Murder News മാല മോഷ്ടിക്കാനുള്ള ശ്രമം തടുക്കുന്നതിനിടെ ബിജെപി നേതാവിനെ വെടിവെച്ചു കൊന്നു

പട്‌ന: മാല പൊട്ടിക്കാനുള്ള ശ്രമം തടുക്കുന്നതിനിടെ ബിജെപി നേതാവിനെ മോഷ്ടാക്കള്‍ വെടിവെച്ചു കൊന്നു.  കൊല്ലപ്പെട്ടത് മുന്ന ശര്‍മ്മ എന്നറിയപ്പെടുന്ന ശ്യാം സുന്ദര്‍ മനോജാണ്. 

സംഭവം നടന്നത് ഇന്ന് രാവിലെ ആറു മണിയോടെ ബിഹാറിലെ പട്‌നയിലാണ്. ഉടൻതന്നെ ആശുപത്രിയില്‍ എത്തിച്ചെങ്കിലും നേതാവിന്റെ ജീവന്‍ രക്ഷിക്കാനായില്ല.  മോഷ്ടാക്കൾ മോട്ടോര്‍ സൈക്കിളിലായിരുന്നു എത്തിയത്. ഇവര്‍ അടുത്തേക്ക് വരുമ്പോള്‍ മുന്ന ശര്‍മ്മ ആരോടോ ഫോണില്‍ സംസാരിക്കുന്നത് സിസിടിവി ദൃശ്യങ്ങളിലൂടെ കാണാണ് സാധിക്കും. 

ഇതിനിടയിലാണ് ബൈക്കിലിരുന്നുകൊണ്ട് മോഷ്ടാക്കള്‍ മുന്ന ശര്‍മ്മയുടെ കഴുത്തിലെ മാല പൊട്ടിക്കാന്‍ ശ്രമിക്കുന്നത്.  ഒപ്പം മൊബൈല്‍ ഫോണും തട്ടിപ്പറിച്ചു. ഇത് ചെറുത്തതിനെ തുടര്‍ന്ന് മുന്ന ശര്‍മ്മയുടെ തലയിലേക്ക് അക്രമികൾ  വെടി ഉതിര്‍ക്കുകയായിരുന്നു.

മോഷണമാണോ ആക്രമികളുടെ ലക്ഷ്യം എന്നതിൽ  നിലവിൽ വ്യക്തതയില്ല. മാല പൊട്ടിക്കാന്‍ ശ്രമിച്ചെങ്കിലും മാല അവർക്ക് കിട്ടിയില്ല. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.