ଭଉଣୀ ମଥାର ସିନ୍ଦୁର ପୋଛିଲା ଭାଇ, କାରଣ ଜାଣିଲେ ହୋଇଯିବେ ଆଶ୍ଚର୍ଯ୍ୟ

ବେତୁଲ: ବିବାହ ପରେ ପ୍ରାୟତଃ ଜ୍ୱାଇଁ, ଶ୍ୱଶୁର ଘରକୁ ଯାଆନ୍ତି। କିନ୍ତୁ ଏଥିପାଇଁ ଜୀବନ ଦେବାକୁ ପଡିବ ତାହା ଅସ୍ୱଭାବିକ ଓ ଆଶ୍ଚର୍ଯ୍ୟଜନକ। ମଧ୍ୟପ୍ରଦେଶର ବେତୁଲ ଜିଲ୍ଲାରେ ତାଙ୍କ ଭଉଣୀ ଓ ଭିଣୋଇ ବାରମ୍ବାର ଘରକୁ ଆସିବା ପରେ ଜଣେ କ୍ରୋଧିତ ୨୫ ବର୍ଷ ବୟସ୍କ ବ୍ୟକ୍ତି ତାଙ୍କ ଭିଣୋଇଙ୍କୁ ମାରିଦେଇଥିବାର ଅଭିଯୋଗ ହୋଇଛି। ଏହି ଘଟଣାରେ ଉକ୍ତ ବ୍ୟକ୍ତିଙ୍କ ମା ମଧ୍ୟ ଆହତ ହୋଇଥିଲେ। ବୁଧବାର ପୋଲିସ ଏହି ସୂଚନା ଦେଇଛି।

ମୁଲତାଇ ପୋଲିସ ଷ୍ଟେସନର ଦାୟିତ୍ୱରେ ଥିବା ସୁନୀଲ ଲାଟା କହିଛନ୍ତି ଯେ, ଏହି ଘଟଣା ସୋମବାର ରାତିରେ ଜିଲ୍ଲା ମୁଖ୍ୟାଳୟଠାରୁ ୭୫ କିଲୋମିଟର ଦୂରରେ ଥିବା ବିଛୁଆ ଗ୍ରାମରେ ଘଟିଛି। ମଙ୍ଗଳବାର ଦିନ ପୋଲିସ ଅଭିଯୁକ୍ତ ଦୀପକ କୁମାରଙ୍କୁ ଗିରଫ କରିଥିଲା। ପୋଲିସର ସୂଚନାନୁସାରେ, ଛିନ୍ଦୱାଡା ଜିଲ୍ଲାର ହିରୱାଡି ଗାଁର ବାସିନ୍ଦା ବିନୋଦ ପନ୍ଦ୍ରମ (୩୨) ଅଭିଯୁକ୍ତ ଦୀପକଙ୍କ ଭଉଣୀଙ୍କୁ ବିବାହ କରିଥିଲେ। ଦୀପକ ତାଙ୍କ ପିତାମାତାଙ୍କ ସହ ବେତୁଲ ଜିଲ୍ଲାର ବିଛୁଆ ଗ୍ରାମରେ ରୁହନ୍ତି ଏବଂ ଭିଣୋଇଙ୍କୁ ବାରମ୍ବାର ତାଙ୍କ ଘରକୁ ଆସିବା ଉପରେ ଆପତ୍ତି ଉଠାଇଥିଲେ।

ବିନୋଦ ତାଙ୍କ ପତ୍ନୀଙ୍କ ସହ କିଛି ଦିନ ପୂର୍ବରୁ ପୁନର୍ବାର ତାଙ୍କ ଶାଶୁ ଘରକୁ ଆସିଥିଲେ। ସୋମବାର ଅଭିଯୁକ୍ତ ଏବଂ ବିନୋଦଙ୍କ ମଧ୍ୟରେ ଏହି ପ୍ରସଙ୍ଗରେ ବିତର୍କ ହୋଇଥିଲା। ଏହା ପରେ ଅଭିଯୁକ୍ତ ତାଙ୍କ ଭିଣୋଇ ବିନୋଦଙ୍କୁ କାଠ ଫାଳିଆରେ ପିଟିପିଟି ହତ୍ୟା କରିଥିଲା। ଏହି ସମୟରେ ଯେତେବେଳେ ଦୀପକଙ୍କର ୬୫ ବର୍ଷ ବୟସ୍କା ମା ଏଥିରେ ହସ୍ତକ୍ଷେପ କରିବାକୁ ଚେଷ୍ଟା କରିଥିଲେ, ସେତେବେଳେ ସେ ମଧ୍ୟ ପୁଅର ଆକ୍ରମଣରେ ଆହତ ହୋଇଥିଲେ।

ପୋଲିସ ଅଧିକାରୀ ଲାଟା କହିଛନ୍ତି ଯେ, ଅଭିଯୁକ୍ତ ଦୀପକଙ୍କୁ ମଙ୍ଗଳବାର ଗିରଫ କରାଯାଇଛି ଏବଂ ତାଙ୍କ ବିରୋଧରେ ଭାରତୀୟ ଦଣ୍ଡ ସଂହିତା (ଆଇପିସି) ର ବିଭାଗ ଅନୁଯାୟୀ ମାମଲା ରୁଜୁ ହୋଇଛି। ପୋଷ୍ଟମର୍ଟମ ପରେ ବିନୋଦଙ୍କ ମୃତଦେହ ପରିବାରକୁ ହସ୍ତାନ୍ତର କରାଯାଇଛି।