ଠାକରେ ନିବାସରେ 'ମୋ ବିଧାୟକ ମୋ ମୁଖ୍ୟମନ୍ତ୍ରୀ'

ମୁମ୍ବାଇରେ ଥିବା ମାତୋଶ୍ରୀ(ଠାକରେ ନିବାସ)ରେ ''ମୋ ବିଧାୟକ ମୋ ମୁଖ୍ୟମନ୍ତ୍ରୀ'' ପୋଷ୍ଟର ।

ନୂଆଦିଲ୍ଲୀ: ବିଜେପି ଏବଂ ଶିବସେନା ଭିତରେ ଲାଗି ରହିଛି କ୍ଷମତା ଯୁଦ୍ଧ । ମୁଖ୍ୟମନ୍ତ୍ରୀ ପଦ ନେଇ ଶିବସେନାର ୫୦/୫୦ ଫର୍ମୁଲାକୁ ବିଜେପି ଗ୍ରହଣ କରିବାକୁ ନାରାଜ । ପୁଅ ଆଦିତ୍ୟ ଠାକରେଙ୍କୁ ମୁଖ୍ୟମନ୍ତ୍ରୀ କରିବାକୁ ଚାହୁଁଛନ୍ତି ଶିବସେନା ମୁଖ୍ୟ ଉଦ୍ଧବ ଠାକରେ । ଆଜି ଠାକରେ ନିବାସ ବାହାର ପାର୍ଶ୍ୱରେ ଲାଗିଛି ଆଦିତ୍ୟ ଠାକରେ ମୁଖ୍ୟମନ୍ତ୍ରୀ ହେବା ନେଇ  ଏକ ପୋଷ୍ଟର । ଯାହାକି ଚର୍ଚ୍ଚାର ଶିରୋନାମା ପାଲଟିଛି । 

ମହାରାଷ୍ଟ୍ର ମୁମ୍ବାଇରେ ଥିବା ମାତୋଶ୍ରୀ(ଠାକରେ ନିବାସ)ରେ ଲାଗିଥିବା ଏହି ପୋଷ୍ଟରରେ ''ମୋ ବିଧାୟକ ମୋ ମୁଖ୍ୟମନ୍ତ୍ରୀ'' ଲେଖାହୋଇଛି । ଯେଉଁଥିରେ ଶିବସେନା ପ୍ରତିଷ୍ଠାତା ସ୍ୱର୍ଗତ ବାଲ ଠାକରେ, ଦଳର ମୁଖ୍ୟ ଉଦ୍ଧବ ଠାକରେ ଏବଂ ଆଦିତ୍ୟ ଠାକରେଙ୍କ ଫଟୋ ରହିଛି । ଏହି ପୋଷ୍ଟରଟି ସ୍ଥାନୀୟ ନଗରପାଳ ହଜି ହଲିମ ଖାନଙ୍କ ପକ୍ଷରୁ ଲଗାଯାଇଥିବା ଦାବି କରାଯାଇଛି । ସେପଟେ ଏହାରି ଭିତରେ ଗତକାଲି ଦିଲ୍ଲୀ ଦରବାରରେ ପହଞ୍ଚିଥିଲା ମହାରାଷ୍ଟ୍ର କ୍ଷମତା ଯୁଦ୍ଧ । କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଥିଲେ ଏନସିପି ମୁଖ୍ୟ ଶରତ ପାୱାର । ଶିବସେନାକୁ ସମର୍ଥନ ଦିଆଯିବ ନା ନାହିଁ ସେନେଇ ଉଭୟଙ୍କ ମଧ୍ୟରେ ବିଶଦ ଆଲୋଚନା ହୋଇଥିବା କୁହାଯାଉଛି । 

Maharashtra: A poster with a picture of Shiv Sena leader Aditya Thackeray, with 'My MLA My Chief Minister' written on it, put up outside Matoshree (Thackeray residence), in Mumbai. The poster has been allegedly put up by Shiv Sena corporator Haji Halim Khan. pic.twitter.com/wYjdMsZOKL

— ANI (@ANI) November 4, 2019

ସୋନିଆଙ୍କୁ ସାକ୍ଷାତ କରିବା ପରେ ଶରଦ ପାୱାର କହିଥିଲେ, କଂଗ୍ରେସ ଓ ଏନସିପି ଆଗାମୀ ଦିନରେ ମହାରାଷ୍ଟ୍ରରେ କେଉଁ ଭଳି କାର୍ଯ୍ୟ କରିବେ ସେ ବିଷୟରେ ଆଲୋଚନା ହୋଇଛି । ମୁମ୍ବାଇ କଂଗ୍ରେସ ଓ ଏନ୍‌ସିପି ନେତାମାନେ ଏ ସମ୍ପର୍କରେ ବିସ୍ତୃତ ଆଲୋଚନା କରିବେ। କଂଗ୍ରେସ ନେତୃବୃନ୍ଦ ଯେ କୌଣସି ନିଷ୍ପତ୍ତି ନେବା ପୂର୍ବରୁ ପୁଣିଥରେ ସବୁ କିଛି ବିଚାର କରିବେ ବୋଲି ଆଶା ରଖିଥିବା କହିଥିଲେ ଶରଦ । 

ଅନ୍ୟପଟେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କୁ ଭେଟିଥିଲେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ । ଯଦିଓ ଚାଷୀ ସମସ୍ୟା ନେଇ ଉଭୟଙ୍କ ମଧ୍ୟରେ ଆଲୋଚନା ହୋଇଥିବା ଫଡନାଭିସ କହିଥିଲେ,  ତଥାପି ମଧ୍ୟ ସରକାର ଗଠନ ରଣନୀତି ନେଇ ଉଭୟଙ୍କ ମଧ୍ୟରେ ଆଲୋଚନା ହୋଇଥିବା କୁହାଯାଉଛି । 

ମହାରାଷ୍ଟ୍ର ବିଧାନସଭାର ୨୮୮ଟି ଆସନରୁ ବିଜେପି ୧୦୫ଟି, ଶିବସେନା ୫୬, କଂଗ୍ରେସ ୪୪, ଏନସିପି ୫୪ ଓ ଅନ୍ୟାନ୍ୟ ଦଳ ୨୯ଟି ଆସନରେ ଜିତିଛନ୍ତି । ମ୍ୟାଜିକ ନମ୍ୱର ୧୪୫ ରହିଛି। ଯଦି ଶିବସେନାକୁ ଏନସିପି-କଂଗ୍ରେସ ମେଣ୍ଟ ସମର୍ଥନ କରିବ ତାହେଲେ ଦଳ ସରକାର ଗଢ଼ିପାରିବ ।