ಚಿತ್ರಮಂದಿರವನ್ನೇ ದೇಗುಲವಾಗಿಸಿದ ʼಕಾಂತಾರʼ : ರಿಷಬ್‌ ಶೆಟ್ಟಿ ರಣಗರ್ಜನೆಗೆ ಥಿಯೇಟರ್ಸ್‌ ಫುಲ್‌..!

ಬೆಂಗಳೂರು : ʼಕಾಂತಾರʼ ಭಾರತೀಯ ಚಿತ್ರರಂಗದಲ್ಲಿ ಹೊಸ ದಾಖಲೆ ಸೃಷ್ಟಿಸಲು ಸಿದ್ಧವಾದ ʼದಿ ಡಿವೈನ್‌ ಬ್ಲಾಕ್‌ಬಸ್ಟರ್‌ʼ ಸಿನಿಮಾ. ದಿನದಿಂದ ದಿನಕ್ಕೆ ಕಾಂತಾರದ ಮೇಲಿನ ಹೈಪ್‌ ಹೆಚ್ಚಾಗುತ್ತಲೇ ಇದೆ. ಕರಾವಳಿ ಸಂಸ್ಕೃತಿಯ ಅನಾವರಣದ ಜೊತೆ ಅದ್ಭುತ ಕಥಾಹಂದರ ಹೊಂದಿರುವ ಸಿನಿಮಾವನ್ನು ನೋಡಲು ಪ್ರೇಕ್ಷಕರು ಸಾಲುಗಟ್ಟಿ ಚಿತ್ರಮಂದಿರದ ಮುಂದೆ ನಿಲ್ಲುತ್ತಿದ್ದಾರೆ. ಅಲ್ಲದೆ, ಪ್ಯಾನ್‌ ಇಂಡಿಯಾ ಲೆವೆಲ್‌ನಲ್ಲಿ ಮಿಂಚಲು ರಿಷಬ್‌ ಶೆಟ್ಟಿ ಸಿನಿಮಾ ರೆಡಿಯಾಗಿದ್ದು, ಹಿಂದಿ ಟ್ರೈಲರ್‌ ಕೂಡ ಬಿಡುಗಡೆಗೆ ಸಿದ್ಧವಾಗಿದೆ. 

ಹೌದು.. ʼಕಾಂತಾರʼ ಈ ಸಿನಿಮಾದ ಹೆಸರು ಗೊತ್ತಿಲ್ಲ ಎನ್ನುವ ಕನ್ನಡಿಗರಿಲ್ಲ. ಕರುನಾಡಿನ ಮೂಲೆ ಮೂಲೆಯಲ್ಲೂ ಕಾಂತಾರ ಹಬ್ಬುತ್ತಿದೆ. ಅದ್ಭುತ ನಟನೆ ಜೊತೆಗೆ ನಿರ್ದೇಶನ ಮಾಡಿ ರಿಷಬ್‌ ಶೆಟ್ಟಿ ಅವರು ಸೈ ಎನಿಸಿಕೊಂಡಿದ್ದಾರೆ. ಎಲ್ಲಿನೋಡಿದರೂ ಕಾಂತಾರ.. ಕಾಂತಾರ...! ಚಿಕ್ಕಮಕ್ಕಳಿಂದ ಹಿಡಿದು ವಯೋವೃದ್ಧರವರೆಗೂ ನೋಡಲೇ ಬೇಕು ಎಂದು ಕಾತುರತೆಯಿಂದ ಟಿಕೆಟ್‌ಗಾಗಿ ಥಿಯೇಟರ್‌ ಮುಂದೆ ನಿಂತರೂ ಹೌಸ್‌ ಫುಲ್‌ ಬೋರ್ಡ್‌ ಅವರನ್ನು ನಿರಾಸೆಗೊಳಿಸುತ್ತಿದೆ. ಆದರೂ, ಸಿನಿಮಾ ಅವರ ಆಸೆಯನ್ನು ಇಮ್ಮಡಿಗೊಳಿಸುತ್ತಿದೆ.

ಇದನ್ನೂ ಓದಿ: ವಿಪರೀತ ರಾಜಯೋಗ ರೂಪಿಸುತ್ತಿರುವ ಶನಿದೇವ, ಮೂರು ರಾಶಿಯವರಿಗೆ ನೀಡಲಿದ್ದಾನೆ ಯಶಸ್ಸು

ದಿ ಡಿವೈನ್‌ ಬ್ಲಾಕ್‌ಬಸ್ಟರ್‌ ಕಾಂತಾರ ಸಿನಿಮಾ ಬುಕ್‌ ಮೈ ಶೋನಲ್ಲಿ ದಾಖಲೆ ಸೃಷ್ಟಿಸಿದ್ದು, ಈವರೆಗೆ (ಅ.7) 33 ಸಾವಿರಕ್ಕೂ ಅಧಿಕ ಜನರು ವೋಟ್​ ಮಾಡಿದ್ದಾರೆ. ಶೇಕಡ 99ರಷ್ಟು ರೇಟಿಂಗ್​ ಪಡೆಯುವಲ್ಲಿ ಕಾಂತಾರ ಯಶಸ್ವಿವಾಗಿದೆ. ಅಲ್ಲದೆ, ಕರುನಾಡಿನ ಕುವರನ ಈ ಸಿನಿಮಾಗೆ ದೇಶಾದ್ಯಂತ ಭಾರಿ ಬೇಡಿಕೆ ಶುರುವಾಗಿದ್ದು, ಹಿಂದಿಯಲ್ಲೂ ಕೂಡ ಕಾಂತಾರ ಧೂಳೆಬ್ಬಿಸಲು ಸಿದ್ಧವಾಗುತ್ತಿದೆ. ಇನ್ನು ಈ ಸಿನಿಮಾ ನೋಡಿದ ಗಣ್ಯರು, ನಿರ್ದೇಶಕರು, ರಾಜಕೀಯ ಧುರೀಣರು ಕಾಂತಾರವನ್ನು ಬಾಯಿತುಂಬಾ ಹಾಡಿ ಹೊಗಳಿದ್ದಾರೆ.