କେନ୍ଦ୍ର ସରକାରଙ୍କ ଯୋଜନାକୁ ସତରେ ହାଇଜାକ୍ କରୁଛନ୍ତି ରାଜ୍ୟ ସରକାର !

ଚନ୍ଦନ ପାଇକରାୟ, ଭୁବନେଶ୍ୱର: ରାଜ୍ୟରେ ଲାଗୁ ହୋଇଛି ୱାନ୍ ନେସନ୍ ୱାନ୍ ରାସନ୍ କାର୍ଡ ବ୍ୟବସ୍ଥା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟବାସୀଙ୍କ ଉଦ୍ଦେଶ୍ୟରେ ଯୋଜନାର ଶୁଭାରମ୍ଭ କରିଛନ୍ତି । ଏଥିସହ ମାଲକାନଗିରି ଜିଲ୍ଲାବାସୀଙ୍କ ପାଇଁ ଭିଟାମିନ ଯୁକ୍ତ ଚାଉଣ ଯୋଗାଇବାକୁ କରିଛନ୍ତି ଘୋଷଣା । ଯାହାକୁ ନେଇ ଜନତା ଖୁସିବ୍ୟକ୍ତ କରିଥିବା ବେଳେ ବିରୋଧୀ ରାଜ୍ୟ ସରକାରଙ୍କୁ ଘେରିଛନ୍ତି । କେନ୍ଦ୍ର ସରକାରଙ୍କ ଯୋଜନାକୁ ରାଜ୍ୟ ପୁଣିଥରେ ହାଇଯାକ କରିଥିବା କହି କରିଛନ୍ତି ସମାଲୋଚନା । ଜବାବରେ ଶାସକ ଦଳ ନବୀନଙ୍କୁ ବିକାଶ ପୁରୁଷ କହି ବିକାଶିତ ଓଡ଼ିଶାର ରଖିଛନ୍ତି ଉଦାହରଣ । 

ରାଜ୍ୟରେ ଲାଗୁ ହେଲା ୱାନ୍ ନେସନ୍ ୱାନ୍ ରାସନ୍ (One Nation-One Ration Card) କାର୍ଡ ବା ଗୋଟିଏ ଦେଶ, ଗୋଟିଏ ରାସନ୍ ବ୍ୟବସ୍ଥା । ଯାହା ଦ୍ୱାରା ଏଣିକି ରାଜ୍ୟର ୧୦,୫୭୮ ସୁଲଭ ମୂଲ୍ୟ ଦୋକାନରେ ହିତାଧିକାରୀମାନେ ଏ ସୁବିଧା ପାଇବେ । ଏହା ମଧ୍ୟରେ ମାଲକାନଗିରି (Malkangiri) ଜିଲ୍ଲାରେ ସାଧାରଣ ବଣ୍ଟନ ବ୍ୟବସ୍ଥାରେ ଭିଟାମିନଯୁକ୍ତ ଚାଉଳ ପ୍ରଦାନ ଆରମ୍ଭ ହୋଇଛି । ଏହି ଚାଉଳରେ ଭିଟାମିନ ବି-୧୨ ଓ ଫୋଲିକ୍ ଏସିଡ୍ ରହିଛି ।  

ଯାହା ଗରିବ ଶ୍ରେଣୀ ମହିଳା ଓ ପିଲାଙ୍କ ସ୍ୱାସ୍ଥ୍ୟ ସୁରକ୍ଷା କ୍ଷେତ୍ରରେ ବହୁତ ସହାୟକ ହେବ ବୋଲି ରାଜ୍ୟ ସରକାର କହିଛନ୍ତି। ମାତ୍ର ବିରୋଧୀ ବିଜେପି ଓ କଂଗ୍ରେସ ଏ ପ୍ରସଙ୍ଗରେ ନବୀନ ସରକାରଙ୍କୁ ଘେରିଛନ୍ତି । ଦୁଇଟି ଯାକ ଯୋଜନା କେନ୍ଦ୍ର ସରକାରଙ୍କର । ମାତ୍ର ରାଜ୍ୟ ସରକାର (Odisha Government) ତାହାକୁ ନିଜର କହି ରାଜ୍ୟବାସୀଙ୍କୁ ପୁଣି ଭୂଆଁ ବୁଲାଉଛନ୍ତି । ସେପଟେ ଶାସକ ବିଜେଡି ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇ ବିରୋଧୀଙ୍କୁ ରାଜ୍ୟ ବିକାଶର ପାଠ ପଢ଼ାଇଛି । 

ଜବାବରେ ଦଳ କହିଛି, ରାଜ୍ୟର ବିକାଶ ନକ୍ସା ମୁଖ୍ୟମନ୍ତ୍ରୀ ପ୍ରସ୍ତୁତ କରିଛନ୍ତି। ତେଣୁ ନବୀନ (Naveen Patnaik) ଙ୍କ ବିନା ରାଜ୍ୟରେ ବିକାଶ ଅସମ୍ଭବ। ସେମିତି କେନ୍ଦ୍ରର କୌଣସି ଯୋଜନା, ରାଜ୍ୟର ବିନା ସହଯୋଗରେ ସଫଳତା ହାସଲ କରିପାରିବନି । ତେଣୁ ଏପରି ହାଇଯାକ୍ ଶବ୍ଦ ଅମୂଳକ। ତେବେ ଗୋଟିଏ ଦେଶ ଗୋଟିଏ ରାସନ ଯୋଜନାରେ ରାଜ୍ୟର ୯୩ ଲକ୍ଷ ପରିବାର । ଅର୍ଥାତ୍ ସାଢ଼େ ୩ କୋଟି ଲୋକ ଉପକୃତ ହେବେ । ୨୦୦୮ରେ ରାଜ୍ୟ ସରକାର ୨ ଟଙ୍କିଆ ଚାଉଳ ଓ ପରେ ୨୦୧୩ରୁ ଟଙ୍କିକିଆ ଚାଉଳ ନିରନ୍ତର ଭାବେ ଯୋଗାଇ ଆସୁଛନ୍ତି ।