Pocso Case: പതിനേഴുകാരിയെ ലൈംഗിക പീഡനത്തിന് ഇരയാക്കി; രണ്ടാനച്ഛന് ആറ് വർഷം കഠിനതടവും 30,000 രൂപ പിഴയും വിധിച്ച് കോടതി

തിരുവനന്തപുരം: പതിനേഴുകാരിയെ ലൈംഗിക പീഡനത്തിന് ഇരയാക്കിയ കേസിൽ രണ്ടാനച്ഛന് ആറ് വർഷം കഠിനതടവും 30,000 രൂപ പിഴയും വിധിച്ച് കോടതി. കാട്ടാക്കട വിളപ്പിൽശാല ഇഎംഎസ് അക്കാദമിക്ക് സമീപം താമസിക്കുന്ന 39 വയസ്സുള്ള രാജേഷിനെയാണ് അതിവേഗ പോക്സോ കോടതി ശിക്ഷിച്ചത്. പിഴ തുക അതിജീവിതയ്ക്ക് നൽകണം.

പിഴ ഒടുക്കിയിയില്ലെങ്കിൽ അഞ്ച് മാസം അധിക തടവുകൂടി അനുഭവിക്കണം. 2018 ഫെബ്രുവരി 20ന് ആണ് കേസിന് ആസ്പദമായ സംഭവം നടന്നത്. പെൺകുട്ടി ഉറങ്ങുന്ന സമയത്താണ് പ്രതി കുട്ടിയെ ഉപദ്രവിച്ചത്. കുട്ടി അമ്മയോട് ഈ വിവരം അറിയിക്കുകയും തുടർന്ന് ചൈൽഡ് ലൈനിൽ പരാതി നൽകുകയുമായിരുന്നു.

മുൻപും പല തവണ പ്രതി ഇത്തരം കൃത്യം ചെയ്യുന്നതിന് ശ്രമിച്ചിരുന്നതായി അതിജീവിത കോടതിയിൽ മൊഴി നൽകി. അതിവേഗ പോക്സോ കോടതി ജഡ്ജി എസ്. രമേശ് കുമാറാണ് ശിക്ഷ വിധിച്ചത്. പ്രോസിക്യൂഷന് വേണ്ടി സ്പെഷ്യൽ പബ്ളിക് പ്രേസിക്യൂട്ടർ ഡി.ആർ.പ്രമോദ് ഹാജരായി.

പ്രോസിക്യൂഷൻ ഭാഗത്ത് നിന്നും 13 സാക്ഷികളെ വിസ്തരിച്ചു. 10 രേഖകൾ കോടതിയിൽ ഹാജരാക്കി. വിളപ്പിൽശാല സബ് ഇൻസ്പെക്ടർ ആയ കെ.കണ്ണൻ, വി.ഷിബു എന്നിവരാണ് കേസിന്റെ അന്വേഷണം നടത്തി കുറ്റപത്രം സമർപ്പിച്ചത്.