ରାଜଧାନୀରେ କୁନି କଳାକାରଙ୍କ ମେଳି, ହାତରେ ସୃଜନଶୀଳତାର ସ୍ପର୍ଶ

ପ୍ଲାଷ୍ଟିକ ବ୍ୟବହାର କରି କୁନି ଶିଶୁ ତିଆରି କଲେ ବିଭିନ୍ନ ଜିନିଷ

ଶାନ୍ତସ୍ୱରୂପ ରାଉତ, ଭୁବନେଶ୍ୱର: କୁନି ହାତରେ ସୃଜନଶୀଳତାର ସ୍ପର୍ଶ । ଶିଶୁ ଦିବସ ଅବସରରେ ରାଜ୍ୟ ଗଣଶିକ୍ଷା ବିଭାଗ ପକ୍ଷରୁ ଆୟୋଜିତ ରାଜ୍ୟ ସ୍ତରୀୟ ଶିଶୁ ମହୋସ୍ତ୍ରବ ‘ସୁରଭି’ କାର୍ଯ୍ୟକ୍ରମରେ ଦେଖିବାକୁ ମିଳିଛି କୁନି ଛାତ୍ରଛାତ୍ରୀଙ୍କ ପ୍ରତିଭା । ଭୁବନେଶ୍ୱର ୟୁନିଟ ୯ ସରକାରୀ ଉଚ୍ଚ ବିଦ୍ୟାଳୟରେ ଆୟୋଜିତ ଏହି ମହୋତ୍ସବରେ ରାଜ୍ୟର ସମସ୍ତ ୩୦ ଜିଲ୍ଲାର ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀ ଯୋଗ ଦେଇଥିବା ବେଳେ ମାଟି, ବିଭିନ୍ନ ବର୍ଜ୍ୟବସ୍ତୁ ଓ କାଗଜକୁ ବ୍ୟବହାର କରି ପ୍ରସ୍ତୁତ କରିଛନ୍ତି ଘରକରଣା ଓ ସାଜସଜ୍ଜା ସାମଗ୍ରୀ । ଯାହା ଅତି ସୁନ୍ଦର ଓ ମନୋରମ ।

ମାଟିରେ ତିଆରି ଫୁଲ, ପଶୁ, ପକ୍ଷୀ, ଗଛ, ଲତା, କଣ୍ଢେଇ, ମାଠିଆ, ସୁରେଇ, ଘରକରଣା ଓ ସାଜସଜ୍ଜା ସାମଗ୍ରୀ ପ୍ରସ୍ତୁତ କରିଛନ୍ତି କୁନି କଳାକାରମାନେ । ସୁରଭି କାର୍ଯ୍ୟକ୍ରମରେ ଯୋଗ ଦେଇଥିବା ଶତାଧିକ ଶିଶୁ ମାନେ ଏସବୁ ପ୍ରସ୍ତୁତ କରି ସେମାନଙ୍କ ଅନ୍ତର୍ନିହିତ କଳାର ପ୍ରତିପାଦନ କରିଛନ୍ତି । ପ୍ରଶିକ୍ଷକଙ୍କ ଠାରୁ କେଇ କ୍ଷଣ ତାଲିମ ନେଇ ମାଟିକୁ ବ୍ୟବହାର କରି ରଙ୍ଗ ଦେଇ ସୁନ୍ଦର ମୃଣ୍ମୟୀ କଳାକୃତି ମାନ ପ୍ରସ୍ତୁତ କରିଛନ୍ତି । ସେହିପରି ବର୍ଜ୍ୟବସ୍ତୁକୁ ବ୍ୟବହାର କରି ସୃଜନକଳାର ପ୍ରତିଭା ଦେଖାଇଛନ୍ତି କିଛି ଛାତ୍ରଛାତ୍ରୀ । ବିଭିନ୍ନ ପ୍ରକାର କାଗଜ ଓ କ୍ଷୀର ପ୍ୟାକେଟ ଜରି, ଚା କପ୍, ଆଇସକ୍ରିମ୍ କାଠି ଆଦି ଅବ୍ୟବହୃତ ପଦାର୍ଥକୁ ବ୍ୟବହାର କରି ଛତୁ, ଛତା, ଚେୟାର, ଟେବୁଲ, ମୟୂର ଆଦି ପ୍ରସ୍ତୁତ କରିଛନ୍ତି । ଆଉ ଏକ କୃତି ଭାବେ କାଗଜ ଭାଙ୍ଗ ଓ କଣ୍ଢେଇ ନାଚର ମଜା ନେଇଛନ୍ତି କୁନି କୁନି ଛାତ୍ରଛାତ୍ରୀ । ବିଭିନ୍ନ ରଙ୍ଗ ବେରଙ୍ଗର କାଗଜକୁ କାଟି ଭାଙ୍ଗ ଦେଇ ସେଥିରେ ଆକର୍ଷଣୀୟ ଚିତ୍ର ଓ ମନଲୋଭା ସାଜସଜ୍ଜା ସାମଗ୍ରୀ ପ୍ରସ୍ତୁତ କରିଛନ୍ତି ଏହି କୁନି କଳାକାର ମାନେ ।

ତେବେ ନଭେମ୍ବର ୧୪ ତାରିଖରୁ ଆରମ୍ଭ ହୋଇଥିବା ଏହି ମହୋତ୍ସବ ୧୬ ତାରିଖ ସଂଧ୍ୟାରେ ଉଦଯାପିତ ହୋଇଥିବା ବେଳେ ଏଥିରୁ ପ୍ରଶିକ୍ଷଣ ନେଇଥିବା ବିଭନ୍ନ କଳାର ଅନୁଭୂତିକୁ ବିଦ୍ୟାଳୟ ଫେରିବା ପରେ ସେମାନଙ୍କ ସହପାଠୀ ଓ ଘରେ ବାଣ୍ଟିବା ସହ କାମରେ ଲଗାଇବେ ବୋଲି ମତ ଦେଇଛନ୍ତି ଛାତ୍ରଛାତ୍ରୀ ।