ಮಾದಕ ಜಾಲದ ವಿರುದ್ಧ ಪೊಲೀಸರ ಸಮರ: ದಾಖಲೆಯ 117 ಕೋಟಿ ರೂ. ಮೌಲ್ಯದ ಡ್ರಗ್ಸ್ ನಾಶ!

ಬೆಂಗಳೂರು: ಮಾದಕವಸ್ತು ಕಳ್ಳ ಸಾಗಾಣಿಕೆ ಜಾಲಕ್ಕೆ ಪೊಲೀಸರು ಸೆಡ್ಡು ಹೊಡೆದಿದ್ದಾರೆ. ಕಳೆದೊಂದು ವರ್ಷದಲ್ಲಿ 6 ಸಾವಿರಕ್ಕೂ ಹೆಚ್ಚು ಕೇಸ್ ಗಳಲ್ಲಿ 900ಕ್ಕೂ ಹೆಚ್ಚು ಡ್ರಗ್ ಪೆಡ್ಲರ್‍ಗಳನ್ನು ಜೈಲಿಗಟ್ಟಿದ್ದಾರೆ. ವಿಶ್ವ ಮಾದಕವಸ್ತು ಸೇವನೆ ಕಳ್ಳಸಾಗಾಣಿಕೆ ವಿರೋಧಿ ದಿನಾಚರಣೆ ಅಂಗವಾಗಿ ಕೋಟ್ಯಂತರ ರೂ. ಮೌಲ್ಯದ ಮಾದಕವಸ್ತುಗಳನ್ನು ನಾಶಪಡಿಸಿದ್ದಾರೆ.

ಈ ಮೂಲಕ ಮಾದಕ ದಂಧೆಗೆ ಬೆಂಗಳೂರು ಪೊಲೀಸರು ಬಿಸಿ ಮುಟ್ಟಿಸ್ತಿದ್ದಾರೆ. ಬೆಂಗಳೂರು ಪೊಲೀಸರೆಂದರೇ ಕಳ್ಳರು, ರೌಡಿಗಳು, ಸಮಾಜಘಾತುಕರು ಮಾತ್ರವಲ್ಲದೇ, ಡ್ರಗ್ ಪೆಡ್ಲರ್‌ಗಳು ಸಹ ಕೂತಲ್ಲೇ ನಡುಗುತ್ತಾರೆ‌. ಕಳೆದೊಂದು ವರ್ಷದಲ್ಲಿ ಬೆಂಗಳೂರು ಮಹಾನಗರದಲ್ಲಿ ಬರೋಬ್ಬರಿ 6,191 ಮಾದಕವಸ್ತು ಸೇವನೆ ಹಾಗೂ ಸಾಗಾಣಿಕೆ ಪ್ರಕರಣ ದಾಖಲಾಗಿದ್ದು, ಈ ಪೈಕಿ 159 ಮಂದಿ ವಿದೇಶಿ ಪ್ರಜೆಗಳು ಹಾಗೂ 7,882 ಮಂದಿಯನ್ನು ಜೈಲಿಗಟ್ಟಲಾಗಿದೆ.

ಕಳೆದೊಂದು ವರ್ಷದಲ್ಲಿ 117 ಕೋಟಿ ರೂ. ಬೆಲೆಬಾಳುವ 6,261 ಹೆಚ್ಚು ಕೆಜಿ ಗಾಂಜಾ, 2.5 ಕೆಜಿ ಆಷಿಶ್ ಆಯಿಲ್, 15 ಕೆಜಿ ಅಫೀಮು, 52 ಕೆಜಿ MDMA, ವಿವಿಧ ರೀತಿಯ 109 ಕೆಜಿ ಸಿಂಥೆಟಿಕ್ ಡ್ರಗ್ ಸೀಜ್ ಮಾಡಲಾಗಿದೆ. ಕಳೆದೊಂದು ವರ್ಷದಲ್ಲಿ ವಶಪಡಿಸಿಕೊಂಡಿರುವ 117 ಕೋಟಿ ರೂ. ಮೌಲ್ಯದ ಮಾದಕ ವಸ್ತುಗಳ ಪೈಕಿ ಕಳೆದ ಮಾರ್ಚ್‍ನಲ್ಲಿ 21 ಕೋಟಿ ರೂ. ಮೌಲ್ಯದ ಗಾಂಜಾ ಹಾಗೂ ಸಿಂಥೆಟಿಕ್ ಡ್ರಗ್ ನಾಶ ಮಾಡಲಾಗಿತ್ತು.

ಡ್ರಗ್ಸ್ ದಂಧೆ ಜೋರಾಗಿದ್ದು, ಮತ್ತಷ್ಟು ಚುರುಕಾಗಿ‌‌‌ ಕೆಲಸ ಮಾಡಬೇಕಿದೆ.