കൊച്ചിയിൽ 2 വയസുകാരിക്ക് ക്രൂരമർദനം; അമ്മയ്ക്കെതിരെ കേസെടുത്തു

കൊച്ചി : രണ്ടാനച്ഛന്റെ ക്രൂരമർദനത്തിന് രണ്ട് വയസുകാരി ഇരയായ സംഭവത്തിൽ അമ്മയ്ക്കെതിരെ കേസെടുത്തു. ഗുരുതരാവസ്ഥയിലായ കുട്ടിയ്ക്ക് ചികിത്സ വൈകിപ്പിച്ചതിന് ബാലനീതി നിയമപ്രകാരമാണ് കേസെടുത്തിരിക്കുന്നത്. 

സംരക്ഷണം നൽകേണ്ടയാൾ വീഴ്ചവരുത്തിയതായി കണ്ടെത്തിയെന്ന് പോലീസ് അറിയിച്ചു. ആരോഗ്യ നില ഗുരുതരമായ കുട്ടിക്ക് വെന്റിലേറ്റർ സഹായത്തിൽ ചികിത്സ നൽകുന്നത്.

തൃക്കാക്കര സ്വദേശികളുടെ കുഞ്ഞിനാണ് തലയ്ക്കും മുഖത്തും പരുക്കേറ്റത്. രണ്ടാനച്ഛന്റെ മർദ്ദനമാണെന്നാണ് പോലീസ് പറഞ്ഞു. അമ്മയുടെയും മുത്തശ്ശിയുടെയും മൊഴികളിൽ വൈരുധ്യം കണ്ടെത്തിയതിനെ തുടർന്നാണ് ഡോക്ടർമാർ പോലീസിനെ അറിയിച്ചത്. കളിക്കിടെ വീണെന്നാണ് ആദ്യം നൽകിയ മൊഴി. 

തലയോട്ടിക്ക് വരെ പൊട്ടലുണ്ടായിട്ടുണ്ടെന്നാണ് ഡോക്ടർമാർ പറയുന്നത്. കൈ രണ്ട് ഒടിഞ്ഞ നിലയിലാണ്. പൊള്ളലേറ്റ പാടുകളുമുണ്ട്. നിരന്തരമായി പരിക്കുകളേറ്റ് പാടുകൾ കുട്ടിയുടെ ശരീരത്തിലുണ്ടെന്ന് ഡോക്ടർമാർ പറഞ്ഞു. എന്നാൽ കുട്ടി സ്വയം വരുത്തിയ പരിക്കാണെന്നാണ് അമ്മ ഡോക്ടർമാരോട് പറഞ്ഞത്.

പരുക്കിനെ സംബന്ധിച്ചുള്ള ദുരൂഹതയിൽ തൃക്കാക്കര പോലീസ് കേസെടുത്ത് അന്വേഷണമാരംഭിച്ചു. രണ്ടാനച്ഛൻ ഒളിവിലാണെന്നാണ് പോലീസ് അറിയിക്കുന്നത്.