା, ୪୦ ଉପରେ ମୃତ୍ୟୁ ସଂଖ୍ୟା

ଭୁବନେଶ୍ୱର: ଗତ ଦୁଇ ଦିନ ହେବ ରାଜ୍ୟରେ କୋରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଛି। ଏବେ ରାଜ୍ୟର ୪ ଜିଲ୍ଲା ରେଡ୍ ଜୋନରେ ଅଛନ୍ତି। ୨୫ ଜୁନରେ ୨୯୨୧ ଜଣ ପଜିଟିଭ୍ ବାହାରି ଥିବା ବେଳେ ୨୬ ଓ ୨୭ ତାରିଖରେ ଆକ୍ରାନ୍ତଙ୍କ ସଂଖ୍ୟା ପୁଣି ଥରେ ୩ ହଜାର ପାର କରିଛି। ଅନ୍ୟପଟେ ମୃତ୍ୟୁ ସଂଖ୍ୟା ପୂର୍ବଭଳି ସ୍ଥିର ରହିଛି। ଏହା ୪୦ ତଳକୁ ଖସୁନଥିବା ଦେଖିବାକୁ ମିଳିଛି।

ରାଜ୍ୟରେ ଦିନକରେ ଆଉ ୩ ହଜାର ୩୧୯ କୋରୋନା (Coronavirus) ଆକ୍ରାନ୍ତ ଚିହ୍ନଟ ହୋଇଛନ୍ତି। ସଂଗରୋଧରୁ ୧୮୯୬ ଓ ସ୍ଥାନୀୟ ଅଞ୍ଚଳରୁ ୧୪୨୩ ରୋଗୀ ବାହାରିଛନ୍ତି। ଏହା ସହିତ ରାଜ୍ୟରେ ମୋଟ ସଂକ୍ରମିତଙ୍କ ସଂଖ୍ୟା ୯ ଲକ୍ଷ ୩ ହଜାର ୭୮୯କୁ ବୃଦ୍ଧି ହୋଇଥିବା ବେଳେ ୮ ଲକ୍ଷ ୬୭ ହଜାର ୪୦୨ ଜଣ ଏଯାଏ ସୁସ୍ଥ ହେଲେଣି। 

ଅନ୍ୟପଟେ ଗତ ୨୪ ଘଣ୍ଟାରେ ୪୩ ଜୀବନ ନେଇଛି ମହାମାରୀ କୋରୋନା। ଭୁବନେଶ୍ବର (Bhubaneswar) ରେ ୫ ସମେତ ଖୋର୍ଦ୍ଧା ଜିଲ୍ଲାରୁ ସର୍ବାଧିକ ୯ ଜଣଙ୍କ ମୃତ ହୋଇଛି। ବରଗଡ଼, ନୟାଗଡ଼ ଓ ପୁରୀରୁ ୫ ଜଣ ଲେଖାଏଁ କୋଭିଡରେ ମୃତ ବରଣ କରିଛନ୍ତି। ରାଜ୍ୟରେ କୋଭିଡ ମୃତ୍ୟୁ ସଂଖ୍ୟା ୩ ହଜାର ୯୩୦କୁ ବୃଦ୍ଧି। 

ବର୍ତ୍ତମାନ ମଧ୍ୟ ରାଜ୍ୟର ୩ଟି ଜିଲ୍ଲା- ଖୋର୍ଦ୍ଧା, କଟକ, ଯାଜପୁର ଓ ବାଲେଶ୍ୱର ସକ୍ରିୟ ମାମଲାରେ ରେଡ୍ ଜୋନ (Red Zone) ରେ ଅଛନ୍ତି। ସେହିପରି ମୟୂରଭଞ୍ଜ, ଭଦ୍ରକ, ପୁରୀ, ଜଗତସିଂହପୁର ଓ ନୟାଗଡ ୟେଲୋଜୋନରେ ଅଛନ୍ତି। ତେବେ ଗତ ମେ ୨୪ ତାରିଖ ଠାରୁ ରାଜ୍ୟରେ କୋରୋନା ଜନିତ ଦୈନିକ ମୃତ୍ୟୁ ସଂଖ୍ୟା ୩୦ ଉପରେ ରହୁଛି। 

ଅନ୍ୟପଟେ କୋରୋନା ପ୍ରଭାବିତ ୨୨୨ ଦେଶ ମଧ୍ୟରୁ ଆମେରିକାରେ ସର୍ବାଧିକ ମୃତ୍ୟୁ ରେକର୍ଡ କରାଯାଇଛି। ଆମେରିକାରେ କୋରୋନାରେ ୬ ଲକ୍ଷ ୧୯ ହଜାର ୪୨୪ ଜଣ ଜୀବନ ହରାଇଛନ୍ତି। ବିଶ୍ବରେ କୋଭିଡ ସଂକ୍ରମଣରେ ଭାରତ ଦ୍ବିତୀୟ ଓ ବ୍ରାଜିଲ ତୃତୀୟ ସ୍ଥାନରେ ଅଛନ୍ତି। ବିଶ୍ବରେ ମୋଟ କୋରୋନା ମୃତ୍ୟୁ ସଂଖ୍ୟା ୩୯ ଲକ୍ଷ ୩୮ ହଜାର ୮୧୭କୁ ବୃଦ୍ଧି ପାଇଥିବା ବେଳେ ଚିକିତ୍ସାଧୀନ ଥିବା ୧ କୋଟି ୧୫ ଲକ୍ଷ ୪୮ ହଜାର ୪୮୯ ଜଣଙ୍କ ମଧ୍ୟରୁ ୮୦ ହଜାର ୪୩୪ ଜଣ ଗୁରୁତର ଅଛନ୍ତି।