IND vs SL, Asia Cup 2023: ಸಿರಾಜ್ & ಪಾಂಡ್ಯ ಬೆಂಕಿ ಬೌಲಿಂಗ್‍, ಕೇವಲ 50 ರನ್‍ಗೆ ಲಂಕಾ ಆಲೌಟ್!

ನವದೆಹಲಿ: ಮೊಹಮ್ಮದ್ ಸಿರಾಜ್ ಮತ್ತು ಹಾರ್ದಿಕ್ ಪಾಂಡ್ಯ ಮಾರಕ ದಾಳಿಗೆ ತತ್ತರಿಸಿದ ಹಾಲಿ ಚಾಂಪಿಯನ್ ಶ್ರೀಲಂಕಾ ಕೇವಲ 50 ರನ್‍ಗಳಿಗೆ ಆಲೌಟ್ ಆಗುವ ಮೂಲಕ ಭಾರೀ ಮುಖಭಂಗ ಅನುಭವಿಸಿದೆ. ಟೀಂ ಇಂಡಿಯಾದ ಬೆಂಕಿ ಬೌಲಿಂಗ್‍ಗೆ ರನ್ ಗಳಿಸಲು ಪರದಾಡಿದ ಲಂಕಾ ಕೇವಲ 15.2 ಓವರ್‌ಗಳಲ್ಲಿ 50 ರನ್ ಗಳಿಸಿ ತನ್ನ ಎಲ್ಲಾ ವಿಕೆಟ್‍ಗಳನ್ನು ಕಳೆದುಕೊಂಡಿದೆ.

ಲಂಕಾಗೆ ಜಸ್ಪ್ರೀತ್ ಬೂಮ್ರಾ ಆರಂಭಿಕ ಆಘಾತ ನೀಡಿದ್ರೆ, ಮೊಹಮ್ಮದ್ ಸಿರಾಜ್ ಲಂಕಾ ತಂಡದ ಬ್ಯಾಟಿಂಗ್‍ನ ಬೆನ್ನುಮೂಳೆಯನ್ನೇ ಮುರಿದರು. ತಮ್ಮ 4ನೇ ಓವರ್‌ನಲ್ಲಿ ಸಿರಾಜ್ ಬರೊಬ್ಬರಿ 4 ವಿಕೆಟ್ ಕಬಳಿಸುವ ಮೂಲಕ ಲಂಕಾ ತಂಡಕ್ಕೆ ದೊಡ್ಡ ಆಘಾತ ನೀಡಿದರು. ಸಿರಾಜ್ ಮಾರಕ ಬೌಲಿಂಗ್ ದಾಳಿಗೆ ಸಿಲುಕಿದ ಶ್ರೀಲಂಕಾ ಚೇತರಿಸಿಕೊಳ್ಳಲು ಸಾಧ್ಯವಾಗದೆ ಅಲ್ಪಮೊತ್ತಕ್ಕೆ ಕುಸಿತ ಕಂಡಿತು. ಮೊದಲ ಓವರ್‍ನ 2ನೇ ಎಸೆತದಲ್ಲಿಯೇ ಕುಸಾಲ್ ಪೆರೆರಾ ವಿಕೆಟ್ ಪಡೆಯುವ ಮೂಲಕ ಬೂಮ್ರಾ ಲಂಕಾಗೆ ಆಘಾತ ನೀಡಿದರು. ಪಂದ್ಯದ 4ನೇ ಓವರ್‍ನಲ್ಲಿ ಸಿರಾಜ್ ಲಂಕಾ ಬ್ಯಾಟ್ಸ್‍ಮನ್‍ಗಳನ್ನು ಒಬ್ಬರ ಹಿಂದೊಬ್ಬರಂತೆ ಪೆವಿಲಿಯನ್ ಹಾದಿ ಹಿಡಿಸಿದರು.

ಇದನ್ನೂ ಓದಿ: ಇಂದು ಏಷ್ಯಾಕಪ್‌ 2023ರ ಕೊನೆಯ ಪಂದ್ಯ

ಒಂದೇ ಓವರ್‌ನಲ್ಲಿ ಲಂಕಾ ತಂಡದ ನಾಲ್ವರು ಆಟಗಾರರ ಬಲಿ ಪಡೆಯುವ ಮೂಲಕ ಸಿರಾಜ್ ವಿಶ್ವದಾಖಲೆ ನಿರ್ಮಿಸಿದ್ದಾರೆ. ಶ್ರೀಲಂಕಾ ಪರ ಕುಸಾಲ್ ಮೆಂಡಿಸ್(17) ಮತ್ತು ದುಶನ್ ಹೇಮಂತ (13) ಮಾತ್ರ ಎರಡಂಕಿ ದಾಟಿದರು. ಇನ್ನುಳಿದ ಆಟಗಾರರು ಭಾರತದ ಬೌಲಿಂಗ್ ದಾಳಿಗೆ ಸಿಲುಕಿ ತರಗಲೆಯಂತೆ ವಿಕೆಟ್ ಒಪ್ಪಿಸಿದರು. ಪರಿಣಾಮ ಶ್ರೀಲಂಕಾ 15.2 ಓವರ್‍ಗಳಲ್ಲಿ ಕೇವಲ 50 ರನ್‍ಗಳಿಗೆ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡಿತು.

ಮೊಹಮ್ಮದ್ ಸಿರಾಜ್ 1 ಮೆಡಿನ್ ಸಹಿತ 7 ಓವರ್‍ ಬೌಲಿಂಗ್ ಮಾಡಿದ್ದು, 21 ರನ್ ನೀಡಿ 6 ವಿಕೆಟ್ ಕಬಳಿಸಿ ಮಿಂಚಿದರು. ಇನ್ನುಳಿದಂತೆ ಹಾರ್ದಿಕ್ ಪಾಂಡ್ಯ 2.2 ಓವರ್‍ಗಳಿಗೆ 3 ರನ್ ನೀಡಿ 3 ವಿಕೆಟ್ ಪಡೆದರು. ಜಸ್ಪ್ರೀತ್ ಬೂಮ್ರಾ 1 ಮೆಡಿನ್ ಸಹಿತ ಓವರ್ ಬೌಲಿಂಗ್ ಮಾಡಿ 23 ರನ್ ನೀಡಿ 1 ವಿಕೆಟ್ ಗಳಿಸಿದರು. ಭಾರತಕ್ಕೆ ಲಂಕಾ 51 ರನ್‍ಗಳ ಟಾರ್ಗೆಟ್ ನೀಡಿದೆ.

ಇದನ್ನೂ ಓದಿ: Asia Cup Final 2023 ಪಂದ್ಯದ ಆರಂಭದಲ್ಲಿಯೇ ಭಾರಿ ವಿಧ್ವಂಸ ಸೃಷ್ಟಿಸಿದ ಮಹಮ್ಮದ್ ಸಿರಾಜ್ !