Suicide: ഭർതൃവീട്ടിലെ മാനസിക പീഡനം, യുവതി ജീവനൊടുക്കി; മര്‍ദ്ദനമേറ്റതിന്റെ തെളിവ് പുറത്ത് വിട്ട് ബന്ധുക്കൾ

തിരുവനന്തപുരം: തിരുവനന്തപുരം തിരുവല്ലത്ത് ഭർതൃവീട്ടിലെ മാനസിക പീഡനം മൂലം യുവതി ആത്മഹത്യ ചെയ്‌തെന്ന് പരാതി. വണ്ടിത്തടം സ്വദേശി ഷഹന ഷാജിയാണ് മരിച്ചത്. സംഭവത്തിൽ തിരുവല്ലം പോലീസ് കേസെടുത്തു. ഭർതൃമാതാവിന്റെ മാനസിക പീഡനം മൂലം ചൊവ്വാഴ്ചയാണ് യുവതി ജീവനൊടുക്കിയത്. വൈകിട്ട് നാല് മണിയോടെയാണ് യുവതി മരിച്ചത്.

ഭര്‍തൃ വീട്ടിലെ പ്രശ്നങ്ങലെ തുട‍ര്‍ന്ന് ഷഹന മൂന്ന് മാസമായി സ്വന്തം വീട്ടിലാണ് താമസിച്ചിരുന്നത്. ചൊവ്വാഴ്ച ഭ‍ര്‍തൃവീട്ടിൽ നടന്ന സ്വകാര്യ ചടങ്ങിൽ പങ്കെടുക്കണമെന്ന് ഭ‍ര്‍ത്താവ് ആവശ്യപ്പെട്ടിരുന്നു. എന്നാൽ ഷഹന ഭർതൃവീട്ടിലേക്ക് പോകാൻ തയ്യാറായില്ല. തുട‍ര്‍ന്ന് ഭര്‍ത്താവ് നൗഫൽ ഷഹനയുടെ വീട്ടിലെത്തി ഒന്നര വയസുള്ള കുഞ്ഞിനെ ബലമായി ഭർതൃ വീട്ടിലേക്ക് കൊണ്ടുപോയി.

ഇതിന് പിന്നാലെ യുവതി മുറിയിൽ കയറി കതകടയ്ക്കുകയായിരുന്നു. പിന്നീട് നടത്തിയ പരിശോധനയിലാണ് യുവതിയെ മരിച്ച നിലയിൽ കണ്ടെത്തിയത്. ഷഹന ജീവനൊടുക്കിയത് കുഞ്ഞിനെ ബലമായി കൊണ്ടുപോയതിന്റെ ആഘാതത്തിലാണെന്ന് ബന്ധുക്കൾ ആരോപിച്ചു.

യുവതിക്ക് ഭര്‍ത്താവിന്റെ വീട്ടിൽ വെച്ച് മര്‍ദ്ദനമേറ്റിരുന്നുവെന്ന് തെളിയിക്കുന്ന ദൃശ്യങ്ങളും ബന്ധുക്കൾ പുറത്തുവിട്ടു. ഈ ദൃശ്യങ്ങൾ ഉൾപ്പെടെയാണ് പോലീസിൽ പരാതി നൽകിയത്. സാമ്പത്തികം കുറവായതിന്റെ പേരിൽ ഭർതൃ മാതാവ് പീഡിപ്പിച്ചിരുന്നുവെന്ന് ഷഹനയുടെ ബന്ധുക്കൾ പരാതിയിൽ ആരോപിക്കുന്നു.