ମହାରାଷ୍ଟ୍ରରେ କୋରୋନା ନେଲା ଆଉ ଏକ ମୁଣ୍ଡ, ଦେଶରେ ମୃତ୍ୟୁ ସଂଖ୍ୟା ଛୁଇଁଲା ୨୭

ନୂଆଦିଲ୍ଲୀ: ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି । ଯାହାକୁ ଦୃଷ୍ଟିରେ ରଖି ବିଗତ ଦିନରେ ସରକାର ସାରା ଦେଶରେ ଲକ୍ ଡାଉନ୍ କରିଥିଲେ । କିନ୍ତୁ ବିଗତ ୨ ଦିନରେ କୋରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତଗତିରେ ବୃଦ୍ଧି ପାଇଛି । ଫଳରେ ଆଜି ଅର୍ଥାତ ରବିବାର ସୁଦ୍ଧା ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ୧୦୦୦ରୁ ଉର୍ଦ୍ଧ୍ୱ ପହଞ୍ଚିଛି । ଏଥିରୁ ୨୭ ଜଣଙ୍କ ମୃତ୍ୟୁ ଘଟିଛି । ଆଜି ମହାରାଷ୍ଟ୍ରରେ ଆଉ ଜଣେ କୋରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି । 

ଏଠାରେ କହି ରଖୁଛୁ ଯେ, ଆଜି ମହାରାଷ୍ଟ୍ରର ମୁମ୍ୱାଇରେ ଜଣେ କୋରୋନା ରୋଗୀଙ୍କ ମୃତ୍ୟୁ ଘଟିଛି । ଏହି ମୃତ୍ୟୁ ସହ ମହାରାଷ୍ଟ୍ରରେ କୋରୋନା ଜନିତ ମୃତ୍ୟୁ ସଂଖ୍ୟା ୭ ହୋଇଯାଇଛି । ମୃତ୍ୟୁ ବରଣ କରିଥିବା ୪୦ ବର୍ଷୀୟ ମହିଳାଙ୍କ ଏମସିଜିଏମ ହସ୍ପିଟାଲରେ ଚିକିତ୍ସା ଚାଲୁଥିଲା । 

ଅନ୍ୟପକ୍ଷେ କୋରୋନା ମୁକାବିଲା ପାଇଁ ସମସ୍ତେ ସାହାଯ୍ୟର ହାତ ବଢେଇବାକୁ ଲାଗିଛି । ଏହି କ୍ରମରେ ଆଜି ସିବିଆଇ ଅଧିକାରୀମାନେ ଘୋଷଣା କରିଛନ୍ତି ଯେ ସେମାନେ ଗୋଟିଏ ଦିନର ଦରମା ପିଏମ କେୟର୍ସ ଫଣ୍ଡକୁ ପ୍ରଦାନ କରିବେ । ଏହା ପୂର୍ବରୁ ଗତକାଲି ଅର୍ଥାତ ଶନିବାର ବଲିଉଡ ଅଭିନେତା ଅକ୍ଷୟ କୁମାର ମଧ୍ୟ କୋରୋନା ମୁକାବିଲା ପାଇଁ ପିଏମ କେୟର୍ସ ଫଣ୍ଡରେ ୨୫ କୋଟି ଟଙ୍କା ପ୍ରଦାନ କରିବେ ବୋଲି ଘୋଷଣା କରିଥିଲେ ।