BJP Councillor speech: എങ്ങനെ കൈകാര്യം ചെയ്യണമെന്നറിയാം; തലശേരിയിലെ ബിജെപി കൗൺസിലറുടെ കൊലവിളി പ്രസംഗം പുറത്ത്
അക്രമം നടത്തുമെന്ന് സൂചന നൽകുന്നതും അക്രമം നടത്താൻ പ്രേരിപ്പിക്കുന്നതുമാണ് ബിജെപി കൗൺസിലറായ ലിജേഷ് നടത്തിയ പ്രസംഗമെന്ന് സിപിഎം ആരോപിക്കുന്നു.
കണ്ണൂർ: തലശേരിയിൽ സിപിഎം പ്രവർത്തകൻ ഹരിദാസിന്റെ കൊലപാതകത്തിന് ഒരാഴ്ച മുൻപ് തലശേരി നഗരസഭയിലെ ബിജെപി കൗൺസിലർ നടത്തിയ കൊലവിളി പ്രസംഗം സമൂഹ മാധ്യമങ്ങളിൽ പ്രചരിക്കുന്നു. സിപിഎം പ്രവർത്തകർക്കെതിരെ അക്രമം നടത്തുമെന്ന് സൂചന നൽകുന്നതും അക്രമം നടത്താൻ പ്രേരിപ്പിക്കുന്നതുമാണ് ബിജെപി കൗൺസിലറായ ലിജേഷ് നടത്തിയ പ്രസംഗമെന്ന് സിപിഎം ആരോപിക്കുന്നു.
പ്രദേശത്ത് ഉത്സവവുമായി ബന്ധപ്പെട്ട് സിപിഎം-ബിജെപി പ്രവർത്തകർ തമ്മിൽ സംഘർഷം ഉണ്ടായിരുന്നു. ഇതിന്റെ തുടർച്ചയായി നടന്ന പരിപാടിയിലാണ് ബിജെപി ഓഫീസിന് മുൻപിൽ നിന്ന് പ്രസംഗിക്കുന്നത്. ഈ പ്രസംഗത്തിന്റെ വീഡിയോ ചൂണ്ടിക്കാട്ടിയാണ് ഹരിദാസിന്റെ കൊലപാതകത്തിൽ ബിജെപി നേതൃത്വത്തിന് പങ്കുണ്ടെന്ന് സിപിഎം ആരോപിക്കുന്നത്.
തങ്ങളുടെ പ്രവർത്തകരുടെ മെൽ കൈവച്ചവരെ എങ്ങനെയാണ് കൈകാര്യം ചെയ്യേണ്ടതെന്ന് അറിയാമെന്ന് ലിജേഷ് പ്രസംഗത്തിൽ പറയുന്നു. ഏത് രീതിയിലാണ് കൈകാര്യം ചെയ്യുകയെന്ന് കഴിഞ്ഞ കാലത്തെ ചരിത്രം പരിശോധിച്ചാൽ സിപിഎം നേതാക്കൾക്ക് മനസ്സിലാകുമെന്നും ഇയാൾ വീഡിയോയിൽ പറയുന്നു. ലിജേഷാണ് കൊലപാതകം ആസൂത്രണം ചെയ്തതെന്ന് സിപിഎം കണ്ണൂർ ജില്ലാ സെക്രട്ടറി എംവി ജയരാജൻ ആരോപിച്ചു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...