Bengaluru Vlogger Murder: ബെം​ഗളൂരു അപാർട്ട്മെന്റ് കൊലപാതകം; പ്രതി പിടിയിൽ, രാത്രിയോടെ ബെം​ഗളൂരുവിലെത്തിക്കും

ബെം​ഗളൂരു: അസം സ്വദേശിയായ വ്‌ളോഗറെ കൊലപ്പെടുത്തിയ കേസിൽ പ്രതി പിടിയിൽ. കണ്ണൂർ സ്വദേശി ആരവിനെയാണ് കർണാടക പൊലീസ് പിടികൂടിയത്. ഇന്ന് രാത്രിയോടെ പ്രതിയെ ബെം​ഗളൂരുവിൽ എത്തിക്കുമെന്നാണ് വിവരം. അസം സ്വദേശി മായ ഗൊഗോയിയെ കൊലപ്പെടുത്തിയ ശേഷം ആരവ് രക്ഷപ്പെടുകയായിരുന്നു. 

കഴിഞ്ഞ ശനിയാഴ്ചയാണ് (നവംബർ 23) യുവതിയും ആരവും ബെംഗളൂരു ഇന്ദിരാ നഗറിലെ അപ്പാര്‍ട്ട്മെന്റില്‍ ചെക്ക് ഇന്‍ ചെയ്തത്. ഞായറാഴ്ച യുവതി കൊല്ലപ്പെട്ടതായാണ് പോലീസ് നിഗമനം. യുവതിയുടെ നെഞ്ചില്‍ ഒന്നിലധികം തവണ കുത്തേറ്റിരുന്നതായാണ് പോലീസ് പറയുന്നത്. ചൊവ്വാഴ്ച പുലര്‍ച്ചെ വരെ ആരവ് അപ്പാര്‍ട്ട്‌മെന്റില്‍ ഉണ്ടായിരുന്നുവെന്നും അതുവരെ മൃതദേഹത്തിനൊപ്പം കഴിഞ്ഞു കൂടിയതായും പോലീസ് സംശയിച്ചിരുന്നു. 

ബെംഗളൂരുവിന് സമീപം കോറമംഗളയിലായിരുന്നു മായ ജോലി ചെയ്തിരുന്നത്. യൂട്യൂബില്‍ ഫാഷന്‍, ഭക്ഷണം എന്നിവയെ കുറിച്ചുള്ള വീഡിയോകളാണ് മായ പങ്കിട്ടിരുന്നത്.

റോയൽ ലിവിംഗ് സർവീസ് അപ്പാർട്ട്‌മെൻ്റിലെ ഒരു മുറിയിൽ നിന്ന് ദുർഗന്ധം വമിക്കുന്നതായി ഇന്ദിരാ നഗർ പോലീസ് സ്റ്റേഷനിൽ പരാതി ലഭിച്ചതിനെ തുടർന്ന് പോലീസ് മുറി സന്ദർശിച്ചപ്പോഴാണ് മായയുടെ മൃതദേഹം കട്ടിലിൽ കിടക്കുന്ന രീതിയിൽ കണ്ടെത്തിയത്. ആരവ് ലീപ് സ്കോളറിൽ സ്റ്റുഡൻ്റ് കൗൺസിലറായി ജോലി ചെയ്യുന്നതിരുന്നു. കൊലപാതകം മുൻകൂട്ടി ആസൂത്രണം ചെയ്തതാണെന്ന നിഗമനവും പൊലീസ് നേരത്തെ പറഞ്ഞിരുന്നു.