ಐ‌ಪಿ‌ಎಲ್ ಈ ಋತುವಿನಲ್ಲಿ ಎರಡನೇ ಬಾರಿಗೆ ಭದ್ರತಾ ಲೋಪ: ಮೈದಾನಕ್ಕೆ ನುಗ್ಗಿದ ರೋಹಿತ್ ಶರ್ಮಾ ಅಭಿಮಾನಿ

Fan Breaches IPL Security: ನಿನ್ನೆ (ಸೋಮವಾರ, ಏಪ್ರಿಲ್ 01) ಮುಂಬೈನ ವಾಂಖೆಡೆ ಇಂಟರ್​ ನ್ಯಾಷನಲ್​ ಕ್ರಿಕೆಟ್​ ಸ್ಟೇಡಿಯಮ್​ನಲ್ಲಿ ನಡೆದ ಇಂಡಿಯನ್​​ ಪ್ರೀಮಿಯರ್​​ ಲೀಗ್​  (Indian Premier League) ಹೈವೋಲ್ಟೇಜ್​ ಪಂದ್ಯದಲ್ಲಿ ಹಾರ್ದಿಕ್ ಪಾಂಡ್ಯ (Hardik Pandya) ನಾಯಕತ್ವದ  ಮುಂಬೈ ಇಂಡಿಯನ್ಸ್  (Mumbai Indians) ತಂಡ ತನ್ನ ಕಳಪೆ ಪ್ರದರ್ಶನವನ್ನು ಮುಂದುವರೆಸಿದ್ದು,  ಸಂಜು ಸ್ಯಾಮ್ಸನ್ (Sanju Samson) ನಾಯಕತ್ವದ ರಾಜಸ್ಥಾನ್ ರಾಯಲ್ಸ್  (Rajasthan Royals) ತಂಡ 6 ವಿಕೆಟ್‌ಗಳ   ಭರ್ಜರಿ ಜಯ ದಾಖಲಿಸಿದೆ.  ಏತನ್ಮಧ್ಯೆ, ಈ ಐ‌ಪಿ‌ಎಲ್ ಋತುವಿನಲ್ಲಿ ಎರಡನೇ ಬಾರಿಗೆ ಆಟಗಾರರ ಭದ್ರತೆಯಲ್ಲಿ ಲೋಪ ಕಂಡು ಬಂದಿದೆ. 

ಹೌದು, ಮುಂಬೈನ ವಾಂಖೆಡೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ (Wankhede International Cricket Stadium) ಏಪ್ರಿಲ್ 01ರಂದು ನಡೆದ ಐ‌ಪಿ‌ಎಲ್ ಪಂದ್ಯದಲ್ಲಿ  ಮುಂಬೈ ಇಂಡಿಯನ್ಸ್  (Mumbai Indians) ಮತ್ತು ರಾಜಸ್ಥಾನ್ ರಾಯಲ್ಸ್ (Rajasthan Royals) ತಂಡಗಳ ನಡುವೆ ಹೈವೋಲ್ಟೇಜ್​ ಪಂದ್ಯ ನಡೆಯಿತು. ಒಂದೆಡೆ, ಈ ಐ‌ಪಿ‌ಎಲ್ ಋತುವಿನಲ್ಲಿ ಇನ್ನೂ ಖಾತೆಯನ್ನೇ ತೆರೆಯದೆ ಸತತ ಎರಡು ಪಂದ್ಯಗಳಲ್ಲಿ ಹೀನಾಯವಾಗಿ ಸೋಲು ಕಂಡಿದ್ದ ಹಾರ್ದಿಕ್ ಪಾಂಡ್ಯ ನಾಯಕತ್ವದ  ಮುಂಬೈ ಇಂಡಿಯನ್ಸ್  ತಂಡ ಗೆಲ್ಲಲೇ ಬೇಕು ಎಂಬ ಹಟದಿಂದ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿತು. ಹೇಗಾದರೂ ಗೆಲ್ಲಲೇಬೇಕು ಎಂಬ ಜಿದ್ದಿಗೆ ಬಿದ್ದಿದ್ದ ಮುಂಬೈ ಇಂಡಿಯನ್ಸ್ ರನ್ ಕಲೆಹಾಕುವ ಭರದಲ್ಲಿ ಬಲು ಬೇಗನೆ ಒಂದರ ಹಿಂದೆ ಒಂದರಂತೆ ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಈ ಮೂಲಕ 20 ಓವರ್​​ಗಳಲ್ಲಿ  9 ವಿಕೆಟ್ ನಷ್ಟಕ್ಕೆ ಕೇವಲ 125 ರನ್ ಗಳನ್ನಷ್ಟೇ ಗಳಿಸಲು ಸಾಧ್ಯವಾಯಿತು. 

ಇದನ್ನೂ ಓದಿ- IPL 2024: ಒಂದೇ ಪಂದ್ಯದಲ್ಲಿ ಒಂದರ ಮೇಲೊಂದರಂತೆ 5 ದಾಖಲೆ ಬರೆದ Mahendra Singh Dhoni

ಮುಂಬೈ ಇಂಡಿಯನ್ಸ್  (Mumbai Indians) ನೀಡಿದ ಸಾಧಾರಣ ಮೊತ್ತದ ಗುರಿ ಬೆನ್ನತ್ತಿದ ರಾಜಸ್ಥಾನ್ ರಾಯಲ್ಸ್ (Rajasthan Royals)ತಂಡ ಅನಾಯಾಸವಾಗಿ ಕೇವಲ  15.3 ಓವರ್​ನಲ್ಲಿ 127 ರನ್​ ಗಳಿಸುವ ಮೂಲಕ 6 ವಿಕೆಟ್‌ಗಳ  ಭರ್ಜರಿ ಜಯ ದಾಖಲಿಸಿತು. ಇನ್ನೂ ಮುಂಬೈ ಇಂಡಿಯನ್ಸ್ vs ರಾಜಸ್ಥಾನ್ ರಾಯಲ್ಸ್ ಪಂದ್ಯದ ನಡುವೆ ವಿಚಿತ್ರ ಘಟನೆಯೊಂದು ನಡೆಯಿತು. ಈ ಘಟನೆಯು ಐ‌ಪಿ‌ಎಲ್ ಋತುವಿನಲ್ಲಿ ಆಟಗಾರರ ಭದ್ರತಾ ಲೋಪಕ್ಕೆ ಸಂಬಂಧಿಸಿದೆ. 

ವಾಸ್ತವವಾಗಿ,  ಮುಂಬೈ ಇಂಡಿಯನ್ಸ್ ತಂಡ ಬೌಲಿಂಗ್ ಮಾಡುತ್ತಿದ್ದ ಸಂದರ್ಭದಲ್ಲಿ ಪ್ರೇಕ್ಷಕರೊಬ್ಬರು ಮೈದಾನಕ್ಕೆ ನುಗ್ಗಿದ್ದಾರೆ. ಈ ಸಂದರ್ಭದಲ್ಲಿ ರೋಹಿತ್ ಶರ್ಮಾ (Rohit Sharma) ಸ್ಲಿಪ್ ನಲ್ಲಿ ಫೀಲ್ಡಿಂಗ್ ಮಾಡುವಾಗ, ಇಶಾನ್ ಕಿಶನ್ ವಿಕೆಟ್ ಕೀಪಿಂಗ್ ಮಾಡುತ್ತಿದ್ದರು. ಈ ಸಂದರ್ಭದಲ್ಲಿ ಏಕಾಏಕಿ ಮೈದಾನಕ್ಕೆ ನುಗ್ಗಿದ ವ್ಯಕ್ತಿಯೊಬ್ಬರು ಹಿಂದಿನಿಂದ ಹೋಗಿ ಮೊದಲಿಗೆ ರೋಹಿತ್ ಶರ್ಮಾ ಅವರನ್ನು ತಬ್ಬಿಕೊಂಡರು. ಬಳಿಕ ಇಶಾನ್ ಕಿಶನ್ (Ishan Kishan) ಅವರನ್ನು ತಬ್ಬಿಕೊಂಡರು. ನೋಡು ನೋಡುತ್ತಲೇ ಇದೇನಾಯಿತು ಎಂದು ಅರಿಯದ ರೋಹಿತ್ ಮೈದಾನದೊಳಗೆ ಹಿಂದಿನಿಂದ ಬಂದು ತಬ್ಬಿದ ಬೇರೆ ವ್ಯಕ್ತಿಯನ್ನು ಕಂಡು ಬೆಚ್ಚಿ ಬೆರಗಾದರು. 

ಇನ್ನೂ ರೋಹಿತ್ ಶರ್ಮಾ- ಇಶಾನ್ ಕಿಶನ್ ಅವರನ್ನು ತಬ್ಬಿಕೊಂಡು ವಿಶ್ ಮಾಡಿ ಹಿಂದಿರುಗುತ್ತಿದ್ದ ವ್ಯಕ್ತಿಯನ್ನು ಭದ್ರತಾ ಸಿಬ್ಬಂದಿ ಬಂದು ಮೈದಾನದಿಂದ ಹೊರಗೆ ಕರೆದೊಯ್ದರು. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ. ಗಮನಾರ್ಹವಾಗಿ, ಈ ಐ‌ಪಿ‌ಎಲ್ ಋತುವಿನಲ್ಲಿ  ಎರಡನೇ ಬಾರಿಗೆ ಆಟಗಾರರ ಸುರಕ್ಷತೆಯಲ್ಲಿ ಈ ರೀತಿಯ ಲೋಪ ಕಂಡು ಬಂದಿದೆ. 

ಈ ಮೊದಲು ಮಾರ್ಚ್ 25ರಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಪಂಜಾಬ್ ಕಿಂಗ್ಸ್ (ಪಿಬಿಕೆಎಸ್)  ನಡುವೆ ನಡೆದ ಪಂದ್ಯದ ಸಂದರ್ಭದಲ್ಲಿ ವಿರಾಟ್ ಕೊಹ್ಲಿ ಬ್ಯಾಟಿಂಗ್ ಮಾಡುತ್ತಿದ್ದಾಗ ವೀಕ್ಷಕರೊಬ್ಬರು ಏಕಾಏಕಿ ಅವರ ಬಳಿಗೆ ಬಂದಿದ್ದರು. ಈ ಸಂದರ್ಭದಲ್ಲಿ ನೇರವಾಗಿ ಕೊಹ್ಲಿ ಬಳಿ ತಲುಪಿದ್ದ ಅಭಿಮಾನಿ ಕೊಹ್ಲಿ ಪಾದ ಸ್ಪರ್ಶಿಸಿದ್ದರು.