ନକ୍ସଲଙ୍କ ଲ୍ୟାଣ୍ଡମାଇନ ବିସ୍ଫୋରଣ, ୧ ମୃତ

Landmine Blast: ମାଲକାଲଗିରି ସୀମାନ୍ତ ଛତିଶଗଡର ବିଜାପୁର ଜିଲ୍ଲାରେ ନକ୍ସଲଙ୍କ ଲ୍ୟାଣ୍ଡମାଇନ ବିସ୍ଫୋରଣରେ ୧୦ ବର୍ଷର ନାବାଳକର ମୃତ୍ୟୁ ହୋଇଛି । ମୁଦାଭେଣ୍ଡି ଓ ପେଡ଼ିଆ ମଧ୍ୟରେ ଏହି ଘଟଣା ଘଟିଛି । ମୃତ ନାବାଳକର ନାମ ହିଡ଼ମା କବାସୀ ବୋଲି ସୂଚନା ମିଳିଛି । ପିଲାଟି ଏକ ଜଙ୍ଗଲ ରାସ୍ତାରେ ଘରକୁ ଫେରୁଥିବା ସମୟରେ ଲ୍ୟାଣ୍ଡମାଇନ ବିସ୍ଫୋରଣର ଶିକାର ହୋଇଥିଲା ।

ଲ୍ୟାଣ୍ଡମାଇନ ବିସ୍ଫୋରଣ ପରେ ୨୨୨ ସିଆରପିଏଫ ବାଟାଲିନୟର ଯବାନମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ପିଲାଟିକୁ ଉଦ୍ଧାର କରି ବିଜାପୁର ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ତାର ପ୍ରାଣବାୟୁ ଉଡିଯାଇଥିଲା । ନାବାଳକଟିର ଗୋଡ ଏବଂ ହାତରେ ଗଭୀର ଆଘାତ ଲାଗିଥିବାରୁ ପ୍ରବଳ ରକ୍ତସ୍ରାବ ହୋଇଥିଲା ।

ଯବାନମାନଙ୍କୁ ଟାର୍ଗେଟ କରି ଜଙ୍ଗଲିଆ ରାସ୍ତାରେ ଲ୍ୟାଣ୍ଡମାଇନ ଲଗାଇଥିଲେ ନକ୍ସଲ । ନକ୍ସଲଙ୍କ ଏପରି କାର୍ଯ୍ୟକଳାପକୁ ଜନସାଧାରଣ ଅତ୍ୟନ୍ତ ନିନ୍ଦା କରିଛନ୍ତି । ଲ୍ୟାଣ୍ଡମାଇନ ବିସ୍ଫୋରଣ ପରେ ଘଟଣାସ୍ଥଳରେ ସୁରକ୍ଷାକର୍ମୀ ପହଞ୍ଚି ସର୍ଚ୍ଚ ଅପରେସନକୁ ଜୋରଦାର କରିଛନ୍ତି ।