Jio Payment Solutions: ഓൺലൈൻ പേയ്മെന്റ് സേവന രം​ഗത്തേക്ക് ജിയോ; ആർബിഐയുടെ പച്ചക്കൊടി

ജിയോ ഫിനാൻഷ്യൽ സർവീസസിന് കീഴിലുള്ള ജിയോ പേയ്മെന്റ് സൊല്യൂഷൻസിന് (ജെപിഎസ്എൽ) ഓൺലൈൻ പേയ്മെന്റ് സേവനത്തിലേക്ക് കടക്കാൻ റിസർവ് ബാങ്കിന്റ അനുമതി ലഭിച്ചു. ഇതോടെ ജിയോ പേയ്മെന്റ് സൊലൂഷ്യൻസിന് യുപിഐ, ക്രെഡിറ്റ്/ഡെബിറ്റ് കാർഡ്, ഇ-വാലറ്റ് തുടങ്ങിയ ഓൺലൈൻ സേവനങ്ങൾ ഉപഭോക്താക്കൾക്ക് നൽകാനാകും.

പേടിഎം, ​ഗൂ​ഗിൾപേ, ഫോൺപേ തുടങ്ങിയവയ്ക്ക് വൻ വെല്ലുവിളിയായാണ് ജിയോ ഓൺലൈൻ പേയ്മെന്റ് രം​ഗത്തേക്ക് പ്രവേശിക്കുന്നത്. ഇന്ന് ജിയോഫിൻ ഓഹരിവിപണിയിൽ 2.87 ശതമാനം നേട്ടത്തോടെ 325.75 രൂപയിലാണ് വ്യാപാരം നടത്തുന്നത്.

റിലയൻസ് ഇൻഡസ്ട്രീസിന്റെ ബാങ്ക് ഇതര സ്ഥാപനമായ ജിയോ ഫിനാൻഷ്യൽ സർവീസസും യുഎസ് രാജ്യാന്തര നിക്ഷേപക സ്ഥാപനമായ ബ്ലാക്ക്റോക്കും ചേർന്ന് രൂപീകരിച്ച രണ്ട് സംരംഭങ്ങൾക്ക് കേന്ദ്ര കോർപ്പറേറ്റ് കാര്യ മന്ത്രാലയത്തിന്റെ അനുമതിയും ലഭിച്ചു.

ജിയോ-ബ്ലാക്ക്റോക്ക് അസറ്റ് മാനേജ്മെന്റ്, ജിയോ ബ്ലാക്ക്റോക്ക് ട്രസ്റ്റി എന്നിവയ്ക്കാണ് കേന്ദ്ര കോർപ്പറേറ്റ് കാര്യ മന്ത്രാലയത്തിന്റെ അനുമതി ലഭിച്ചത്. ഇതോടെ ഇവയ്ക്ക് മൂച്വൽഫണ്ട് സേവന രം​ഗത്തേക്ക് പ്രവേശിക്കാനാകും. മുകേഷ് അംബാനി നയിക്കുന്ന റിലയൻസ് ഇൻഡസ്ട്രീസ് മൂച്വൽഫണ്ട് രം​ഗത്തേക്കും കടക്കുന്നുവെന്നതാണ് ഇതിന്റെ സവിശേഷത.

തുല്യ ഓഹരി പങ്കാളിത്തത്തോടെ സംയുക്ത സംരംഭങ്ങൾ രൂപീകരിക്കാൻ കഴിഞ്ഞ വർഷം ജൂലൈയിലായിരുന്നു ജിയോ ഫിനാൻഷ്യൽ സർവീസസും ബ്ലാക്ക്റോക്കും തീരുമാനിച്ചത്. ഇരു കമ്പനികൾക്കും സെബിയുടെ അനുമതിയും അടുത്തിടെ ലഭിച്ചിരുന്നു.