Attukal Pongala 2024: യാ​ഗശാലയാകാനൊരുങ്ങി തലസ്ഥാന ന​ഗരം; പത്തരയോടെ പണ്ടാരയടുപ്പിൽ അ​ഗ്നിപകരും

തിരുവനന്തപുരം: ആറ്റുകാലമ്മയ്ക്ക് ഇന്ന് പൊങ്കാല സമർപ്പണം. കുംഭമാസത്തിലെ പൂരം നാളിലാണ് ഭക്തലക്ഷങ്ങൾ ആറ്റുകാൽ പൊങ്കാല അർപ്പിക്കുന്നത്. ദാരിക വധത്തിന് ശേഷം ഭക്തജനങ്ങളുടെ മുന്നിൽ പ്രത്യക്ഷപ്പെടുന്ന സർവ്വാഭീഷ്ടദായിനിയായ ഭദ്രകാളി ദേവിയെ പൊങ്കാല നിവേദ്യം നൽകി ഭക്തർ സ്വീകരിച്ചുവെന്നാണ് വിശ്വാസം.

പൊങ്കാല നിവേദ്യം സമർപ്പിക്കുന്നതിനായി നിരവധി ഭക്തരാണ് തലസ്ഥാന നഗരിയിൽ എത്തിയിരിക്കുന്നത്. രാവിലെ 10:30 ഓടെ പണ്ടാര അടുപ്പിലേക്ക് അഗ്നിപകരുന്നതോടെ പൊങ്കാല തയ്യാറാക്കാൻ ആരംഭിക്കും. ഉച്ചയ്ക്ക് 2:30നാണ് പൊങ്കാല നിവേദിക്കുന്നത്. പൊങ്കാല അർപ്പിക്കാൻ എത്തുന്നവരെല്ലാം കാപ്പു കെട്ടുന്ന ദിവസം മുതൽ വ്രതാനുഷ്ഠാനങ്ങൾ ആരംഭിക്കണമെന്നാണ് ആചാരം.

ഏഴുദിവസമോ, കുറഞ്ഞത് മൂന്നു ദിവസമോ വ്രതം അനുഷ്ഠിക്കണം. പൊങ്കാല കഴിഞ്ഞ് നിവേദ്യം സമർപ്പിക്കുന്നതുവരെയാണ് വ്രതമെടുക്കേണ്ടത്. വ്രത സമയത്ത് സസ്യാഹാരം മാത്രമേ കഴിക്കാവൂ. ദിവസം ഒരു നേരം മാത്രം അരിയാഹാരം കഴിക്കുക. മറ്റ് നേരങ്ങളിൽ പഴങ്ങളോ ​ഗോതമ്പുകൊണ്ടുള്ള ഭക്ഷണങ്ങളോ കഴിക്കാം.

വ്രത സമയത്ത് ബ്രഹ്മചര്യം പാലിക്കുകയും ദേവീ നാമം ഉരുവിടുകയും വേണം. പൊങ്കാല ദിവസം കോടി വസ്ത്രം ധരിച്ച് ശുദ്ധമായ മനസ്സോടെ പൊങ്കാലയിടണം. പുതിയ വസ്ത്രം സാധിക്കാത്തവർ അലക്കി വൃത്തിയാക്കിയ വസ്ത്രം തന്നെ ധരിക്കണം.

ശരീര ശുദ്ധിയോടൊപ്പം മനശുദ്ധിയും പ്രധാനമാണ്. ചാണകവെള്ളം തളിച്ചോ, പുണ്യാഹം തളിച്ചോ പൊങ്കാല ഇടുന്ന സ്ഥലം ശുദ്ധമാക്കുക. പുതിയ മൂന്ന് ചുടു കട്ട ഉപയോഗിച്ച് അടുപ്പ് തയ്യാറാക്കുക. പൊങ്കാല നിവേദ്യം പുത്തൻ മൺകലത്തിലാണ് തയ്യാറാക്കേണ്ടത്.

ചൂട്ട് , കൊതുമ്പ്, പ്ലാവിന്റെ വിറക് എന്നിവ ഉപയോഗിച്ചാണ് പൊങ്കാല നിവേദ്യം തയ്യാറാക്കേണ്ടത്. പൊങ്കാല തയ്യാറാക്കാൻ ആരംഭിക്കുന്നതിന് മുൻപ് ഗണപതിയെ മനസ്സിൽ ധ്യാനിച്ച് വിളക്ക് കത്തിക്കണം. ഗണപതിക്ക് മലരും അവിലും നിവേദ്യമായി വയ്ക്കാം. ദേവിക്ക് പൊങ്കാല സമർപ്പിച്ച ശേഷം ആ നിവേദ്യം കഴിച്ച് ചടങ്ങുകൾ അവസാനിപ്പിക്കാം.