ଚାଲିଛି ପିକନିକ୍ ଟାଇମ୍, ଆସ ବୁଲିଯିବା ଗୁଦଗୁଦା ଜଳପ୍ରପାତ

ପ୍ରକାଶ ଶର୍ମା,କୁଚିଣ୍ଡା: ଚାଲିଛି ଶୀତ ଋତୁ । ଶୀତ ଋତୁରେ ନୂଆନୂଆ ପର୍ଯ୍ୟଟନସ୍ଥଳ ବୁଲିଯିବା ସହ ବଣ ଭୋଜି କରିବାକୁ ସମସ୍ତେ ଭଲ ପାଆନ୍ତି । ଥଣ୍ଡା ପାଗରେ ବୁଲିବାର ମଜା ନିଆରା । ଯଦି ଝରଣା, ପାହାଡ ଓ ଘଞ୍ଚ ଜଙ୍ଗଲରେ ପିକନିକ୍ ହୁଏ ତେବେ କଥା ସରିଲା । ପ୍ରାକୃତିକ ଶୋଭାରାଜିକୁ ଭଲ କରି ଉପଭୋଗ କରିବା ସହ ନିଜକୁ ହଜାଇ ଦେବାକୁ ସମସ୍ତେ ଭଲ ପାଉଛନ୍ତି ।  

ଏମିତି ଏକ ପର୍ଯ୍ୟଟନସ୍ଥଳୀ ମଧ୍ୟରେ ଅନ୍ୟତମ ହେଉଛି ପ୍ରାକୃତିକ ସୌନ୍ଦର୍ଯ୍ୟ ଭରା ଗୁଦଗୁଦା ଜଳପ୍ରପାତ । ସମ୍ବଲପୁର ଜିଲ୍ଲା କୁଚିଣ୍ଡା ବ୍ଲକର ବଡବାହାଲ ଗାଁ ନିକଟରେ ରହିଛି ଗୁଦଗୁଦା ଜଳପ୍ରପାତ । ଏହା ଇକୋ ପର୍ଯ୍ୟଟନ ହେବା ପରେ ଏହାର ବିକାଶ ନେଇ ଉପଯୁକ୍ତ ଦୃଷ୍ଟି ଦିଆଯାଇ ଥିବାରୁ ଗୁଦଗୁଦାର ସୌନ୍ଦର୍ଯ୍ୟ ଆହୁରି ବଢିଯାଇଛି । ବହୁ ଦୂରଦୁରାନ୍ତରୁ  ଆସୁଥିବା ପର୍ଯ୍ୟଟକ ଏଠାକୁ  ଆସି ଜଳପ୍ରପାତରେ ଗାଧୋଇବା ସହ ଏହାର ପ୍ରାକୃତିକ ଶୋଭାକୁ ମନଭରି ଉପଭୋଗ କରୁଛି । ରାଜ୍ୟ ତଥା ରାଜ୍ୟ ବାହାରର ପର୍ଯ୍ୟଟକ  ପରିବାର ଓ ସାଙ୍ଗସାଥୀଙ୍କ ଏଠାକୁ ଆସି  ବଣଭୋଜିର ମଜା ନେଉଥିବା ଦେଖିବାକୁ ମିଳିଛି । ଆସନ୍ତୁ ଜାଣିବା ଗୁଦଗୁଦା ଜଳପ୍ରପାତ ସମ୍ପର୍କରେ କିଛି ତଥ୍ୟ ।

ପ୍ରାକୃତିକ ସୌନ୍ଦର୍ଯ୍ୟ ଭରା ଏହି ଜଳପ୍ରପାତ  ଖଜୁରିଆ ରିଜର୍ଭ ଜଙ୍ଗଲ ମଧ୍ୟରେ ରହିଛି । ସୁଉଚ୍ଚ ପାହଡରୁ ପଥର ଉପରେ କଚାଡି ହୋଇ ପଡୁଥିବା ଝରଣାର ଶବ୍ଦ ପର୍ଯ୍ୟଟକଙ୍କୁ ଆକୃଷ୍ଟ କରୁଛି । ଗୁଦଗୁଦାଜଳ ପ୍ରପାତରେ ୭ଟି କୁଣ୍ଡ ଥିବାରୁ ଏହାକୁ ସପ୍ତଗଙ୍ଗା ମଧ୍ୟ କହନ୍ତି ।  ଜଳ ପ୍ରପାତର ୭ ଟି କୁଣ୍ଡ ମଧ୍ୟରୁ ତିନୋଟି  ଦେଖାଯାଉଥିବା ବେଲେ ୪ଟି ଦେଖାଯାଏନାହିଁ । ଏଠାରେ ବଣଭୋଜିର କରିବା ପାଇଁ  ନଭେମ୍ବର ରୁ ଫେବୃଆରୀ ମାସ ପର୍ଯ୍ୟନ୍ତ  ପର୍ଯ୍ୟଟକଙ୍କ ଭିଡ ଜମେ । ରାଜ୍ୟ ତଥା ପଡୋଶୀ ରାଜ୍ୟ ରୁ ହଜାର ହଜାର ପର୍ଯ୍ୟଟକ ଏଠାକୁ ବଣଭୋଜି ପାଇଁ ଆସିଥାନ୍ତି । ଏଠାରେ ବଣ ଭୋଜି ପାଇଁ ପିଣ୍ଡି ନିର୍ମାଣ କରାଯାଇଛି । ତାସହ  ଜଳ ପ୍ରପାତର ଗୋଟିଏ ପାର୍ଶ୍ୱରୁ ଅପର ପାର୍ଶ୍ୱକୁ ଯିବା ପାଇଁ ଏକ ପୋଲ ନିର୍ମାଣ ହୋଇଛି ।  ଏହି ପୋଲ ସହ ଝରଣା  ପାଖରେ ଠିଆ ହୋଇ ଫଟୋ ଉତ୍ତୋଳନ କରିବାକୁ କେହି ଭୁଲୁ ନାହାନ୍ତି ।  ମହିଳା ପର୍ଯ୍ୟଟକଙ୍କ ପାଇଁ  ମଧ୍ୟ ଶୌଚାଳୟ ରହିଛି । ଫଳରେ ଦୂରଦୂରାନ୍ତରୁ ଆସୁଥିବା ପର୍ଯ୍ୟଟକ ସୁବିଧାରେ ବଲାବୁଲି କରିପାରୁଛନ୍ତି ।

ପ୍ରାକୃତିକ ଶୋଭାରାଜିରେ ଭରପୁର  ଗୁଦଗୁଦା ଜଳପ୍ରପାତ ଉପରକୁ ପାହାଚ ନିର୍ମାଣ ହୋଇନଥିବା ଯୋଗୁଁ ପର୍ଯ୍ୟଟକ ବିପଦ ଅବସ୍ଥାରେ ଉପରକୁ ଚଢୁଛନ୍ତି । ଏଠାରେ ପର୍ଯ୍ୟଟକଙ୍କ  ମନୋରଞ୍ଜନ ପାଇଁ ଫରେଷ୍ଟ ପାର୍କ ଓ ରାତ୍ର ରହଣି ପାଇଁ ଏକ ଗେଷ୍ଟ ହାଉସ ନିର୍ମାଣ  କରାଗଲେ ଗୁଦଗୁଦା ଜଳପ୍ରପାତର ସୌନ୍ଦର୍ଯ୍ୟ ଦୁଇଗୁଣିତ ହୁଅନ୍ତା ବୋଲି ପର୍ଯ୍ୟଟକ କହିଛନ୍ତି ।