Pakistan History: କାହିଁକି ଭାରତର ଗୋଟିଏ ଦିନ ପୂର୍ବରୁ ପାକିସ୍ତାନ ପାଳିଥାଏ ସ୍ୱାଧୀନତା ଦିବସ ?

Pakistan History: ଆସନ୍ତାକାଲି ଭାରତ ୭୭ ତମ ସ୍ୱାଧୀନତା ଦିବସ ପାଳନ କରିବାକୁ ପ୍ରସ୍ତୁତ ହେଉଥିବାବେଳେ ପାକିସ୍ତାନ(Pakistan)ଆଜି ଏହାକୁ ପାଳନ କରୁଛି। ଉଭୟ ଦେଶର ସ୍ୱାଧୀନତାର କାହାଣୀ ବେଶ୍ ଜଣାଶୁଣା, କିନ୍ତୁ ଆପଣ ଜାଣନ୍ତି କି ୧୯୪୭ରେ ପ୍ରକୃତରେ କ’ଣ ଘଟିଥିଲା ​​।ଭାରତୀୟ ସ୍ୱାଧୀନତା ଅଧିନିୟମ ସ୍ୱାକ୍ଷରିତ ହେଲା, ଯାହା ଦ୍ୱାରା ୧୫ ଅଗଷ୍ଟରେ(August 15) ଭାରତରୁ ଅଲଗା ହୋଇ ପାକିସ୍ତାନ ଏକ ସ୍ୱତନ୍ତ୍ର ଦେଶରେ ପରିଣତ ହେଲା। ତେବେ ଏହା କେତେକଙ୍କ ପାଇଁ ଏକ ପଜଲ୍ ହୋଇ ରହିଛି ଯେ ଉଭୟ ଦେଶର ସ୍ୱାଧୀନତାର ଆଇନଗତ ଆଧାର ୧୫  ଅଗଷ୍ଟ ସତ୍ତ୍ୱେ ଭାରତର ଗୋଟିଏ ଦିନ ପୂର୍ବରୁ ପାକିସ୍ତାନ କାହିଁକି ନିଜର ସ୍ୱାଧୀନତା ଦିବସ ପାଳନ କରିଥାଏ ?

ଭାରତୀୟ ସ୍ୱାଧୀନତା ଅଧିନିୟମ ଅନୁଯାୟୀ, 'ଅଗଷ୍ଟ ପନ୍ଦର ତାରିଖ  ୧୯୪୭ ମସିହା ଠାରୁ ଭାରତରେ ଦୁଇଟି ସ୍ୱାଧୀନତା ଡୋମିନିଅନ୍ ପ୍ରତିଷ୍ଠା ହୋଇଥିଲା, ଯାହା ଯଥାକ୍ରମେ ଭାରତ ଏବଂ ପାକିସ୍ଥାନ ଭାବରେ ଜଣାଶୁଣା।'

ପାକିସ୍ତାନର ପ୍ରତିଷ୍ଠାତା ମହମ୍ମଦ ଅଲି ଜିନ୍ନା ତାଙ୍କ ରେଡିଓ ବାର୍ତ୍ତାରେ ଅଗଷ୍ଟ ୧୫କୁ ପାକିସ୍ତାନର ସ୍ୱାଧୀନତା ଦିବସ(Independence Day) ବୋଲି ଘୋଷଣା କରିଥିଲେ। ସେ କହିଥିଲେ, 'ଅଗଷ୍ଟ ୧୫ ହେଉଛି ପାକିସ୍ତାନର ସ୍ୱାଧୀନତା ତଥା ସାର୍ବଭୌମ ରାଷ୍ଟ୍ରର ଜନ୍ମଦିନ। ଏହା ମୁସଲମାନ ରାଷ୍ଟ୍ରର ଭାଗ୍ୟ ପୂରଣର ପ୍ରତୀକ ଯାହାକି ଗତ କିଛି ବର୍ଷ ମଧ୍ୟରେ ନିଜର ମାତୃଭୂମିକୁ ଫେରି ପାଇବା ପାଇଁ ଅନେକ ବଳିଦାନ ଦେଇଛି।

ପାକିସ୍ତାନର ସ୍ୱାଧୀନତା ଦିବସ ତାରିଖ ଉପରେ ଭିନ୍ନ ମତ-

ଅନେକ ପ୍ରମାଣ ଅଛି ଯେ ପାକିସ୍ତାନ ସେହି ରାତିରେ ନିଜର ପରିଚୟ ପାଇଥିଲେ ଯେଉଁ ଦିନ ଭାରତ ସ୍ୱାଧୀନତା ଲାଭ କରିଥିଲା। ତେବେ ପଡୋଶୀ ଦେଶ ଅଗଷ୍ଟ ୧୪ ତାରିଖରେ କାହିଁକି ଏହାର ସ୍ୱାଧୀନତା ପାଳନ କରେ? ବର୍ଷ ବର୍ଷ ଧରି, ଏହି ପ୍ରଶ୍ନର ଉତ୍ତର ଦେବାକୁ ଅନେକ ତତ୍ତ୍ୱ ଉଭା ହୋଇଛି ।

ଏକ ଧାରଣା ଅନୁସାରେ ଏହାକୁ ଲର୍ଡ ମାଉଣ୍ଟବ୍ୟାଟେନ୍, ଭାରତର ଶେଷ ବ୍ରିଟିଶ୍ ଭାଇସରଏ ଏବଂ ଭାରତର ପ୍ରଥମ ଗଭର୍ଣ୍ଣର-ଜେନେରାଲ୍ ସହିତ ଜୋଡ଼ାଯାଏ ତେବେ ଜୁନ୍ ୧୯୪୮ ପୂର୍ବରୁ ଶକ୍ତି ହସ୍ତାନ୍ତର ଯୋଜନା କରାଯାଇଥିଲା ।ତେବେ ଉଭୟ ଭାରତ ଏବଂ ପାକିସ୍ତାନ ପାଇଁ ଅଗଷ୍ଟ ୧୫ ତାରିଖକୁ ସ୍ୱାଧୀନତା ଦିବସ ଭାବେ ଘୋଷଣା କରିବାକୁ ଲର୍ଡ ମାଉଣ୍ଟବ୍ୟାଟେନ୍ ନିଷ୍ପତ୍ତି ନେଇଥିଲେ। ସେ ଅଗଷ୍ଟ ୧୪, ୧୯୪୭ ରେ କରାଚି ଯାଇ ମହମ୍ମଦ ଅଲି ଜିନ୍ନାଙ୍କୁ ପାକିସ୍ତାନର ଶାସନ ହସ୍ତାନ୍ତର କରିଥିଲେ।

ଅନ୍ୟ ଏକ ମତ ହେଉଛି ଯେ ଏହି ନିଷ୍ପତ୍ତି ପାଇଁ ଶ୍ରେୟ କ୍ୟାବିନେଟ୍ ବୈଠକକୁ ଯାଉଛି। ବାସ୍ତବରେ ଜୁନ୍ ୧୯୪୮ରେ, ପାକିସ୍ତାନର ପ୍ରଥମ ପ୍ରଧାନମନ୍ତ୍ରୀ ଲିଆକୁଟ୍ ଅଲି ଖାନଙ୍କ ନେତୃତ୍ୱରେ ଏକ କ୍ୟାବିନେଟ୍ ବୈଠକରେ ପାକିସ୍ତାନ ଭାରତ ପୂର୍ବରୁ ଏହାର ସ୍ୱାଧୀନତା ଦିବସ ପାଳନ କରିବାକୁ ପରାମର୍ଶ ଦିଆଯାଇଥିଲା। ଜିନ୍ନା ଏହି ପ୍ରସ୍ତାବକୁ ଗ୍ରହଣ କରିଥିଲେ ଏବଂ ଅଗଷ୍ଟ ୧୪ରେ ତାରିଖ ସ୍ଥିର କରାଯାଇଥିଲା।

ଦର୍ଶାଯାଇଥିବା ଅନ୍ୟ ଏକ କାରଣ ହେଉଛି ସମୟ ପାର୍ଥକ୍ୟ ଇଣ୍ଡିଆନ୍ ଷ୍ଟାଣ୍ଡାର୍ଡ ଟାଇମ୍ (IST) ପାକିସ୍ତାନ ଷ୍ଟାଣ୍ଡାର୍ଡ ଟାଇମ୍ (PST) ଠାରୁ ୩୦ ମିନିଟ୍ ଆଗରେ ଅଛି ।ଯେହେତୁ ଭାରତ ଅଗଷ୍ଟ ୧୫ରେ 00:00 ରେ ସ୍ୱାଧୀନତା ପାଇଥିଲା, ଅଗଷ୍ଟ ୧୪ରେ ପାକିସ୍ତାନରେ ସ୍ଥାନୀୟ ସମୟ 11:30 ଥିଲା, ଯେଉଁଥିପାଇଁ ସେଠାରେ ଗୋଟିଏ ଦିନ ପୂର୍ବରୁ ପାଳନ କରିବାକୁ ନିଷ୍ପତ୍ତି ନିଆଯାଇଥିଲା।