ଲଗାଣ ବର୍ଷାରେ ଭାଙ୍ଗିଗଲା ପୋଲ, ଜନଜୀବନ ଅସ୍ତବ୍ୟସ୍ତ

ଲଗାମବର୍ଷାରେ ଧୋଇ ଗଲା ପୋଲ

ଲଗାଣ ବର୍ଷାରେ ଭାଙ୍ଗିଗଲା ପୋଲ। ବହୁ ଅସୁବିଧାରେ ଲୋକମାନେ ଯାତାୟତ କରୁଛନ୍ତି । ଗ୍ରାମକୁ ଆସିପାରୁନାହିଁ ଜରୁରୀ କାଳୀନ ସେବା ଗାଡି । ବାରମ୍ବାର ଅଭିଯୋଗ ହେଉଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନାହିଁ  । 

ଭାଙ୍ଗି ଯାଇଛି  ମଠ ସାହି ଗାଁ ରାସ୍ତାରେ ଥିବା ଘାଗରା ନାଳ ଉପରେ ନର୍ମିତ ପୋଲ । ଯାତାୟାତରେ ସମସ୍ୟା ଭୋଗୁଛନ୍ତି ୨ଖଣ୍ଡ ଗାଁର ଲୋକେ । ନିମ୍ନମାନର କାମ ଯୋଗୁ ପୋଲ ଭାଙ୍ଗିଥିବା ଅଭିଯୋଗ ହୋଇଛି । ଏ ହେଉଛି କେନ୍ଦୁଝର ଜିଲ୍ଲା ଆନନ୍ଦପୁର ବ୍ଲକ ମଠ ସାହି ଗାଁକୁ ଯିବା ପାଇଁ ଏକମାତ୍ର ରାସ୍ତା ।  ରାସ୍ତାରେ ରହିଛି ଘାଗରା ନାଳ । ଚଳିତ ବର୍ଷ ଲଗାଣ ବର୍ଷାରେ ନାଳ ଉପରେ ନିର୍ମାଣ ହୋଇଥିବା ପୋଲଟି ଭାଙ୍ଗି ଯାଇଛି । ଫଳରେ ଭଙ୍ଗା ଦଦରା ରାସ୍ତା ଉପରେ ନିର୍ଭର କରୁଥିବା ୨ଟି ଗାଁର ଶତାଧିକ ଲୋକେ  ବର୍ଷା ଦିନେ ନାହିଁନଥିବା ଅସୁବିଧା ଭୋଗୁଛନ୍ତି । ଗ୍ରାମବାସୀଙ୍କ ଦୀର୍ଘଦିନର ଦାବି ପରେ ନାଳ ଉପରେ ପୋଲ ନିର୍ମାଣ କରାଯାଇଥିଲା । ହେଲେ ନିମ୍ନମାନର କାମ ଯୋଗୁ ପୋଲଟି ଭାଙ୍ଗି ଯାଇଛି  । ପୋଲ କାମ ଚାଲିଥିବା ବେଳେ ଯନ୍ତ୍ରୀ ସଠିକ ତଦାରଖ କରିନଥିବା ଅଭିଯୋଗ ହୋଇଛି  । ଏପରିକି   ଠିକାଦାରଙ୍କ ଲାଭଖୋର ମନୋଭାବ ପୋଲ ଭାଙ୍ଗିବାର ମୁଖ୍ୟ କାରଣ ବୋଲି  ଗ୍ରାମବାସୀ ଅଭିଯୋଗ କରିଛନ୍ତି । ପୋଲ ଭାଙ୍ଗି ଯିବାରୁ ଗାଁକୁ ଆମ୍ୱୁଲାନ୍ସ ଆସିପାରୁନି । ଆଉ ଯାତାୟାତରେ ସମସ୍ୟା ଭୋଗୁଛନ୍ତି ଲୋକେ ।
ପୋଲର ମରାମତି ପାଇଁ ଅଞ୍ଚଳବାସୀ ଦାବି କରିଥିବା ବେଳେ ଏପର୍ଯ୍ୟନ୍ତ କିଛି ସୁଫଳ ମିଳିନାହିଁ । ସେପଟେ ଘଟଣା ସମ୍ପର୍କରେ ଜିଲ୍ଲାର ଜିଲ୍ଲା ପ୍ରଶାସନ ଅବଗତ ନ ଥିବା ଜଣାପଡ଼ିଛି । ଗଣମାଧ୍ୟମ ଠାରୁ ଜାଣିବା ପରେ ତୁରନ୍ତ ସମସ୍ୟାର ସମାଧାନ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ।