ଆଇସିସି ଏଲିଟ୍ ପ୍ୟାନେଲରେ ସାମିଲ ହେଲେ ଆଉ ଜଣେ ଭାରତୀୟ

ଦୁବାଇ: ଭାରତର ଯୁବ ଅମ୍ପାୟାର ନିତିନ ମେନନଙ୍କୁ ଇଂଲଣ୍ଡର ନାଇଜେଲ ଲଙ୍ଗଙ୍କ ସ୍ଥାନରେ ୨୦୨୦-୨୧ ସିଜନ ପାଇଁ ଅନ୍ତର୍ଜାତୀୟ କ୍ରିକେଟ୍ ପରିଷଦର ଅମ୍ପାୟାରଙ୍କ ଏଲିଟ୍ ପ୍ୟାନେଲରେ ସାମିଲ କରାଯାଇଛି । ୩୬ ବର୍ଷୀୟ ମେନନ୍ ୩ଟି ଟେଷ୍ଟ, ୨୪ଟି ଏକ ଦିବସୀୟ ଏବଂ ୧୬ଟି ଟି-20 ଆନ୍ତର୍ଜାତୀୟ ମ୍ୟାଚରେ ଅମ୍ପାୟାରିଂ କରିବାର ଅଭିଜ୍ଞତା ରହିଛି । ଅନ୍ୟପକ୍ଷେ ଏହି ତାଲିକାରେ ସ୍ଥାନ ସୁନିଶ୍ଚିତ କରିଥିବା ପୂର୍ବତନ ଅଧିନାୟକ ଶ୍ରୀନିବାସ ଭେଙ୍କଟାରାଘବନ୍ ଓ ସୁନ୍ଦରମ୍ ରବିଙ୍କ ପରେ ସେ ତୃତୀୟ ଭାରତୀୟ । ଗତ ବର୍ଷ ରବିଙ୍କୁ ଏଥିରୁ ବାଦ ଦିଆଯାଇଥିଲା ।

ଆଇସିସି ଜେନେରାଲ ମ୍ୟାନେଜର (କ୍ରିକେଟ୍) ଜ୍ୟୋଫ ଆଲର୍ଡାଇସ୍ (ଅଧ୍ୟକ୍ଷ), ପୂର୍ବତନ ଖେଳାଳି ତଥା ସମୀକ୍ଷକ ସଞ୍ଜୟ ମଞ୍ଜରେକର, ମ୍ୟାଚ୍ ରେଫରି ରଂଜନ ମଦୁଗାଲେ ଏବଂ ଡେଭିଡ ବୁନଙ୍କ ଚୟନ କମିଟି ଦ୍ୱାରା ମେନନଙ୍କ ଚୟନ କରାଯାଇଥିଲା । ମେନନ୍ ପୂର୍ବରୁ ଏମିରେଟ୍ସ ଆଇସିସି ଆନ୍ତର୍ଜାତୀୟ ଅମ୍ପାୟାର ପ୍ୟାନେଲର ଅଂଶ ଥିଲେ ।

ଆଇସିସି ତରଫରୁ ପ୍ରକାଶିତ ଏକ ବୟାନରେ ମେନନ୍ କହିଛନ୍ତି ଯେ, ଏଲିଟ୍ ପ୍ୟାନେଲରେ ନାମିତ ହେବା ମୋ ପାଇଁ ଗୌରବର ବିଷୟ । ଦୁନିଆର ଅଗ୍ରଣୀ ଅମ୍ପାୟାର ଏବଂ ରେଫରିମାନଙ୍କ ସହ ନିୟମିତ କାମ କରିବା ମୋର ସ୍ୱପ୍ନ ଥିଲା ।