‘ದಿ ಕಾಶ್ಮೀರ್ ಫೈಲ್ಸ್’ ಭಾರತದಲ್ಲಿ ಪ್ರದರ್ಶಿಸದೆ ಪಾಕಿಸ್ತಾನದಲ್ಲಿ ತೋರಿಸಬೇಕೇ?: ಕಾಂಗ್ರೆಸ್​ಗೆ ಬಿಜೆಪಿ ಪ್ರಶ್ನೆ

ಬೆಂಗಳೂರು: ‘ದಿ ಕಾಶ್ಮೀರ್ ಫೈಲ್ಸ್‌’ ಸಿನಿಮಾ(​The Kashmir Files Film)ವನ್ನು ಭಾರತದಲ್ಲಿ ಪ್ರದರ್ಶಿಸದೆ ಪಾಕಿಸ್ತಾನದಲ್ಲಿ ತೋರಿಸಬೇಕೇ? ಎಂದು ಕಾಂಗ್ರೆಸ್ ಗೆ ಬಿಜೆಪಿ ಪ್ರಶ್ನಿಸಿದೆ. ಈ ಬಗ್ಗೆ ಸರಣಿ ಟ್ವೀಟ್ ಮಾಡಿರುವ ಬಿಜೆಪಿ, ‘ಪ್ರತಿಯೊಬ್ಬ ಭಾರತೀಯನು ನೋಡಲೇಬೇಕಾದ ಸಿನಿಮಾ ಇದು. ಕಾಂಗ್ರೆಸ್‌ ಈ ಸಿನಿಮಾಕ್ಕೆ ತೀವ್ರವಾದ ವಿರೋಧ ವ್ಯಕ್ತಪಡಿಸುತ್ತಿರುವುದೇಕೆ? ಕಾಂಗ್ರೆಸ್‌ ಪ್ರತ್ಯೇಕತಾವಾದಿಗಳ ಪರವೋ, ದೇಶದ ಪರವೋ?’ ಅಂತಾ ಪ್ರಶ್ನಿಸಿದೆ.

‘ಹಿಜಾಬ್ ಮುಸ್ಲಿಮರ ಮೂಲಭೂತ ಹಕ್ಕು ಎಂದು ಪ್ರತಿಪಾದಿಸುವ ಸಿದ್ದರಾಮಯ್ಯ(Siddaramaiah)ನವರೇ ಕಾಶ್ಮೀರ, ಕಾಶ್ಮೀರಿ ಪಂಡಿತರ ಹಕ್ಕು ಎಂಬುದು ಯಾವಾಗ ಪ್ರತಿಪಾದಿಸುತ್ತೀರಿ? #TheKashmirFiles ಚಿತ್ರ ವೀಕ್ಷಣೆ ನಿರಾಕರಿಸಿರುವ ನೀವು, ಯಾರ ಪರವಾಗಿ ಫೈಲ್ ಬಿಲ್ಡ್ ಮಾಡುತ್ತಿದ್ದೀರಿ?’ ಅಂತಾ ಪ್ರಶ್ನಿಸಿದೆ.

‘ಸಿದ್ದರಾಮಯ್ಯನವರೇ ನೀವು #TheKashmirFiles ಸಿನಿಮಾ(The Kashmir Files Cinema) ವೀಕ್ಷಣೆ ಮಾಡುವುದಿಲ್ಲವೆಂದು ಹೇಳಿದ್ದೇಕೆ? ನೀವು ಪೋಷಿಸಿಕೊಂಡು ಬಂದ ಜಿಹಾದಿ ಪ್ರತಿಪಾದಕರು ಈ ದೇಶದಲ್ಲಿ ನಡೆಸಿದ ನರಮೇಧವನ್ನು ನೋಡಲು ಅಂಜಿಕೆಯೇ? ಅಥವಾ ಸತ್ಯದರ್ಶನ ಮಾಡಲಾಗದ ಪಲಾಯನವಾದವೋ? ಹಿಂದೂಗಳ ಭಾವನೆಗೆ ಧಕ್ಕೆಯುಂಟು ಮಾಡುವುದು ಮಾತ್ರ ಸಿದ್ದರಾಮಯ್ಯನವರು ಪ್ರತಿಪಾದಿಸುವ ಜಾತ್ಯತೀತತೆ. ಸ್ವತಂತ್ರ ಭಾರತದಲ್ಲಿ ನಡೆದ ಹಿಂದೂಗಳ ಮಾರಣಹೋಮದ ಬಗ್ಗೆ ಈ ಸಮಾಜ‌ ಭಂಜಕ ಸಿದ್ಧರಾಮಯ್ಯ ಅವರು ಸದಾ ಮೌನಿ!’ ಅಂತಾ ಬಿಜೆಪಿ ಕುಟುಕಿದೆ.