ହୋଲି ପୂର୍ବରୁ ଛଅ କୋଟି ଚାକିରିଆଙ୍କୁ ବଡ଼ ଝଟକା! EPFO ଉପରେ ସରକାର ନେଲେ ଏହି ପଦକ୍ଷେପ

ନୂଆଦିଲ୍ଲୀ: ଗୋଟିଏ ପଟେ ଦେଶବାସୀ ମହଙ୍ଗା ସହ ସଂଘର୍ଷ କରୁଛନ୍ତି। ଏଭଳି କଠିନ ପରିସ୍ଥିତିରେ ସରକାର ବୋଝ ଉପରେ ନଳିତା ବିଡା ଲଦିଦେଇଛନ୍ତି। ହୋଲି ପୂର୍ବରୁ ଚାକିରିଆଙ୍କୁ ଶକ୍ତ ଝଟକା ଲାଗିଛି। କର୍ମଚାରୀଙ୍କ ପ୍ରୋଭିଡେଣ୍ଟ ଫଣ୍ଡ (EPFO) ୨୦୨୧-୨୨ ଆର୍ଥିକ ବର୍ଷ ପାଇଁ ସୁଧ ହାର .୪% ହ୍ରାସ କରିଛି। PTI ରୁ ମିଳିଥିବା ସୂଚନା ଅନୁଯାୟୀ, କର୍ମଚାରୀଙ୍କ EPFO ​​ସୁଧ ହାର ୮.୫% ରୁ ୮.୧% କୁ ହ୍ରାସ ପାଇଛି।

କର୍ମଚାରୀଙ୍କ ଆର୍ଥିକ ପ୍ରୋଭିଡେଣ୍ଟ ଫଣ୍ଡ ସଂଗଠନ ଶନିବାର ୨୦୨୧-୨୨ ଆର୍ଥିକ ବର୍ଷ ପାଇଁ PF ଜମା ଉପରେ ୮.୧% ସୁଧ ହାର ଦେବାକୁ ନିଷ୍ପତ୍ତି ନେଇଛି। ଏକ ଦଶନ୍ଧି ମଧ୍ୟରେ ଏହା ସର୍ବନିମ୍ନ ସୁଧ ହାର। ଶ୍ରମ ମନ୍ତ୍ରଣାଳୟର ସୂତ୍ର ଅନୁଯାୟୀ, EPFOର କେନ୍ଦ୍ରୀୟ ଟ୍ରଷ୍ଟି ବୋର୍ଡ ୨୦୨୧-୨୨ ଆର୍ଥିକ ବର୍ଷ ପାଇଁ ୮.୧% ସୁଧ ହାର ସୁପାରିଶ କରିବାକୁ ନିଷ୍ପତ୍ତି ନେଇଛି। EPF ବୋର୍ଡର ସୁପାରିଶ ଖୁବଶୀଘ୍ର ଅର୍ଥ ମନ୍ତ୍ରଣାଳୟକୁ ପଠାଯିବ।

ଗୁଆହାଟୀରେ EPFOର କେନ୍ଦ୍ରୀୟ ଟ୍ରଷ୍ଟି ବୋର୍ଡର ବୈଠକ ଅନୁଷ୍ଠିତ ହୋଇଥିଲା। ବୋର୍ଡର ସୁଧ ହାର ହ୍ରାସ ନିଷ୍ପତ୍ତି ନିଶ୍ଚିତ ଭାବରେ ଚାକିରିଆଙ୍କ ପାଇଁ ଏକ ପ୍ରତିବନ୍ଧକଠାରୁ କମ୍ ନୁହେଁ। ଏହି ନିଷ୍ପତ୍ତି EPFO ​ର ପ୍ରାୟ ଛଅ କୋଟି ଲୋକଙ୍କୁ ପ୍ରଭାବିତ କରିବ। ୧୯୭୭-୭୮ ଆର୍ଥିକ ବର୍ଷରେ EPFO ସୁଧ ହାର ୮ % କରିଥିଲା। ୨୦୧୬-୧୭ରେ ତାହା ୮.୬୫%କୁ ପହଞ୍ଚି ଯାଇଥିଲା।

EPFO ନିୟମ ଅନୁସାରେ, ଏହାର ଉପଭୋକ୍ତାଙ୍କୁ ବେସିକ୍ ଦରମାର ଅନ୍ୟୁନ୍ୟ ୧୨% ଜମା ଦେବାକୁ ପଡିଥାଏ। ସେଥିରେ ନିଯୁକ୍ତିଦାତା ଆଉ ସମାନ ପରିମାଣର ରାଶି ଜମା କରନ୍ତି। କୋରୋନା ସମୟରେ EPFOର ଆୟ ବ୍ୟାପକ ପ୍ରଭାବିତ ହୋଇଥିଲା। ୨୦୧୯-୨୦ରେ EPFO ପେମେଣ୍ଟ ବିଳମ୍ବ ହୋଇଥିଲା। ଯାହାକୁ ଦୁଇଟି ଇନଷ୍ଟଲମେଣ୍ଟରେ ଭରଣ କରାଯାଇଥିଲା।