ବାତ୍ୟାର ସ୍ଥାୟୀ ମୁକାବିଲା ପାଇଁ କେନ୍ଦ୍ର ପାଖରେ ଏମିତି ପ୍ରସ୍ତାବ ରଖିଲା ଓଡ଼ିଶା

ଯଯାତି ମହାନ୍ତି, ଭୁବନେଶ୍ୱର: ଓଡ଼ିଶା ପ୍ରତିବର୍ଷ ସାମ୍ନା କରୁଥିବା ବାତ୍ୟା ଭଳି ବିପର୍ଯ୍ୟୟର ସ୍ଥାୟୀ ମୁକାବିଲା ପାଇଁ ରାଜ୍ୟ ସରକାର କେନ୍ଦ୍ର ସରକାରଙ୍କ ପାଖରେ ୨୦ ହଜାର କୋଟି ଟଙ୍କାର ପ୍ରସ୍ତାବ ରଖିଛନ୍ତି । ମୁଖ୍ୟତଃ ସମୁଦ୍ର କୂଳେ କୂଳେ ଉଚ୍ଚ ପ୍ରାଚୀର ନିର୍ମାଣ କରିବା, ସମସ୍ତ କଚ୍ଚା ଘରକୁ ପକ୍କାଘରରେ ପରିଣତ କରିବା ଏବଂ ଭୂତଳ ବିଦ୍ୟୁତ କେବୁଲ ବିଛାଇବା ଉଦ୍ଦେଶ୍ୟରେ ଏହା ଖର୍ଚ୍ଚ ହେବ । ଏହାକୁ ବିଶେଷଜ୍ଞ ସ୍ୱାଗତ କରିବା ସହ ଏହାର ଆବଶ୍ୟକତା ରହିଛି ବୋଲି କହିଛନ୍ତି । 

ଅନ୍ୟପଟେ ରାଜ୍ୟରେ ବିପର୍ଯ୍ୟୟର ସ୍ଥାୟୀ ପ୍ରତିକାର ପାଇଁ ନବୀନ ସରକାର କାମ କରୁଛନ୍ତି ବୋଲି ବିଜେଡ଼ି କହିଥିବା ବେଳେ ବିଜେପି କହିଛି ଏତେ ବଡ଼ ଯୋଜନା ପାଇଁ ସମସ୍ତଙ୍କ ସହ ଆଲୋଚନା ହେବା ଦରକାର । କଂଗ୍ରେସ କହିଛି, ରାଜ୍ୟବାସୀଙ୍କୁ କେନ୍ଦ୍ର ବିଜେପି ସରକାର ଭଲ ପାଉଛି ବୋଲି ସବୁବେଳେ କହୁଥିବାରୁ ଅନୁଦାନ ଶୀଘ୍ର ଆସିପାରେ ।

କେତେବେଳେ ଫାଇଲିନ୍ ତ ପୁଣି କେତେବେଳେ ହୁଦ୍‌ହୁଦ୍‌, ପୁଣି କେତେବେଳେ ତିତ୍‌ଲୀ ତ ପୁଣି କେତେବେଳେ ଫନି । ଏବେ ପୁଣି ଅମ୍ଫାନ ରୂପରେ । ପ୍ରାକୃତିକ ବିପର୍ଯ୍ୟୟ ବିଶେଷ କରି ସାମୁଦ୍ରିକ ଝଡ଼ ଓଡ଼ିଶାକୁ ସବୁବେଳେ କ୍ଷତିଗ୍ରସ୍ତ କରୁଛି । କେତେବେଳେ ଛପର ଘର ଉଡ଼ାଇ ନେଉଛି ତ କେତେବେଳେ ବିଦ୍ୟୁତ ଭିତିଭୂମି କ୍ଷତିଗ୍ରସ୍ତ କରୁଛି । ପୁଣି କେତେବେଳେ ସମୁଦ୍ର ଲୁଣା ପାଣି ଚାଷ ଜମିକୁ ମାଡ଼ିଯାଉଛି । ବର୍ଷରେ ଥରେ ଦି ଥର ସାମୁଦ୍ରିକ ଝଡ଼ର ସାମ୍ନା କରୁଛନ୍ତି ରାଜ୍ୟର ଉପକୂଳ ବାସିନ୍ଦା । ଏହାର ସ୍ଥାୟୀ ପ୍ରତିକାର ଦିଗରେ ସରକାର ଚିନ୍ତା କରିବା ଆରମ୍ଭ କରିଛନ୍ତି । ଅମ୍ପାନ କ୍ଷୟକ୍ଷତି ଆକଳନ କରିବାକୁ ଆସିଥିବା କେନ୍ଦ୍ରୀୟ ଟିମ୍‌କୁ ରାଜ୍ୟ ସରକାର ୨୦ ହଜାର କୋଟି ଟଙ୍କାର ଏକ ସ୍ମାରକ ପତ୍ର ଦେଇଛନ୍ତି । ଏହାର ଆବଶ୍ୟକତା ରହିଛି ବୋଲି ବିଶେଷଜ୍ଞ ମତ ରଖିଥିବା ବେଳେ ବିଜେଡ଼ି କହିଛି ଦୀର୍ଘମିଆଦୀ ସମାଧାନ ଦିଗରେ ସରକାର କାମ କରୁଛନ୍ତି ।

Add Zee News as a Preferred Source

ସମୁଦ୍ର କୂଳେ କୂଳେ ହେବ ସୁଉଚ୍ଚ ପ୍ରାଚୀର, ଯେପରି ସମୁଦ୍ର ପାଣି ଚାଷଜମି କି ଗାଁ ଗଣ୍ଡାକୁ ପଶିବ ନାହିଁ । ସାମୁଦ୍ରିକ ଝଡ଼ରେ ବିଦ୍ୟୁତ କ୍ଷେତ୍ର ଅଧିକ ପ୍ରଭାବିତ ହେଉଥିବାରୁ ଏହାର ଭୂତଳ କେବୁଲିଙ୍ଗ କରିବା ଜରୁରୀ । ସେହିପରି ଉପକୂଳ ଓଡ଼ିଶାରେ ଥିବା ପ୍ରାୟ ଲକ୍ଷେ ୬୬ ହଜାର କଚ୍ଚାଘରକୁ ପକ୍କାଘରରେ ପରିଣତ କରିବା ଜରୁରୀ । ଯାହା ଫଳରେ ବାତ୍ୟା ବେଳେ କେହି ବେଘର ହେବେ ନାହିଁ ଏବଂ ପକ୍କାଘର ଗୁଡ଼ିକ ଆଶ୍ରୟ ସ୍ଥଳ ଭାବେ ବ୍ୟବହାର ହୋଇପାରିବ ।

ହେଲେ ଏତେବଡ଼ ଯୋଜନା ବାବଦରେ ସରକାର ସମସ୍ତଙ୍କ ସହ ଆଲୋଚନା କରିବା ଦରକାର ବୋଲି ବିଜେପି କହିଛି । ଅନ୍ୟପଟେ କଂଗ୍ରେସ କହିଛି, କେନ୍ଦ୍ର ସରକାରଙ୍କ ପାଇଁ ୨୦ ହଜାର କୋଟି ଟଙ୍କା କିଛି ବଡ଼ ରାଶି ନୁହେଁ, ବର୍ଷକୁ ୫୦ହଜାର କୋଟି ଟଙ୍କାର ରାଜସ୍ୱ ଦେଉଛି ଓଡ଼ିଶା । ଓଡ଼ିଶାବାସୀଙ୍କୁ କେନ୍ଦ୍ର ବିଜେପି ସରକାର ଭଲ ପାଉଛି ବୋଲି ସବୁବେଳେ କହୁଥିବାରୁ ଏହି ଅନୁଦାନ ମିଳିବା ନେଇ ବିଳମ୍ବ ହେବ ନାହିଁ ବୋଲି କଂଗ୍ରେସ କହିଛି ।

ଅମ୍ପାନ କ୍ଷୟକ୍ଷତି ଆକଳନ କରିବାକୁ କେନ୍ଦ୍ରର ଏକ ୭ଜଣିଆ ଟିମ୍ ଆସି କ୍ଷତିଗ୍ରସ୍ତ ଅଞ୍ଚଳ ବୁଲିବା ପରେ ମୁଖ୍ୟ ଶାସନ ସଚିବ ଓ ଅନ୍ୟ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଥିଲେ । ଦୁଇ ସପ୍ତାହ ମଧ୍ୟରେ ରାଜ୍ୟ ସରକାର ବିଧିବଦ୍ଧ ଭାବେ କ୍ଷୟକ୍ଷତିର ବିସ୍ତୃତ ରିପୋର୍ଟ କେନ୍ଦ୍ର ସରକାରଙ୍କୁ ଦେବେ ।