Drugs Seized: 2500 കോടിയുടെ മയക്കുമരുന്ന്: രാജ്യത്ത് വൻ ലഹരി വേട്ട

ന്യൂഡൽഹി: ഡൽഹിയിലും പൂനേയിലുമായി വൻ ലഹരി വേട്ട. 2500 കോടി രൂപയുടെ മയക്കുമരുന്ന് പിടികൂടി. 1100 കിലോ​ഗ്രാം സിന്തറ്റിക് ഉത്തേജക മരുന്നായ മെഫെഡ്രോൺ ആണ് പിടിച്ചെടുത്തത്. രണ്ടു ദിവസങ്ങളിലായി നടന്ന പോലീസ് പരിശോധനയിൽ ലഹരി കടത്തുമായി ബന്ധപ്പെട്ട് 5 പേരെ അറസ്റ്റ് ചെയ്തിട്ടുണ്ട്. പിടിയിലായവരിൽ മൂന്ന് പേർ കൊറിയർ ജീവനക്കാരാണ്. ചോദ്യം ചെയ്യലിൽ നിന്നും പുനെയിലെ ലഹരി മാഫിയാ തലവൻ ലളിത് പാട്ടീലിന് കേസുമായുള്ള ബന്ധവും അന്വേഷിക്കുന്നുണ്ട്.

ലഹരി വിൽപ്പന നടത്തിയത് പൂനെയിലെ സംഭരണശാലകളിൽ നിന്നും ഡൽഹിയിലെ ഗോഡൗണുകളിൽ എത്തിച്ചായിരുന്നുവെന്ന് വ്യക്തമായിട്ടുണ്ട്. ഇതിനുമുമ്പേ 700 കിലോ​ഗ്രാം മെഫെഡ്രോൺ പൂനെയിൽ‍ നിന്നും പിടിച്ചെടുത്തിരുന്നു. ഇതോടൊപ്പം മൂന്ന് മയക്കുമരുന്ന് കടത്തുകാരും പിടിയിലായിരുന്നു. ഇവരിൽ നിന്നും ശേഖരിച്ച വിവരത്തിന്റെ അടിസ്ഥാനത്തിലാണ് പോലീസ് ഓപ്പറേഷൻ ആരംഭിച്ചത്. ഡൽഹിയിലുള്ള ഹൗസ് ഖാസ് പ്രദേശത്തുള്ള ​ഗോഡൗണുകൾ കേന്ദ്രീകരിച്ചായിരുന്നു പരിശോധന. 400 കിലോ​ഗ്രാം സിന്തറ്റിക്ക് ഉത്തേജക വസ്തുവും റെയ്ഡിൽ പിടിച്ചെടുത്തിട്ടുണ്ട്. 

പ്രായപൂർത്തിയാകാത്ത പെൺകുട്ടിയെ തട്ടി കൊണ്ട് പോയി; പ്രതി അറസ്റ്റിൽ

തിരുവനന്തപുരം: പ്രായപൂർത്തിയാകാത്ത പെൺകുട്ടിയെ തെറ്റിദ്ധരിപ്പിച്ച് തട്ടി കൊണ്ട് പോയ കേസിലെ പ്രതിയെ നെടുമങ്ങാട് പോലീസ് അറസ്റ്റ് ചെയ്തു. ഇയാൾക്കെതിരെ പോക്സോ നിയമ പ്രകാരം നെടുമങ്ങാട് പോലീസ് കേസെടുത്തു. കരിപ്പൂർ വാണ്ടയിൽ കുന്നുംമുകൽ വീട്ടിൽ ശ്രീജിത്തി(25)നെയാണ് പോലീസ് പിടികൂടിയത്. ഇയാൾ റൗഡി ലിസ്റ്റിൽ പെട്ട ആളാണ് എന്ന് നെടുമങ്ങാട് പോലീസ് പറഞ്ഞു.

ഫെബ്രുവരി12-ന് രാത്രി ആണ് പ്രായപൂർത്തിയാകാത്ത പെൺകുട്ടിയെ കാണാതാകുന്നത്. പരാതിയുടെ അടിസ്ഥാനത്തിൽ നടത്തിയ അന്വേഷണത്തിൽ ഒളിവിൽ കഴിഞ്ഞ പ്രതിയെ നെടുമങ്ങാട് ഡൈമൻ പാലത്തിനു സമീപമുള്ള ഒരു വീട്ടിൽ വച്ച് കണ്ടെത്തുകയായിരുന്നു. നെടുമങ്ങാട് ഡിവൈഎസ്പിയുടെ നേത്യത്വത്തിൽ നെടുമങ്ങാട് സിഐ യും സംഘവും ചേർന്നാണ് പ്രതിയെ അറസ്റ്റ് ചെയ്തത്. ഇയാളുടെ മറ്റ് കേസുകളെ പറ്റി പോലീസ് അന്വേഷിച്ച് വരികയാണ്.