ଖୋଲା ଆକାଶ ତଳେ ମାଣମାଣ ଧାନ, ଚିନ୍ତାରେ ଚାଷୀ

ମଣ୍ଡିରେ ବିକ୍ରି ହେଉନି ଧାନ, ଚାଷୀ ହେଉଛନ୍ତି ଶୋଷଣର ଶିକାର

ଅଶୋକ ମିଶ୍ର, ମାଲକାନଗିରି: ବର୍ଷ ତମାମ ବିଲରେ ଖଟି ଧାନ ଫସଲ ଅମଳ କରିଛି ଚାଷୀ । ମାତ୍ର ଏବେ ଧାନ ବିକ୍ରି ହୋଇପାରୁନାହିଁ । ଖୋଲା ଆକାଶ ତଳେ ପଡ଼ିରହିଛି ଚାଷୀର ମାଣମାଣ ଧାନ । ମାଲକାନଗିରି ଜିଲ୍ଲା କୋରୁକୋଣ୍ଡା ଧାନ ମଣ୍ଡିରେ ଅବ୍ୟବସ୍ଥା ଯୋଗୁ ଶତାଧିକ ଚାଷୀ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । ରାଜ୍ୟର ବିଭିନ୍ନ ସ୍ଥାନରେ ଆରମ୍ଭ ହୋଇଛି ଧାନ କିଣା ପ୍ରକ୍ରିୟା । ମାତ୍ର ଅନେକ ସ୍ଥାନରେ ଧାନ ବିକ୍ରି ତଥା ଟୋକନ ପାଇବାରେ ଅବହେଳାର ଶିକାର ହେଉଛି ଚାଷୀ । କୋରୁକୋଣ୍ଡା ଧାନ ମଣ୍ଡିରେ ସପ୍ତାହରୁ ଊର୍ଦ୍ଧ୍ଵ ଦିନ ହେବ ଧାନ ଆଣି ରଖିଛନ୍ତି ଚାଷୀ । ଦୀର୍ଘ ଦିନ ବିତିଯାଇଥିଲେ ମଧ୍ୟ ସେମାନଙ୍କୁ ଟୋକନ ମିଳୁନାହିଁ । ଟୋକନ ମିଳିନଥିବାରୁ ଧାନ ବିକିପାରୁନାହିଁ ଚାଷୀ ।
ସରକାରଙ୍କ ନୂତନ ଧାନ କିଣା ନିୟମ ଏବଂ ସରକାରୀସ୍ତରରେ ଅବହେଳାକୁ ଦାୟୀ କରିଛନ୍ତି ଚାଷୀକୂଳ । ଧାନମଣ୍ଡିରେ ଚାଷୀ କ୍ୱିଣ୍ଟାଲ କ୍ୱିଣ୍ଟାଲ ଧାନ ଗଦା କରିଛି, ହେଲେ ଦୀର୍ଘ ଦିନ ବିତିଯାଇଥିଲେ ମଧ୍ୟ ଧାନ ବିକ୍ରି ହେଉନାହିଁ । ଯାହାଫଳରେ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଏହାର ପ୍ରତିବାଦରେ କୋରୁକୋଣ୍ଡା ଠାରେ ଚାଷୀ ମାନେ ରାସ୍ତା ରୋକ କରିଥିଲେ ।

ବର୍ଷ ତମାମ ଚାଷୀ ନିଜ ମୁଣ୍ଡ ଝାଳ ତୁଣ୍ଡରେ ମାରି ବିଲରେ ଚାଷକରି  ଧାନ ଫସଲ ଅମଳ କରିଛି । ଧାର କରଜ ଏବଂ ଋଣ କରି ଚାଷ କରିଥିଲା ଚାଷୀ । ମାତ୍ର ଧାନ ବିକ୍ରି ହେଉନଥିବାରୁ ଏବେ ଚାଷୀ ଚିନ୍ତାରେ ପଡ଼ିଯାଇଛି । ସରକାରଙ୍କ ନୂତନ ଟୋକନ ଯୋଜନା ଏବଂ ଧାନ କିଣା ନିୟମ ଅନୁଯାୟୀ ବର୍ତ୍ତମାନ ଚାଷୀ ନାନା ଅସୁବିଧାର ସମ୍ମୁଖୀନ ହେଉଛନ୍ତି । ଜିଲ୍ଲାର କୋରୁକୋଣ୍ଡା ମଣ୍ଡିରେ ଚାଷୀ ଏକ ସପ୍ତାହ ରୁ ଊର୍ଦ୍ଧ୍ଵ ସମୟ ଧରି ଧାନ ଆଣି ରଖିଥିବା ବେଳେ ସେମାନଙ୍କ ଠାରୁ ଧାନ କିଣା ଯାଉନାହିଁ । କେବଳ ସେତିକି ନୁହେଁ ବ୍ଲକର ୮୮୬ ଜଣ ଚାଷୀଙ୍କୁ ବର୍ତ୍ତମାନ ସୁଧା ଟୋକନ ମଧ୍ୟ ମିଳିନାହିଁ ।

ଅନେକ ଚାଷୀ ଜଳକର ଦେଇ ଚାଷ କରୁଥିବା ବେଳେ ସେମାନଙ୍କ ଜମିକୁ ଅଣଜଳସେଚିତ ଜମି ଦର୍ଶାଇ   ଫସଲ ବିକ୍ରି ନିମନ୍ତେ ଟାର୍ଗେଟ କମ୍ ଦିଆଯାଇଛି । ଏଭଳି ସମସ୍ୟା ପାଇଁ ଚାଷୀ ହତାସ ହୋଇପଡ଼ିଛନ୍ତି ।  ପୂର୍ବରୁ କୋରୁକୋଣ୍ଡା ରାସ୍ତା ଅବରୋଧ କରିଥିଲେ ।
ସରକାରୀ ସ୍ତରରେ ନାମ ପଞ୍ଜୀକରଣ ନିମନ୍ତେ ସମୟ ଶେଷ ହୋଇଯାଇଥିବା ହେତୁ  ଚାଷୀଙ୍କ ନାମ ପଞ୍ଜୀକରଣ କରି ହେଉନାହିଁ ବୋଲି କୋରୁକୋଣ୍ଡା ଲ୍ଯାମ୍ପ ଅଧିକାରୀ କହିଛନ୍ତି । ପୁନର୍ବାର ପଞ୍ଜୀକରଣ ପ୍ରକ୍ରିୟା ଆରମ୍ଭ ହେଲେ ସମସ୍ତ ଚାଷୀଙ୍କୁ ପଞ୍ଜିକୃତ କରାଯାଇ ଧାନ କିଣାଯିବ ବୋଲି ସେ ମତ ରଖିଛନ୍ତି ।

ଧାନକିଣା ଆରମ୍ଭରୁ ହିଁ ଚାଷୀଙ୍କ ମଧ୍ୟରେ ଧାନ ବିକାକୁ ନେଇ ଉତ୍ତେଜନା ସୃଷ୍ଟି ହୋଇଛି । କ୍ରମଶଃ ଏହି ସମସ୍ୟା ବଢିବାରେ ଲାଗିଥିବା ବେଳେ ଏଥିପ୍ରତି ସରକାର  ଦୃଷ୍ଟି ଦେଇ ତୁରନ୍ତ ଉଚିତ ପଦକ୍ଷେପ ନେବାକୁ ।