 "Elephant attack: ଢେଙ୍କାନାଳରେ ହାତୀ ଆତଙ୍କ, ପାଦରେ ଦଳି ନେଲା ଜୀବନ")
ଢେଙ୍କାନାଳ: ଗଁଦିଆ ଥାନା ଅନ୍ତର୍ଗତ ନେଉଳପୋଇ ଅଞ୍ଚଳରେ ଆଜି ଦନ୍ତା ହାତୀ ଆତଙ୍କ ଦେଖିବାକୁ ମିଳିଛି । ବିରିଖୁଣ୍ଟି ଗାଁର ଜଣେ ବ୍ୟକ୍ତିଙ୍କୁ ହାତୀ ଆକ୍ରମଣ କରିବା ଫଳରେ ତାଙ୍କର ଜୀବନ ଯାଇଥିବା ସୂଚନା ମିଳିଛି ।
ଖବର ମୁତାବକ, ବିପିନ ମହାନ୍ତି ନାମକ ଜଣେ ବ୍ୟକ୍ତି କର୍ମସ୍ଥଳୀରୁ ଘରକୁ ଫେରୁଥିବା ସମୟରେ ହଠାତ ଏକ ହାତୀ ହାବୁଡରେ ପଡିଯାଇଥିଲେ । ନେଉଳପୁର ଯୋରନ୍ଦା ରାସ୍ତାରେ ହାତୀଟି ବିପିନଙ୍କୁ ଅତର୍କିତ ଆକ୍ରମଣ କରିଥିଲା । ତଳେ କଚାଡିବା ସହିତ ବିପିନଙ୍କ ଛାତି ଏବଂ ମୁହଁକୁ ପାଦରେ ଦଳିଦେବାରୁ ଘଟଣାସ୍ଥଳରେ ବିପିନଙ୍କ ଜୀବନ ଯାଇଥିଲା ।
ବିପିନଙ୍କ ମୃତ୍ୟୁ ପରେ ସ୍ଥାନିୟ ଲୋକେ ଘଟଣାସ୍ଥଳରେ ରୁଣ୍ଡ ହେବା ସହ ସେଠାରେ ଉତ୍ତେଜନା ପରିସ୍ଥିତି ଦେଖିବାକୁ ମିଳିଥିଲା । ଗୋଟିଏ ଦିନ ପୂର୍ବରୁ ହାତୀ ଆକ୍ରମଣରେ ଜଣଙ୍କର ଜୀବନ ଯାଇଥିବାବେଳେ ଆଜିର ଏହି ଘଟଣା ଲୋକଙ୍କ ମନରେ ଛନକା ପସାଇଛି । ଗତକାଲି ହରଡବେରେଣା ଗାଁର ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିଲା । ଆଜିର ଘଟଣା ପରେ ବନ ବିଭାଗକୁ ଲୋକେ ସୂଚନା ଦେଇଛନ୍ତି । ତୁରନ୍ତ ଦନ୍ତାହାତୀକୁ ସ୍ଥାନିୟ ଅଞ୍ଚଳରୁ ଘଉଡାଇବା ପାଇଁ ଦାବି ହୋଇଛି ।
)