ଆନ୍ଦୋଳନ ଜାରି ରଖିବେ କୃଷକ, ୨୯ ନଭେମ୍ବରରେ ସଂସଦ ପର୍ଯ୍ୟନ୍ତ କରିବେ ଟ୍ରାକ୍ଟର ରାଲି

ୟୁନାଇଟେଡ୍ କିସାନ୍ ମୋର୍ଚ୍ଚା ଏକ ବୟାନ ଜାରି କରି କହିଛି ଯେ ନଭେମ୍ବର ୨୬ ରେ ଏହି ଆନ୍ଦୋଳନର ବାର୍ଷିକ ଉତ୍ସବରେ ଦିଲ୍ଲୀ ବ୍ୟତୀତ ଅନ୍ୟ ରାଜ୍ୟର ରାଜଧାନୀରେ ଟ୍ରାକ୍ଟର ଏବଂ ବଳଦ ଗାଡିରେ ରାଲି ମଧ୍ୟ କରାଯିବ ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି (PM Modi) ତିନୋଟି କୃଷି ଆଇନ (Farm Laws) ପ୍ରତ୍ୟାହାର କରିବାକୁ ଘୋଷଣା କରିଛନ୍ତି । ତେବେ ସଂସଦରେ ଆଇନ ରଦ୍ଦ ନହେବା ପର୍ଯ୍ୟନ୍ତ କୃଷକ ମାନେ ଆନ୍ଦୋଳନ ଜାରି ରଖିବେ ବୋଲି କୃଷକ ନେତାମାନେ କହିଛନ୍ତି । ଏସବୁକୁ ନେଇ ୟୁନାଇଟେଡ୍ କିସାନ୍ ମୋର୍ଚ୍ଚାର ନେତା ବଲବୀର ସିଂ ରାଜୱାଲ (Balbir Singh Rajewal) କହିଛନ୍ତି ଯେ ନଭେମ୍ବର ୨୭ ରେ ୟୁନାଇଟେଡ୍ କିସାନ୍ ମୋର୍ଚା (SKM) ର ଆଉ ଏକ ବୈଠକ ହେବ ଏବଂ ପରବର୍ତ୍ତୀ ବିକାଶ ଓ ପରିସ୍ଥିତି ଉପରେ ନିଷ୍ପତ୍ତି ନିଆଯିବ ।"

ସେ କହିଛନ୍ତି, "ଆମେ କୃଷି ଆଇନ ରଦ୍ଦ ବିଷୟରେ ଆଲୋଚନା କରିଛୁ । ଏହା ପରେ କିଛି ନିଷ୍ପତ୍ତି ନିଆଯାଇଛି । ୟୁନାଇଟେଡ୍ କିସାନ ମୋର୍ଚ୍ଚାର ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଜାରି ରହିବ । ନଭେମ୍ବର ୨୨ ରେ ଲକ୍ଷ୍ନୌରେ କିସାନ ପଞ୍ଚାୟତ, ନଭେମ୍ବର ୨୬ ରେ ସମସ୍ତ ସୀମା ଉପରେ ଆଲୋଚନା ଏବଂ ନଭେମ୍ବର ୨୯ ସଂସଦ ପର୍ଯ୍ୟନ୍ତ ରାଲି ହେବ ।"

ବିଚାରାଧୀନ ଦାବିଗୁଡିକ ଉଲ୍ଲେଖ କରି ଆମେ ପ୍ରଧାନମନ୍ତ୍ରୀଙ୍କୁ ଏକ ଖୋଲା ଚିଠି ଲେଖିବୁ । ଏଥିରେ ଏମଏସପି କମିଟିର ଦାବି, ଏହାର କ୍ଷମତା, ସମୟ ସୀମା, କର୍ତ୍ତବ୍ୟ, ବିଦ୍ୟୁତ୍ ବିଲ୍ ୨୦୨୨ ପ୍ରତ୍ୟାହାର, ଲକ୍ଷ୍ମୀପୁର ଖେରୀ ମାମଲାରେ ମନ୍ତ୍ରୀ ଅଜୟ ମିଶ୍ରଙ୍କୁ ବରଖାସ୍ତ କରିବାକୁ ମଧ୍ୟ ଏକ ଚିଠି ଲେଖାଯିବ । ଏଥିସହିତ କୃଷି ଆଇନକୁ ରଦ୍ଦ କରିବା ନିଷ୍ପତ୍ତିକୁ ସେ ସ୍ୱାଗତ କରିଛନ୍ତି । ସେ କହିଛନ୍ତି ଯେ ଏହା ଏକ ଭଲ ପଦକ୍ଷେପ, ଆମେ ଏହାକୁ ସ୍ୱାଗତ କରୁଛୁ, ତଥାପି ବହୁତ କିଛି କରାଯିବାର ବାକି ଅଛି ।

ଏଥି ସହିତ ସୂତ୍ରରୁ ମିଳିଥିବା ସୂଚନା ଅନୁଯାୟୀ ନଭେମ୍ବର ୨୪ ରେ ତିନୋଟି ବିବାଦୀୟ କୃଷି ଆଇନ ପ୍ରତ୍ୟାହାର ଉପରେ ମୋଦି କ୍ୟାବିନେଟ୍ ଅନୁମୋଦନ ଦେବ । ଏହା ପରେ, ନଭେମ୍ବର ୨୯ ରୁ ସଂସଦର ଶୀତକାଳୀନ ଅଧିବେଶନ ଆରମ୍ଭରେ ଆଇନ ପ୍ରତ୍ୟାହାରର ସାମ୍ବିଧାନିକ ପ୍ରକ୍ରିୟା ଆରମ୍ଭ ହେବ । ସଂସଦର ନିୟମ ଅନୁଯାୟୀ, ଏକ ପୁରୁଣା ଆଇନ ପ୍ରତ୍ୟାହାର ପ୍ରକ୍ରିୟା ଏକ ନୂତନ ଆଇନ ତିଆରି କରିବା ସହିତ ସମାନ ।