Navratri 2024: തിന്മയ്ക്ക് മേൽ നന്മയുടെ വിജയം; നവരാത്രിയോട് അനുബന്ധിച്ച് ബൊമ്മക്കൊലു ഒരുക്കി ഭക്തർ

വയനാട്: നവരാത്രി ഉത്സവത്തോടനുബന്ധിച്ച് വയനാട് കൽപ്പറ്റ ശ്രീ അയ്യപ്പ മഹാക്ഷേത്രത്തിൽ കാഴ്ചവിരുന്നൊരുക്കി ബൊമ്മക്കൊലു ഉത്സവം. കൽപ്പറ്റ ബ്രാഹ്മണസഭയിലെ വനിതാ വിഭാഗമാണ് ക്ഷേത്രത്തിൽ ബൊമ്മക്കൊലു തയ്യാറാക്കിയത്. നിരവധി ആളുകളാണ് വര്‍ണാഭമായ കാഴ്‌ച വിസ്‌മയം കാണാന്‍ ഇവിടേക്കെത്തുന്നത്.

തിന്മയ്ക്ക് മേൽ നന്മയുടെ വിജയത്തിൻറെ പ്രതീകം. ബൊമ്മക്കൊലു ഒരുക്കി വിശ്വാസത്തിൻറെ നിറക്കാഴ്ച്ചയൊരുക്കി കൽപ്പറ്റയിലെ ശ്രീ അയ്യപ്പ മഹാക്ഷേത്രം. ദേവിയുടെ വിവിധ ഭാവത്തിലും രൂപത്തിലുമുള്ള നിരവധി ബൊമ്മകളുണ്ട് ബൊമ്മക്കൊലു ഉത്സവത്തിൽ. നവരാത്രിയോടനുബന്ധിച്ച് ഒൻപത് ദിവസവും പ്രത്യേക പൂജകളുണ്ട് ബൊമ്മക്കൊലുവിൽ.

കൽപ്പറ്റ ബ്രാഹ്മണസഭയിലെ വനിതാ വിഭാഗമാണ് ശ്രീ അയ്യപ്പ മഹാക്ഷേത്രത്തിൽ ബൊമ്മക്കൊലു തയ്യാറാക്കിയത്. ദാരിക നിഗ്രഹത്തിനായി ശക്തി വർധിപ്പിക്കുന്നതിന് കാളി തപസനുഷ്‌ഠിക്കുമ്പോൾ ദേവിക്ക് പിന്തുണയർപ്പിക്കാൻ എത്തിയ ദേവഗണങ്ങളെ സൂചിപ്പിക്കുന്നതാണ് ബൊമ്മക്കൊലു.

ആന്ധ്ര, തമിഴ്‌നാട്, കർണാടക എന്നിവിടങ്ങളിലൊക്കെയാണ് ബോമ്മക്കൊലു പ്രാധാന്യമുള്ളതെങ്കിലും തളി ബ്രാഹ്മണ സമൂഹം ഏറെ വർഷങ്ങളായി ബൊമ്മക്കൊലു ഉത്സവം ആചരിക്കുന്നുണ്ട്. 11 മരപ്പലകകളിൽ തീർത്ത പടികളിലാണ് വലുപ്പത്തിനും സ്ഥാനത്തിനും അനുസരിച്ച് ദേവീദേവന്മാരുടെ ബോമ്മകൾ നിരത്തി വയ്ക്കുന്നത്.

അഷ്‌ടലക്ഷ്‌മി, സീതാരാമൻ, നരസിംഹം, വിവിധ ദേവതകൾ, പക്ഷിമൃഗാദികൾ, പൂക്കൾ എന്നിവയാണ് പടികളിൽ വയ്ക്കുന്നത്. നവരാത്രി ദിവസങ്ങളിൽ ഓരോ ദിവസവും പ്രത്യേക പൂജകളും ചടങ്ങുകളുമുണ്ട് ബൊമ്മക്കൊലുവിൽ. ഭക്തിയോടൊപ്പം കണ്ണിന് വർണാഭമായ കാഴ്‌ച വിസ്‌മയം ഒരുക്കുന്ന ബൊമ്മക്കൊലു കാണാൻ നിരവധി പേരാണ് ക്ഷേത്രത്തിൽ എത്തുന്നത്.