ରାହୁଲ ଗାନ୍ଧୀଙ୍କ Breakfast Meeting; ଏକାଠି ହେଲେ ୧୪ ବିରୋଧି, ମୁହଁ ମୋଡିଲେ AAP-BSP

ନୂଆଦିଲ୍ଲୀ: ସଂସଦର ମୌସୁମୀ ଅଧିବେଶନରେ ସରକାର ଏବଂ ବିରୋଧୀଙ୍କ ମଧ୍ୟରେ ଉତ୍ତେଜନା ଲାଗି ରହିଛି। ଏହି ସମୟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ବିରୋଧୀ ଦଳ ବିରୋଧୀ ଏକତାକୁ ମଜବୁତ କରିବାକୁ ଚେଷ୍ଟା କରୁଛନ୍ତି। ରାହୁଲ ବିରୋଧୀ ଦଳମାନଙ୍କୁ ଜଳଖିଆ ପାଇଁ ନିମନ୍ତ୍ରଣ କରିଛନ୍ତି ଏବଂ ୧୪ ଜଣ ବିରୋଧୀ ଦଳର ନେତା ତାଙ୍କ 'ଜଳଖିଆ ରାଜନୀତି'ରେ ଯୋଗ ଦେଇଛନ୍ତି।

ଦିଲ୍ଲୀର ସମ୍ବିଧାନ କ୍ଲବରେ ରାହୁଲ ଗାନ୍ଧୀଙ୍କ ଦ୍ୱାରା ଆୟୋଜିତ ଜଳଖିଆ ବୈଠକରେ କଂଗ୍ରେସ ସମେତ ୧୪ଟି ଦଳର ନେତା ଯୋଗ ଦେଇଥିଲେ। ତୃଣମୂଳ କଂଗ୍ରେସ, ରାଷ୍ଟ୍ରୀୟ ଜନତା ଦଳ, ଶିବସେନା, ସମାଜବାଦି ପାର୍ଟି, NCP, CPM, CPI, IUML, RSP, KCM, NC, JMM ଏବଂ DMK ନେତାମାନେ ଏକତ୍ରୀତ ହୋଇଥିଲେ। କିନ୍ତୁ ମାୟାବତୀଙ୍କ BSP ଓ ଅରବିନ୍ଦ କେଜ୍ରିୱାଲଙ୍କ AAP ଏହି ବୈଠକରୁ ନିଜକୁ ଦୂରେଇ ରଖିଥିଲେ। ରାହୁଲଙ୍କ ବୈଠକରେ AAP ଏବଂ BSP ନେତାମାନେ ଯୋଗ ଦେଇନଥିଲେ।

ରାହୁଲ ଗାନ୍ଧୀଙ୍କ 'ଜଳଖିଆ ବୈଠକ'ରେ ଉତ୍ତରରୁ ଦକ୍ଷିଣର ମିଶ୍ରଣ ଦେଖିବାକୁ ମିଳିଥିଲା। ଏହି ବୈଠକରେ ଉତ୍ତର ଭାରତରୁ ଦକ୍ଷିଣ ଭାରତ ପର୍ଯ୍ୟନ୍ତ ନେତାମାନେ ଯୋଗ ଦେଇଥିଲେ ଏବଂ ସେହିଭଳି ଜଳଖିଆ ବ୍ୟବସ୍ଥା ମଧ୍ୟ କରାଯାଇଥିଲା। ଜଳଖିଆ ମେନୁରେ ଛୋଲେ-ଭଟୁରେ, ଉପମା, ଇଡଲି, ସ୍ୟାଣ୍ଡୱିଚ୍, ୱଡା-ସାମ୍ବର ଅନ୍ତର୍ଭୁକ୍ତ କରାଯାଇଥିଲା। ତେବେ ବୈଠକରେ ଖାଇବା ପିଇବା ସହ ପ୍ରଧାନମନ୍ତ୍ରୀ ମୋଦିଙ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କରାଯାଇଥିବା ସୂତ୍ରରୁ ସୂଚନା ମିଳିଛି।