ସ୍କୁଲ ଫି ପ୍ରସଙ୍ଗ: ଆପୋଷ ବୁଝାମଣା କରିବାକୁ କୋର୍ଟଙ୍କ ନିର୍ଦ୍ଦେଶ

ସ୍କୁଲ ଫି ଛାଡ ପ୍ରସଙ୍ଗରେ ବିଭିନ୍ନ ଆବେଦନକାରୀ ହାଇକୋର୍ଟରେ ମାମଲା ଦାଏର କରିଥିବା ବେଳେ ସପ୍ତାହେ ସମୟ ଦେଇ ଆପୋଷ ବୁଝାମଣା କରିବାକୁ ପରାମର୍ଶ ଦେଇଛନ୍ତି ନ୍ୟାୟାଳୟ ।

ଭୁବନେଶ୍ୱର (ଶାନ୍ତସ୍ୱରୂପ ରାଉତ): ଆପୋଷ ବୁଝାମଣାରେ ବାହାରିଲା ନିର୍ଯ୍ୟାସ । ସ୍କୁଲ ଫି (School Fee) ଛାଡ ପ୍ରସଙ୍ଗରେ ବିଭିନ୍ନ ଆବେଦନକାରୀ ହାଇକୋର୍ଟରେ ମାମଲା ଦାଏର କରିଥିବା ବେଳେ ସପ୍ତାହେ ସମୟ ଦେଇ ଆପୋଷ ବୁଝାମଣା କରିବାକୁ ପରାମର୍ଶ ଦେଇଛନ୍ତି ନ୍ୟାୟାଳୟ । ଆବଦେନ କରିଥିବା ଦୁଇ ଜଣ ବ୍ୟକ୍ତି, ଓଡିଶା ଅଭିଭାବକ ମହାସଂଘ, ଘରୋଇ ବିଦ୍ୟାଳୟର ସଂଘ ଏବଂ ଶିକ୍ଷକ ସଂଘ ମଧ୍ୟରେ ରାଜ୍ୟ ଗଣଶିକ୍ଷା ସଚିବଙ୍କ ଅଧ୍ୟକ୍ଷତାରେ ଆପୋଷ ବୁଝାମଣା ପାଇଁ ହାଇକୋର୍ଟ ଶୁଣାଣି କରିଥିଲେ ।

ଏନେଇ ବାରମ୍ବାର ବୈଠକ ପରେ ଆଜି ସଚିବଙ୍କ ଆଗରେ ସମସ୍ତ ଆବଦନକାରୀ ଏମଓୟୁ ସ୍ୱାକ୍ଷର କରିଛନ୍ତି । ଆପୋଷ ବୁଝାମଣା ସଫଳ ହୋଇଛି ଏବଂ ସାମୂହିକ ସ୍ୱାର୍ଥରେ ଛାଡ ପ୍ରସଙ୍ଗରେ ସଭିଏଁ ଏକମତ ଥିବା ଓଡିଶା ଅଭିଭାବକ ସଂଘ କହିଛି । ବୁଝାମଣାର ସମସ୍ତ ତଥ୍ୟ ହାଇକୋର୍ଟଙ୍କୁ ହସ୍ତାନ୍ତର କରିବା ପରେ ପରବର୍ତ୍ତୀ ଶୁଣାଣୀରେ ଏହି ନିଷ୍ପତ୍ତି ସାମ୍ନାକୁ ଆସିବ । ସେପଟେ କେନ୍ଦ୍ର ସରକାରଙ୍କ ବିଦ୍ୟାଳୟ ଖୋଲିବା ନେଇ ଜାରି ହୋଇଥିବା ମାର୍ଗଦର୍ଶିକାକୁ (Guidelines) ବିରୋଧ କରିଛି ସଂଘ ।

ଦେଶରୁ ଏପର୍ଯ୍ୟନ୍ତ କୋରୋନା ସଂକଟ ଟଳି ନଥିବା ବେଳେ କିଭଳି ଛାତ୍ରଛାତ୍ରୀଙ୍କ ଜୀବନକୁ ଅନ୍ଧାରକୁ ଠେଲିଦିଆଯିବ ଏବଂ ବିଦ୍ୟାଳୟରେ ଛାତ୍ରଛାତ୍ରୀ କୋରୋନାରେ ଆକ୍ରାନ୍ତ ହେଲେ କିଏ ଦାୟୀ ରହିବେ ବୋଲି ପ୍ରଶ୍ନ କରିଛି ସଂଘ । ମହାମାରୀ ଆଇନରେ ଉକ୍ତ ବିଦ୍ୟାଳୟରେ କାର୍ଯ୍ୟାନୁଷ୍ଠାନ ଦାବି କରିଛି ସଂଘ ।