ଅମିତ ଶାହଙ୍କୁ ଦେଖା କରିପାରନ୍ତି ଶାହୀନବାଗ ମହିଳା ଆନ୍ଦୋଳନକାରୀ

ରବିବାର ସାକ୍ଷାତ ନେଇ ସୂଚନା: ସୂତ୍ର

ନୂଆଦିଲ୍ଲୀ: ସମାପ୍ତ ହେବ ଶାହୀନବାଗ ଆନ୍ଦୋଳନ ! ଦୀର୍ଘ ୨ ମାସ ହେଲା ଚାଲିଥିବା ଆନ୍ଦୋଳନରେ ପଡ଼ିବ ପୁନଚ୍ଛେଦ ! ଖୁବଶୀଘ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ଭେଟିପାରନ୍ତି ଶାହୀନବାଗ ମହିଳା ପ୍ରଦର୍ଶନକାରୀ । ଆସନ୍ତା ରବିବାର ଏହି ସାକ୍ଷାତ ହେବ ବୋଲି ସୂତ୍ରରୁ ଖବର ମିଳିଛି । ସିଏଏ ଓ ଏନଆରସିକୁ ବିରୋଧକରି ଏହି ଆନ୍ଦୋଳନ ଚାଲିଛି । 

ମିଳିଥିବା ସୂଚନା ମୁତାବକ, ଏହି ସାକ୍ଷାତ ଅମିତ ଶାହଙ୍କ ଘରେ କିମ୍ବା ଅଫିସରେ ହୋଇପାରେ । ତେବେ ଏଭଳି କିଛି ସାକ୍ଷାତ ହେବା ନେଇ ସ୍ଥାନୀୟ ପୋଲିସ ମଧ୍ୟ କୌଣସି ସୂଚନା ଦେଇନି । କୁହାଯାଉଛି, ସ୍ୱରାଷ୍ଟ୍ର ମନ୍ତ୍ରୀଙ୍କୁ ଭେଟିବା ନିଷ୍ପତ୍ତିକୁ ନେଇ ଆନ୍ଦୋଳନକାରୀଙ୍କ ମଧ୍ୟରେ ଫାଟ ସୃଷ୍ଟି ହୋଇଛି । ଗୋଟିଏ ଗୋଷ୍ଠୀ ଏହାକୁ ସମର୍ଥନ କରୁଥିବା ବେଳେ ଅନ୍ୟ ଗୋଷ୍ଠୀ ବିରୋଧ କରୁଛନ୍ତି । 

ଏବେ ସମଗ୍ର ଦେଶରେ ଶାହୀନବାଗ ବିରୋଧ ପ୍ରଦର୍ଶନ ଚର୍ଚ୍ଚାର ବିଷୟ ପାଲଟିଛି । ଏଠୁ ପ୍ରଭାବିତ ହୋଇ ଦେଶର ବିଭିନ୍ନ ସହରରେ ମଧ୍ୟ ବିରୋଧ ପ୍ରଦର୍ଶନ ହୋଇଛି । ଦିଲ୍ଲୀ ବିଧାନସଭା ନିର୍ବାଚନ ବେଳେ ରାଜନୈତିକ ଦଳଗୁଡ଼ିକ ପାଇଁ ଶାହୀନବାଗ ଏକ ନିର୍ବାଚନୀ ମୁଦ୍ଦା ପାଲଟିଥିଲା ।