ತಾಯಿ ಭುವನೇಶ್ವರಿಗೆ ಮೀಸಲಿಡಬೇಕಾದ ಹಣ ಗಾಂಧಿ ಕುಟುಂಬಕ್ಕಾಗಿ ಅನಗತ್ಯ ಪೋಲಾಗುತ್ತಿದೆ: ಬಿಜೆಪಿ

ಬೆಂಗಳೂರು: ರಾಜ್ಯ ಸರ್ಕಾರ ಅನುದಾನ ಒದಗಿಸದ ಕಾರಣ ಬೆಂಗಳೂರಿನ ಕಲಾಗ್ರಾಮದಲ್ಲಿ ಸಂಸ್ಕೃತಿ ಇಲಾಖೆಯಿಂದ ನಿರ್ಮಿಸಲು ಉದ್ದೇಶಿಸಿದ್ದ ನಾಡದೇವಿ ಭುವನೇಶ್ವರಿ ಪ್ರತಿಮೆಯ ಯೋಜನೆಯನ್ನು ಕೈಬಿಡಲಾಗಿದೆ. ಇದೀಗ ಇದೇ ವಿಚಾರವಾಗಿ ಕಾಂಗ್ರೆಸ್ ಸರ್ಕಾರದ ವಿರುದ್ಧ ಬಿಜೆಪಿ ಆಕ್ರೋಶ ವ್ಯಕ್ತಪಡಿಸಿದೆ.

ಈ ಬಗ್ಗೆ ಮಂಗಳವಾರ ಸರಣಿ ಟ್ವೀಟ್ ಮಾಡಿರುವ ಬಿಜೆಪಿ, ‘ಕನ್ನಡ ಹಾಗೂ ಕನ್ನಡ ಅಸ್ಮಿತೆ ಅಂದರೆ ಸಿಎಂ ಸಿದ್ದರಾಮಯ್ಯನವರಿಗೆ ಮತ್ತು ಕಾಂಗ್ರೆಸ್ ಪಕ್ಷಕ್ಕೆ ಕೇವಲ ಚುನಾವಣಾ ವಸ್ತು, ಬಳಸಿ ಬಿಸುಟುವ ಕರವಸ್ತ್ರವಷ್ಟೇ ಎಂಬುದು ಈಗ ಮತ್ತೆ ರುಜುವಾಗಿದೆ. ನಾಡದೇವಿ ಭುವನೇಶ್ವರಿಗೆ ಪ್ರತಿಮೆ ನಿರ್ಮಾಣ ಮಾಡುವ ಯೋಜನೆ ಎಲ್ಲಾ ಅನುಮತಿಯೂ ಪಡೆದು ಅನುದಾನ ಬಿಡುಗಡೆಯಷ್ಟೇ ಬಾಕಿ ಎಂದಾಗ ಕಾಂಗ್ರೆಸ್‌ ಸರ್ಕಾರ ರಾಜ್ಯದ ಬೊಕ್ಕಸದಲ್ಲಿ ಹಣವಿಲ್ಲ ಎನ್ನುತ್ತಿದೆ. ಆದರೆ ಅದೇ ಬೊಕ್ಕಸದಿಂದ ತೆಗೆದು ರಾಜೀವ್‌ ಗಾಂಧಿಯವರ ಕಂಚಿನ ಪ್ರತಿಮೆ ನಿರ್ಮಾಣಕ್ಕೆ ಹಣ ಒದಗಿಸಿದೆ’ ಎಂದು ಕಿಡಿಕಾರಿದೆ.

ಇದನ್ನೂ ಓದಿ: ಉಪ್ಪುಂದದಲ್ಲಿ ಮುಳುಗಿದ ನಾಡದೋಣಿ: 6 ಮೀನುಗಾರರು ಅಪಾಯದಿಂದ ಪಾರು

‘ಹೀಗಾಗಿ ಕನ್ನಡ ತಾಯಿ ಪ್ರತಿಮಾರೂಪಿಯಾಗಿ ಜನರ ಮನಸ್ಸಲ್ಲಿ ಅಚ್ಚೊತ್ತುವುದು ಭಾರತದ ಸಂಸ್ಕೃತಿಯನ್ನು ಜನರ ಮನಸ್ಸಿಂದ ದೂರ ಇರಿಸಿ ನಂಬಿಕೆಗಳನ್ನು ವ್ಯವಸ್ಥಿತವಾಗಿ ಅಳಿಸಿ ಹಾಕುವ ಪ್ರಯತ್ನವನ್ನು ಕಾಂಗ್ರೆಸ್ ಮಾಡುತ್ತಿದೆ. ಕನ್ನಡ ನಾಡಿಗೆ ಇರುವ ಸಹಸ್ರಾರು ವರ್ಷಗಳ ಇತಿಹಾಸವನ್ನು ಮರೆಮಾಚಲು ನಿಧಾನವಾಗಿ ನಮ್ಮತನದ ಒಂದೊಂದೇ ಸಂಕೇತಗಳನ್ನು ಅಳಿಸಿಹಾಕಲಾಗುತ್ತಿದೆ. ಹೀಗಾಗಿ ತಾಯಿ ಭುವನೇಶ್ವರಿಗೆ ಮೀಸಲಿಡಬೇಕಾದ ಹಣ ಗಾಂಧಿ ಕುಟುಂಬಕ್ಕಾಗಿ ಅನಗತ್ಯ ಪೋಲಾಗುತ್ತಿದೆ’ ಎಂದು ಬಿಜೆಪಿ ಟೀಕಿಸಿದೆ.