'ଘରକୁ ପହଞ୍ଚି ପାରୁନାହାଁନ୍ତି ପ୍ରବାସୀ ଶ୍ରମିକ, ଆଉ ଘରୋଇ କ୍ଷେତ୍ର ପାଇଁ ମହାକାଶ ଯାତ୍ରାର ମାର୍ଗ ଖୋଲୁଛନ୍ତି ଅର୍ଥ ମନ୍ତ୍ରୀ'

ନୂଆଦିଲ୍ଲୀ: ଦେଶରେ କୋରୋନା ସଙ୍କଟ ଜାରି ରହିଛି । ଏହି ସମୟରେ ଅର୍ଥନୀତିରେ ସୁଧାର ଆଣିବା ପାଇଁ ପ୍ରଧାନମନ୍ତ୍ରୀ ମୋଦି ୨୦ ଲକ୍ଷ କୋଟିର ପ୍ୟାକେଜ୍ ଘୋଷଣା କରିଥିଲେ । ଯାହା ଉପରେ ଶନିବାର ଚତୁର୍ଥ ରାଉଣ୍ଡରେ ଅର୍ଥମନ୍ତ୍ରୀ ନିର୍ମଳା ସୀତାରମଣ  ପ୍ୟାକେଜରେ ଥିବା ବିଭିନ୍ନ ଯୋଜନା ବିଷୟରେ ଘୋଷଣା କରିଛନ୍ତି ।  ଏହା ଉପରେ କଂଗ୍ରେସର ବରିଷ୍ଠ ନେତା ତଥା ରାଜ୍ୟସଭା ସାଂସଦ ଜୟରାମ ରମେଶଙ୍କ  ତୀବ୍ର ପ୍ରତିକ୍ରିୟା ସାମ୍ନାକୁ ଆସିଛି । ସେ କହିଛନ୍ତି ଯେ ପ୍ରବାସୀମାନେ ନିରାପଦରେ ନିଜ ଘରେ ପହଂଚି ପାରୁନାହାଁନ୍ତି ଓ  ଅର୍ଥମନ୍ତ୍ରୀ ଘରୋଇ କ୍ଷେତ୍ରକୁ ଅନ୍ୟ ଗ୍ରହ ଅନୁସନ୍ଧାନ ତଥା ବାହ୍ୟ ମହାକାଶକୁ ଯାତ୍ରା କରିବା ପାଇଁ ରାସ୍ତା ଖୋଲିବାର କଥା କହୁଛନ୍ତି ।

ଅର୍ଥମନ୍ତ୍ରୀଙ୍କ ସାମ୍ବାଦିକ ସମ୍ମିଳନୀ ପରେ ଜୟରାମ ରମେଶ ତୁରନ୍ତ ଅନେକ ଟ୍ୱିଟ୍ କରିଛନ୍ତି । ସେ କହିଛନ୍ତି, "ଆଜି କରାଯାଇଥିବା ଘୋଷଣାରେ ଏହା ସ୍ପଷ୍ଟ ହୋଇଛି ଯେ ଏହାର ସର୍ବାଧିକ ଲାଭ ଗୋଟିଏ କମ୍ପାନୀକୁ ମିଳିବ । ବିଦ୍ୟୁତ୍ ବ୍ୟବହାର ସ୍ଥିର କିମ୍ବା ହ୍ରାସ ପାଉଛି, କିନ୍ତୁ ଅର୍ଥମନ୍ତ୍ରୀ ଆଣବିକ ଶକ୍ତିକୁ ଘରୋଇ କ୍ଷେତ୍ର ପାଇଁ ଖୋଲିବାକୁ ଚାହୁଁଛନ୍ତି ।"

ପୂର୍ବତନ କେନ୍ଦ୍ର ମନ୍ତ୍ରୀ ଜୟରାମ ରମେଶ କହିଛନ୍ତି ଯେ, ଆଶା କରିବା ଉଚିତ ଯେ କୋଭିଡ-19 କାରଣରୁ ଆର୍ଥିକ ତଥା ସାମାଜିକ ସଙ୍କଟ ଦେଇ ଗତି କରୁଥିବା ରାଜ୍ୟମାନଙ୍କୁ ଆସନ୍ତା ୬ ମାସ ପାଇଁ ଅତି କମରେ କିଛି ଅର୍ଥ ପ୍ରଦାନ କରାଯିବ ।