ಜಗತ್ತಿನ ಅತೀ ಎತ್ತರದ ಕಟ್ಟಡ `ಬುರ್ಜ್ ಖಲೀಫಾ` ಮೇಲೆ ಕನ್ನಡದ ಕೀರ್ತಿ ಪತಾಕೆ..!

ಬೆಂಗಳೂರು: ಕಿಚ್ಚ ಸುದೀಪ್ ಅವರ ಬಹುನಿರೀಕ್ಷಿತ ಬಹುಭಾಷಾ ಚಿತ್ರ ವಿಕ್ರಾಂತ್ ರೋಣ ಶೀರ್ಷಿಕೆ ಲೋಗೋ ಮತ್ತು ಟೀಸರ್ ನ್ನು ದುಬೈನ ಬುರ್ಜ್ ಖಲೀಫಾದಲ್ಲಿ ಬಿಡುಗಡೆ ಮಾಡಲಾಗಿದೆ.ಆ ಮೂಲಕ ವಿಶ್ವದಲ್ಲೇ ಈ ಸಾಧನೆ ಮಾಡಿರುವ ಮೊದಲ ಚಿತ್ರ ಹಾಗೂ ನಟ ಎನ್ನುವ ಹೆಗ್ಗಳಿಕೆಗೆ ಸುದೀಪ್ ಹಾಗೂ ಅವರ ಚಿತ್ರ ಪಾತ್ರವಾಗಿದೆ.

ಈಗ ಚಿತ್ರದ ಲೋಗೋ ಬುರ್ಜ್ ಕಲಿಫಾ ಮೇಲೆ ಬಿತ್ತರಿಸಿರುವ ವೀಡಿಯೋವನ್ನು ಕಿಚ್ಚ ಸುದೀಪ್ (kichcha sudeep) ತಮ್ಮ ಸಾಮಾಜಿಕ ಮಾಧ್ಯಮಗಳ ವೇದಿಕೆಯಲ್ಲಿ ಹಂಚಿಕೊಂಡಿದ್ದಾರೆ "ಈ ವೀಡಿಯೊವನ್ನು ವೈಯಕ್ತಿಕವಾಗಿ ನನಗೆ ಕಳುಹಿಸಿದ್ದಕ್ಕಾಗಿ ಧನ್ಯವಾದಗಳು ಬುರ್ಜ್ ಖಲೀಫಾ. ನಮಗೆ ತುಂಬಾ ಚೆನ್ನಾಗಿ ಆತಿಥ್ಯ ನೀಡಿದ್ದಕ್ಕಾಗಿ ಧನ್ಯವಾದಗಳು ದುಬೈ. ತುಂಬಾ ಇಷ್ಟವಾಯಿತು. ಅದೇ ರೀತಿಯ ಎಚ್ಡಿ ವಿಡಿಯೋವನ್ನು ನಾಳೆ ಪೋಸ್ಟ್ ಮಾಡಲಾಗುವುದು, ಎಲ್ಲರಿಗೂ ಧನ್ಯವಾದಗಳು' ಎಂದು ಅವರು ಬರೆದುಕೊಂಡಿದ್ದಾರೆ.

ಇನ್ನೊಂದೆಡೆಗೆ ಕಿಚ್ಚ ಸುದೀಪ್ ಮಾತನಾಡಿ "ಈ ಚಿತ್ರವನ್ನು ಸಿನಿಮೀಯವಾಗಿ ಸದಭಿರುಚಿಯ ರೀತಿಯಲ್ಲಿ ಕ್ಯಾನ್ವಾಸ್ ಮಾಡುವ ಬೃಹತ್ ಕಾರ್ಯಕ್ಕೆ ಚಿತ್ರದ ನಿರ್ಮಾಪಕರು ಮುಂದಾಗಿದ್ದಾರೆ ಎಂಬುದು ನಂಬಲಾಗದ ಸಂಗತಿ. ಭಾರತೀಯ ಚಲನಚಿತ್ರವೊಂದು ವಿಶ್ವಾದ್ಯಂತ ಇಂತಹ ಅಭೂತಪೂರ್ವ ಗೋಚರತೆಯನ್ನು ಪಡೆಯುವ ಸಾಕ್ಷಿಯ ಬಗ್ಗೆ ನಾನು ತುಂಬಾ ಉತ್ಸುಕನಾಗಿದ್ದೇನೆ" ಎಂದು ಹೇಳಿದ್ದಾರೆ.