High BP: ನಿಮ್ಮ ಈ ಅಭ್ಯಾಸಗಳೇ ಅಧಿಕ ರಕ್ತದೊತ್ತಡ ಸಮಸ್ಯೆಗೆ ಪ್ರಮುಖ ಕಾರಣಗಳು!

High Blood Pressure: ಇತ್ತೀಚಿನ ದಿನಗಳಲ್ಲಿ ಅಧಿಕ ರಕ್ತದೊತ್ತಡ ಹೆಚ್ಚಿನ ಜನರನ್ನು ಬಾಧಿಸುತ್ತಿರುವ ಸಾಮಾನ್ಯ ಸಮಸ್ಯೆ. ರಕ್ತದೊತ್ತಡ ಹೆಚ್ಚಾಗಲು ನಾನಾ ಕಾರಣಗಳಿವೆ. ಆದರೆ, ಈ ಬಗ್ಗೆ ನಿಗಾವಹಿಸದಿದ್ದರೆ ಇದು ಮಾರಣಾಂತಿಕವಾಗಿಯೂ ಪರಿಣಮಿಸಬಹುದು. 

ವಾಸ್ತವವಾಗಿ, ರಕ್ತದೊತ್ತಡ (Blood Pressure) ಸಮಸ್ಯೆಗೆ ವೇಗದ ಜೀವನಶೈಲಿ ಒಂದು ಕಾರಣವಾದರೆ, ನಮ್ಮ ಕೆಲವು ಕೆಟ್ಟ ಅಭ್ಯಾಸಗಳು ಮತ್ತೊಂದು ಪ್ರಮುಖ ಕಾರಣವಾಗಿದೆ. ಹಾಗಾಗಿಯೇ, ಇತ್ತೀಚಿನ ದಿನಗಳಲ್ಲಿ ಅತಿ ಸಣ್ಣ ವಯಸ್ಸಿನ ಯುವಕ-ಯುವತಿಯರಲ್ಲೂ ಬಿಪಿ ಸಮಸ್ಯೆ ಕಾಣಿಸಿಕೊಳ್ಳುತ್ತಿದೆ.  

ಹೈ ಬಿಪಿ ಲಕ್ಷಣಗಳು (High BP Symptoms): 
ಅಧಿಕ ರಕ್ತದೊತ್ತಡವನ್ನು (High Blood Pressure) ಗುರುತಿಸಲು ಯಾವುದೇ ನಿರ್ದಿಷ್ಟ ಲಕ್ಷಣಗಳು ಇರುವುದಿಲ್ಲವಾದರೂ, ತಲೆನೋವು, ಅತಿಯಾದ ಉದ್ವೇಗ, ಎದೆನೋವು ಅಥವಾ ಎದೆ ಭಾರ, ಉಸಿರಾಟದ ತೊಂದರೆ, ಹೆಚ್ಚು ಗಾಬರಿಗೊಳಗಾಗುವುದು, ಕೈ-ಕಾಲುಗಳಲ್ಲಿ ದೌರ್ಬಲ್ಯ ಇವೆಲ್ಲವೂ ಕೂಡ ಅದರ ಪ್ರಾರಂಭಿಕ ಲಕ್ಷಣಗಳು ಎಂತಲೇ ಹೇಳಲಾಗುತ್ತದೆ. 

ಇದನ್ನೂ ಓದಿ- ದೇಸಿ ತುಪ್ಪದ ಸೇವನೆಯು ಈ ಜನರಿಗೆ ಅಪಾಯಕಾರಿ..!

ಹೈ ಬಿಪಿ ಸಮಸ್ಯೆಗೆ ಕಾರಣಗಳು (Causes Of High BP Problem): 
ಮೊದಲೇ ಉಲ್ಲೇಖಿಸಿದಂತೆ ಅಧಿಕ ರಕ್ತದೊತ್ತಡ ಸಮಸ್ಯೆಗೆ (High Blood Pressure Problems) ಬದಲಾದ ವೇಗದ ಜೀವನಶೈಲಿ ಪ್ರಮುಖ ಕಾರಣವಾಗಿದೆ. ಇದಲ್ಲದೆ, ಅನುವಂಶೀಯವಾಗಿಯೂ ಕೂಡ ಈ ಸಮಸ್ಯೆ ಉಂಟಾಗಬಹುದು. ಇದರ ಹೊರತಾಗಿ, ನಮ್ಮ ಕೆಲವು ಕೆಟ್ಟ ಅಭ್ಯಾಸಗಳಿಂದಲೂ ಅಧಿಕ ರಕ್ತದೊತ್ತಡ ಸಮಸ್ಯೆ ಉಂಟಾಗುತ್ತದೆ. ಅಂತಹ ಕೆಲ ಕಾರಣಗಳೆಂದರೆ... 

* ತೂಕ ಹೆಚ್ಚಳ: 
ಬೊಜ್ಜು ಅಥವಾ ಅತಿಯಾದ ತೂಕ ಹೆಚ್ಚಳವಿರುವ ಜನರಲ್ಲಿ ಅಧಿಕ ರಕ್ತದೊತ್ತಡ ಸಮಸ್ಯೆ ಗಮನಾರ್ಹವಾಗಿ ಹೆಚ್ಚು ಎಂದು ಹಲವು ಸಂಶೋಧನೆಗಳಲ್ಲಿ ತಿಳಿದುಬಂದಿದೆ. 

* ದೈಹಿಕ ಚಟುವಟಿಕೆ ಇಲ್ಲದಿರುವುದು: 
ನಮ್ಮ ದೈನಂದಿನ ಚಟುವಟಿಕೆಗಳಲ್ಲಿ ವಾಕ್, ವ್ಯಾಯಾಮ, ಯೋಗಾಭ್ಯಾಸಗಳಂತಹ ಯಾವುದೇ ದೈಹಿಕ ಚಟುವಟಿಕೆಗಳು ಇಲ್ಲದಿರುವುದು ಕೊಡೋಯ ರಕ್ತದೊತ್ತಡದ ಅಪಾಯವನ್ನು ಹೆಚ್ಚಿಸಬಹುದು. 

* ಅತಿಯಾದ ಉಪ್ಪು ಬಳಕೆ: 
ನಾವು ನಿತ್ಯ ಸೇವಿಸುವ ಆಹಾರದಲ್ಲಿ ಅತಿಯಾದ ಉಪ್ಪು ಬಳಕೆಯಿಂದಲೂ ಹೈಬಿಪಿ ಸಮಸ್ಯೆ ಉಲ್ಬಣಿಸಬಹುದು. 

ಇದನ್ನೂ ಓದಿ- ನಿದ್ರಾ ಪಾರ್ಶ್ವವಾಯು ಎಂದರೇನು? ಮತ್ತು ಅದನ್ನು ತೊಡೆದುಹಾಕುವುದು ಹೇಗೆ ಗೊತ್ತೇ ?

* ಕಾಫಿ/ಟೀ ಸೇವನೆ: 
ನಿತ್ಯ ಒಂದೆರಡು ಕಪ್ ಗಿಂತ ಹೆಚ್ಚಿನ ಕಾಫಿ ಅಥವಾ ಟೀ ಸವಿಯುವ ಚಟ ಇರುವವರಲ್ಲಿಯೂ ಅಧಿಕ ರಕ್ತದೊತ್ತಡ ಸಮಸ್ಯೆ ಕಾಣಿಸಿಕೊಳ್ಳಬಹುದು. 

* ಧೂಮಪಾನ, ಮದ್ಯಪಾನ:
ಕೆಲವು ಸಂಶೋಧನೆಗಳ ಪ್ರಕಾರ, ಧೂಮಪಾನ, ಮದ್ಯಪಾನ ಮಾಡುವವರಲ್ಲಿಯೂ ಸಹ ಅಧಿಕ ರಕ್ತದೊತ್ತಡ ಸಮಸ್ಯೆಯ ಅಪಾಯ ಹೆಚ್ಚು ಎಂದು ತಿಳಿದುಬಂದಿದೆ.