Russian Politics: ଦଳ ଠାରୁ ଦୂରେଇ ସ୍ୱାଧୀନ ଭାବେ ନିର୍ବାଚନ ଲଢୁଛନ୍ତି ଭ୍ଲାଦିମିର ପୁତିନ; କ'ଣ ହେବ ଫଳାଫଳ?

Russian Politics: ଆସନ୍ତା ବର୍ଷ ମାର୍ଚ୍ଚ ମାସରେ ହେବାକୁ ଯାଉଥିବା ଋଷିଆ ରାଷ୍ଟ୍ରପତି ନିର୍ବାଚନରେ ନିଜ ଦଳ ୟୁନାଇଟେଡ୍ ଋଷିଆ ଠାରୁ ଦୂରେଇ ସ୍ୱାଧୀନ ଭାବେ ନିର୍ବାଚନ ଲଢୁଛନ୍ତି ଭ୍ଲାଦିମିର ପୁତିନ।

Russian Presidential Election 2024: ପ୍ରାୟ ୨୩ ବର୍ଷ ଧରି ଋଷିଆ ରାଷ୍ଟ୍ରପତି ଆସନରେ ବସିଛନ୍ତି ଭ୍ଲାଦିମିର ପୁତିନ। ତାଙ୍କୁ ଛାଡ଼ି ଋଷିଆ ରାଷ୍ଟ୍ରପତି ଆସନରେ ବର୍ତ୍ତମାନ ପର୍ଯ୍ୟନ୍ତ କେହି ବସିପାରି ନାହାଁନ୍ତି। ଆସନ୍ତା ବର୍ଷ ଋଷିଆରେ ଅନୁଷ୍ଠିତ ହେବାକୁ ଯାଉଛି ରାଷ୍ଟ୍ରପତି ନିର୍ବାଚନ। ଯାହାକୁ ନେଇ ଆରମ୍ଭ ହୋଇଯାଇଛି ଚର୍ଚ୍ଚା। ୨୦୨୪ ଋଷିଆ ରାଷ୍ଟ୍ରପତି ନିର୍ବାଚନରେ ​​ଭ୍ଲାଦିମିର ପୁତିନ ନିଜ ଦଳ ୟୁନାଇଟେଡ଼ ଋଷିଆ ଠାରୁ ଦୂରରେ ରହି ଜଣେ ସ୍ୱାଧୀନ ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି। ଯଦିଓ ଏହା ମଧ୍ୟ ପ୍ରାୟ ନିଶ୍ଚିତ ଯେ ଋଷିଆ ରାଷ୍ଟ୍ରପତି ଆସନ ଭ୍ଲାଦିମିର ପୁତିନଙ୍କ ନିୟନ୍ତ୍ରଣରେ ରହିବ। 

ଶନିବାର ଋଷିଆ ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ସମର୍ଥକ ତାଙ୍କୁ ୨୦୨୪ ରାଷ୍ଟ୍ରପତି ନିର୍ବାଚନରେ ​​ଭାଗ ନେବାକୁ ଜଣେ ସ୍ୱାଧୀନ ପ୍ରାର୍ଥୀ ଭାବେ ମନୋନୀତ କରିଛନ୍ତି। ସରକାରୀ ନ୍ୟୁଜ ଏଜେନ୍ସି ଏ ସମ୍ପର୍କରେ ଜଣାଇଛି। ଋଷୀୟ ନିର୍ବାଚନ ଆଇନ ଅନୁଯାୟୀ କୌଣସି ଦଳର ଟିକେଟ୍ ନେଇ ନିର୍ବାଚନ ଲଢୁଥିବା ବ୍ୟକ୍ତିଙ୍କ ପାଇଁ ଅତି କମରେ ୫୦୦ ସମର୍ଥକଙ୍କ ଗୋଷ୍ଠୀ ଦ୍ୱାରା ନାମାଙ୍କନ କରିବା ବାଧ୍ୟତାମୂଳକ। ସ୍ୱାଧିନ ପ୍ରାର୍ଥୀଙ୍କ ପାଇଁ ଅତିକମରେ ୩ ଲକ୍ଷ  ଲୋକଙ୍କ ଦସ୍ତଖତ ସଂଗ୍ରହ କରିବା ମଧ୍ୟ ଆବଶ୍ୟକ।

ଭ୍ଲାଦିମିର ପୁତିନଙ୍କୁ ମନୋନୀତ କରୁଥିବା ଗୋଷ୍ଠୀରେ ଶାସକ ୟୁନାଇଟେଡ୍ ଋଷିଆ ଦଳର ବରିଷ୍ଠ ପଦାଧିକାରୀ, ଋଷୀୟ ଅଭିନେତା ତଥା ଗାୟକ, ଆଥଲେଟ୍ ଏବଂ ଅନ୍ୟାନ୍ୟ ସେଲିବ୍ରିଟି ପ୍ରମୁଖ ସାମିଲ ଅଛନ୍ତି। ଋଷିଆ ରାଷ୍ଟ୍ରପତି ଭ୍ଲାଦିମିର ପୁତିନ ୨୦୨୪ ରାଷ୍ଟ୍ରପତି ନିର୍ବାଚନରେ ଜଣେ ସ୍ୱାଧୀନ ପ୍ରାର୍ଥୀ ରୂପେ ନିର୍ବାଚନ ଲଢିବେ ବୋଲି ଡିସେମ୍ବର ୧୬ ତାରିଖ ଶନିବାର ସ୍ଥାନୀୟ ନ୍ୟୁଜ ଏଜେନ୍ସି ପକ୍ଷରୁ କୁହାଯାଇଛି। କ୍ରୀଡା ତଥା ସଂସ୍କୃତିକ ଜଗତର ୭ ଶହରୁ ଅଧିକ ରାଜନେତା ଏବଂ ବ୍ୟକ୍ତି ବିଶେଷଙ୍କ ଏକ ପ୍ରତିନିଧିମଣ୍ଡଳୀ ରାଜଧାନୀ ମସ୍କୋ ଠାରେ ଭ୍ଲାଦିମିର ପୁତିନଙ୍କୁ ଭେଟି ଜଣେ ସ୍ୱାଧିନ ପ୍ରାର୍ଥୀ ଭାବେ ସର୍ବସମ୍ମତି କ୍ରମେ ସମର୍ଥନ ଜଣାଇଥିଲେ।

ଆସନ୍ତା ବର୍ଷ ମାର୍ଚ୍ଚ ମାସରେ ହେବାକୁ ଯାଉଥିବା ଋଷିଆ ରାଷ୍ଟ୍ରପତି ନିର୍ବାଚନରେ ​​ସେ ଆଉ ୬ ବର୍ଷର କାର୍ଯ୍ୟକାଳ ଲୋଡିବେ ବୋଲି ଭ୍ଲାଦିମିର ପୁତିନ ଚଳିତ ମାସ ଆରମ୍ଭରେ ଘୋଷଣା କରିଥିଲେ। ୟୁନାଇଟେଡ୍ ଋଷିଆ ଦଳର ଜଣେ ବରିଷ୍ଠ ଅଧିକାରୀ ଆଣ୍ଡ୍ରେଇ ତୁର୍କକ୍ ଆରଆଇ ନ୍ୟୁଜ୍ ଏଜେନ୍ସି ସହ କଥାବାର୍ତ୍ତା କରିବା ବେଳେ କହିଛନ୍ତି ଯେ ସ୍ୱାଧୀନ ପ୍ରାର୍ଥୀ ଭାବରେ ରାଷ୍ଟ୍ରପତି ଭାବରେ କାର୍ଯ୍ୟ କରିବା ସତ୍ତ୍ୱେ ଭ୍ଲାଦିମିର ପୁତିନଙ୍କୁ ଦଳର ସମ୍ପୂର୍ଣ୍ଣ ସମର୍ଥନ ରହିଛି। ଦେଶର ସବୁଠୁ ବଡ ଦଳ ଭାବରେ  ୨୦୨୨ ପର୍ଯ୍ୟନ୍ତ ଋଷୀୟ ସଂସଦ ନିମ୍ନ ସଦନ ଡୁମାର ମୋଟ ୪୫୦ ଆସନ ମଧ୍ୟରୁ ଶାସକ ୟୁନାଇଟେଡ୍ ଋଷିଆ ପାଖରେ ୩୨୫ ସିଟ୍ ରହିଛି। ଗତ ୨୦୦୭ ବର୍ଷରୁ ଡୁମାରେ ଭ୍ଲାଦିମିର ପୁତିନଙ୍କ ଦଳ ୟୁନାଇଟେଡ୍ ଋଷିଆ ପାଖରେ ସଂଖ୍ୟାଗରିଷ୍ଠତା ରହିଛି।

ଗତ ୧୯୯୯ ମସିହାରୁ ଋଷୀୟ ରାଷ୍ଟ୍ରପତି କିମ୍ବା ପ୍ରଧାନମନ୍ତ୍ରୀ ପଦ ଭାର ଗ୍ରହଣ କରି ଆସୁଛନ୍ତି ୭୧ ବର୍ଷୀୟ ଭ୍ଲାଦିମିର ପୁତିନ। ଗତ ୨୦୦୮ ବର୍ଷରେ ପ୍ରଧାନମନ୍ତ୍ରୀ ଦିମିତ୍ରୀ ମେଦବେଦେବଙ୍କ ସହ ରାଷ୍ଟ୍ରପତି ପଦ ବଦଳାଇଥିଲେ। ଏହା ପରେ ସେ ନିୟମ ବଦଳାଇଲେ ଯାହା କ୍ରମାଗତ ଭାବରେ ରାଷ୍ଟ୍ରପତିଙ୍କ ଆଦେଶକୁ ସୀମିତ କରିଦେଲା। ଗତ ୨୦୧୨ ବର୍ଷରୁ ଋଷିଆ ରାଷ୍ଟ୍ରପତି ଆସନରେ ବସିଛନ୍ତି ଭ୍ଲାଦିମିର ପୁତିନ। ଆସନ୍ତା ୨୦୨୩୬ ପର୍ଯ୍ୟନ୍ତ ସମ୍ଭବତଃ ଋଷିଆ ରାଷ୍ଟ୍ରାଧ୍ୟକ୍ଷ ଗାଦି ତାଙ୍କୁ ନିୟନ୍ତ୍ରଣରେ ରହିବ।