Murder Case: ഭാര്യയെ തലക്കടിച്ച് കൊലപ്പെടുത്തിയ കേസിൽ പ്രതിക്ക് ജീവപര്യന്തം തടവും ഒരു ലക്ഷം രൂപ പിഴയും

പറവൂര്‍: ഭാര്യയെ കാസ്റ്റ് അയേണ്‍ അടുപ്പുകൊണ്ട് തലക്കടിച്ച് കൊലപ്പെടുത്തിയ കേസില്‍ പ്രതിക്ക് ജീവപര്യന്തം തടവും ഒരു ലക്ഷം രൂപ പിഴയും വിധിച്ച് കോടതി. പറവൂര്‍ രണ്ടാം ക്ലാസ് അഡീഷണല്‍ സെഷന്‍സ് ജഡ്ജി വി. ജ്യോതിയാണ് ഈ വിധി പ്രസ്താവിച്ചത്. 

കൊടകര കാവുംതറ കരയില്‍ കളപുരക്കല്‍ ശിവദാസനെയാണ് ഭാര്യയെ കൊന്നകേസിൽ കോടതി ശിക്ഷിച്ചത്. പിഴ ഒടുക്കാതിരുന്നാല്‍ ആറുമാസം കൂടി തടവ് അനുഭവിക്കണമെന്നാണ് വിധിയിൽ പറയുന്നത്. കേസിനാസ്പദമായ സംഭവം നടന്നത് 2017 നവംബര്‍ 16 നാണ്. കുറുപ്പംപടി പോലീസ് സ്റ്റേഷന്‍ പരിധിയില്‍പെട്ട തുരുത്തികരയില്‍ ഭാര്യവീട്ടിലായിരുന്നു പ്രതിയായ ശിവദാസന്‍ ഭാര്യ ലേഖയ്ക്കും രണ്ട് മക്കള്‍ക്കും ഭാര്യ മാതാവിനുമൊപ്പം താമസിച്ചിരുന്നത്. 

ഇയാള്‍ ഭാര്യയുമായി വഴക്കുണ്ടാക്കുന്നത് പതിവായിരുന്നു. സംഭവ ദിവസം രാവിലെ വീടിന്റെ ഇറയത്ത് ഇരുന്നിരുന്ന ലേഖയെ കാസ്റ്റ് അയേണ്‍ അടുപ്പുകൊണ്ട് ശിവദാസന്‍ തലക്കടിച്ച് കൊലകൊലപ്പെടുത്തുകയായിരുന്നു എന്നാണ് റിപ്പോർട്ട്. കൃത്യം നടത്തിയതിന് ശേഷം ഭാര്യ അപകടത്തില്‍പെട്ടു എന്ന് അയല്‍ക്കാരോട് പറഞ്ഞ ഇയാൾ ഇളയ കുട്ടിയുമായി രക്ഷപ്പെടുകയുമായിരുന്നു. ശേഷം  പോലീസ് പ്രതിയെ തന്ത്രപരമായി കുടുക്കുകയായിരുന്നു. പ്രോസിക്യൂഷന് വേണ്ടി അഡീഷണല്‍ പബ്ലിക് പ്രോസിക്യൂട്ടര്‍ എം.ബി. ഷാജി ഹാജരായിരുന്നു.