Vaikom Theft: അലമാരയിലിരുന്ന 55 പവന്‍ സ്വര്‍ണവും വജ്രവും മോഷണം പോയി; വൻ കവർച്ച

കോട്ടയം: വൈക്കത്ത് വൻ കവർച്ച. വീടിന്റെ അലമാരയിൽ സൂക്ഷിച്ചിരുന്ന ലക്ഷങ്ങൾ വിലവരുന്ന സ്വർണ്ണവും വജ്രവും മോഷണം പോയി. പ്രദേശവാസിയായ പുരുഷോത്തമൻ നായരുടെ വീട്ടിലായിരുന്നു സംഭവം. പോലീസും വിരലടയാള വിദഗ്ധരും സ്ഥലത്തെത്തി പരിശോധന നടത്തി.

തിങ്കളാഴ്ച രാത്രിയാണ് വൻ കവർച്ച നടന്നത്. വീടിന്റെ ഓട് പൊളിച്ച് അകത്തുകടന്ന മോഷ്ടാവ് അലമാരയില്‍ സൂക്ഷിച്ചിരുന്ന 55 പവന്‍ സ്വര്‍ണവും വജ്രവും പണവും മോഷ്ടിച്ചു. പുരുഷോത്തമന്‍ നായരും ഭാര്യ ഹൈമവതിയും മകള്‍ ദേവീ പാര്‍വതിയും സംഭവ സമയം ചേര്‍ത്തലയിലെ സ്വകാര്യ ആശുപത്രിയിലായിരുന്നു. ചൊവ്വാഴ്ച വൈകിട്ട് ഇവർ മടങ്ങിയെത്തിയപ്പോഴായിരുന്നു മോഷണ വിവരം പുറത്തറിയുന്നത്. ഉടൻ തന്നെ പോലീസിൽ വിവരമറിയിക്കുകയായിരുന്നു.

വീടിന്റെ സമീപത്തുണ്ടായിരുന്ന ഏണി ഭിത്തിയില്‍ ചാരിവെച്ച നിലയില്‍ പോലീസ് കണ്ടെത്തി. ഓട് പൊളിച്ച് അകത്തുകടന്ന മോഷ്ടാവ് നാല് മുറിയിലെ സാധനങ്ങള്‍ വാരിവലിച്ചിട്ടിരുന്നു. വീട്ടിലെ അലമാരകളും വാതിലുകളും ഇരുമ്പുപാരയ്ക്ക് കുത്തി തുറന്നായിരുന്നു കവർച്ച. വിരലടയാളവിദഗ്ധർ സ്ഥലത്തെത്തി തെളിവുകൾ ശേഖരിച്ചു. പോലീസ് സമീപ പ്രദേശങ്ങളിലെ സിസിടിവി ക്യാമറകളും പരിശോധിക്കുന്നുണ്ട്.