ರಾಜ್ಯದಲ್ಲಿ ಬರವೆಂಬ ‘ರಾಹು’ಕಾಲ ವಕ್ಕರಿಸಿದೆ: ಸಿದ್ದು ಸರ್ಕಾರದ ವಿರುದ್ಧ ಬಿಜೆಪಿ ಆಕ್ರೋಶ

ಬೆಂಗಳೂರು: ತಮಿಳುನಾಡಿಗೆ ಕಾವೇರಿ ನೀರು ಹರಿಸಿರುವ ಸಿದ್ದರಾಮಯ್ಯ ನೇತೃತ್ವದ ಕಾಂಗ್ರೆಸ್ ಸರ್ಕಾರವು ರಾಜ್ಯದ ಜನರಿಗೆ ಮೋಸ ಮಾಡಿದೆ ಎಂದು ಬಿಜೆಪಿ ಆರೋಪಿಸಿದೆ. ಈ ಬಗ್ಗೆ ಗುರುವಾರ ಟ್ವೀಟ್ ಮಾಡಿರುವ ಬಿಜೆಪಿ, ‘ರಾಜ್ಯದಲ್ಲಿ ಬರವೆಂಬ ರಾಹುಕಾಲ ವಕ್ಕರಿಸಿದೆ’ ಎಂದು ಕುಟುಕಿದೆ.

‘ಕುಡಿಯುವ ನೀರಿಗೂ ಹಾಹಾಕಾರ ಉಂಟಾಗುವ ಎಲ್ಲಾ ಸಾಧ್ಯತೆಯೂ ಸ್ಪಷ್ಟವಾಗಿದೆ. ಆದರೂ ಕಾಂಗ್ರೆಸ್ ಸರ್ಕಾರ ಸಮರ್ಥವಾಗಿ ಕಾವೇರಿ ನ್ಯಾಯಾಧೀಕರಣದ ಮುಂದೆ ತನ್ನ ವಾದವನ್ನು ಮಂಡಿಸುವಲ್ಲಿ ಸೋತು ತಮಿಳುನಾಡಿಗೆ ನೀರು ಹರಿಸುತ್ತಲೇ ಇದೆ’ ಎಂದು ಕುಟುಕಿದೆ.

‘ಕುಡಿಯುವ ನೀರು ಮಾತ್ರವಲ್ಲದೆ ದುಪ್ಪಟ್ಟು ವಿದ್ಯುತ್ ಬಿಲ್ ಪಾವತಿಸಿದರೂ ಪವರ್ ಸಪ್ಲೈ ಕಷ್ಟವಾಗಲಿದೆ. ಕರ್ನಾಟಕವನ್ನು ಎಲ್ಲಾ ರೀತಿಯಿಂದಲೂ ಕಂಗೆಡಿಸುವುದೊಂದೇ ಸಿಎಂ ಸಿದ್ದರಾಮಯ್ಯನವರ ಸರ್ಕಾರದ ಗುರಿಯಾಗಿದೆ‌’ ಎಂದು ಟೀಕಿಸಿದೆ.

ರಾಜ್ಯದಲ್ಲಿ 455 ಟ್ರೇಡ್ ಲೈಸೆನ್ಸ್ ಅರ್ಜಿ ಬಾಕಿ ವಿಚಾರವಾಗಿ ಟೀಕಿಸಿರುವ ಬಿಜೆಪಿ, ‘ವ್ಯಾಪಾರ ಪರವಾನಗಿ ಪಡೆಯಬೇಕಿದ್ದರೆ ₹10,000 ಗಳಿಂದ ಲಂಚದ ಸ್ಲ್ಯಾಬ್ ಆರಂಭವಾಗುತ್ತದೆ. ನಡೆಸುವ ವಹಿವಾಟಿಗೆ ಅನುಗುಣವಾಗಿ ಲಂಚ ನೀಡಿದರಷ್ಟೇ ಸರ್ವರ್ ಕೆಲಸ ಮಾಡುವ ತಂತ್ರಜ್ಞಾನವನ್ನು ಕಾಂಗ್ರೆಸ್ ಕಂಡುಕೊಂಡಿದೆ’ ಎಂದು ಆರೋಪಿಸಿದೆ.

‘80ರ ದಶಕದಲ್ಲಿ ಕಾಂಗ್ರೆಸ್ ಸರ್ಕಾರದ ರಾಜ್ಯದಲ್ಲಿ ರೌಡಿಗಳನ್ನು ಕಳಿಸಿ ಮಾಮೂಲಿ ಸಂಗ್ರಹ ಮಾಡುತ್ತಿತ್ತು. ಈಗ ಸಿಎಂ ಸಿದ್ದರಾಮಯ್ಯವರ ಸರ್ಕಾರ ರೌಡಿಗಳ ಬದಲಾಗಿ ಅಧಿಕಾರಿಗಳನ್ನೇ ದುರುಪಯೋಗ ಪಡಿಸಿಕೊಳ್ಳುತ್ತಿದೆ’ ಎಂದು ಟೀಕಿಸಿದೆ.