Cyber Crime: സോഷ്യൽ മീഡിയയിൽ ചാറ്റിങ്, ടാസ്‌ക് പൂർത്തിയാക്കിയാൽ പണം തരാമെന്ന് വാ​ഗ്ദാനം; യുവതിക്ക് നഷ്ടമായത് 29 ലക്ഷം രൂപ, അറസ്റ്റ്

കോഴിക്കോട്: സോഷ്യൽ മീഡിയ വഴി ചാറ്റ് ചെയ്ത് സാമ്പത്തിക തട്ടിപ്പ് നടത്തിയ കേസിൽ യുവാവ് അറസ്റ്റിൽ. കോഴിക്കോട് മുക്കം സ്വദേശി ജിഷ്ണുവാണ് അറസ്റ്റിലായത്. 29 ലക്ഷം രൂപ തട്ടിയെടുത്തതായി യുവതി നൽകിയ പരാതിയിലാണ് ചേവായൂർ പോലീസ് ജിഷ്ണുവിനെ അറസ്റ്റ് ചെയ്തത്. ഇൻസ്റ്റ​ഗ്രാം, ടെല​ഗ്രാം എന്നീ സോഷ്യൽ മീഡിയ പ്ലാറ്റ്ഫോമുകൾ വഴി ലിങ്ക് നൽകി ടാസ്ക് പൂർത്തിയാക്കിയാൽ പണം നൽകാമെന്ന് പറഞ്ഞാണ് തട്ടിപ്പ് നടത്തുന്നത്.

വിവിധ ബാങ്ക് അക്കൗണ്ടുകൾ നൽകി പണം അയപ്പിക്കും. ടാസ്കുകൾ പൂർത്തിയാക്കിയാൽ കൂടുതൽ പണം നൽകാമെന്ന് വാ​ഗ്ദാനം നൽകിയാണ് ആളുകളിൽ നിന്ന് പണം വാങ്ങുന്നത്. വിവിധ അക്കൗണ്ടുകൾ നൽകി കൈക്കലാക്കുന്ന പണം മറ്റ് അക്കൗണ്ടുകളിലേക്ക് മാറ്റിയും എടിഎം വഴി പിൻവലിച്ചുമാണ് തട്ടിപ്പ് നടത്തുന്നത്.

സംസ്ഥാനത്ത് ടെല​ഗ്രാം വഴിയുള്ള സാമ്പത്തിക തട്ടിപ്പ് വർധിക്കുന്നതായും ജാ​ഗ്രത പാലിക്കണമെന്നും കേരള പോലീസ് മുന്നറിയിപ്പ് നൽകിയിരുന്നു. സാമ്പത്തിക ലാഭം വാ​ഗ്ദാനം ചെയ്താണ് തട്ടിപ്പുകൾ നടത്തുന്നത്. ടെല​ഗ്രാം ആണ് ഇപ്പോൾ സാമ്പത്തിക തട്ടിപ്പിനായി കൂടുതൽ ഉപയോ​ഗിക്കുന്നത്.

സമൂഹമാധ്യമങ്ങളിലൂടെ പരിചയപ്പെട്ട് ആളുകളെ ടെല​ഗ്രാം ​ഗ്രൂപ്പിൽ ചേരാൻ പ്രേരിപ്പിക്കുന്നു. ഇത്തരം ​ഗ്രൂപ്പുകളിൽ വൻ തോതിൽ പണം ലഭിച്ചവർ ഇക്കാര്യങ്ങൾ പറയും. പണം ലഭിച്ചെന്ന് തെളിയിക്കാൻ സ്ക്രീൻഷോട്ടുകളും ​ഗ്രൂപ്പിൽ പങ്കുവയ്ക്കും. എന്നാൽ, ആ ​ഗ്രൂപ്പിൽ ഉള്ളവരെല്ലാം തട്ടിപ്പ് സംഘത്തിന്റെ ആളുകളായിരിക്കും.

ഓൺലൈനിലൂടെ സാമ്പത്തിക തട്ടിപ്പിന് ഇരയായെന്ന് വ്യക്തമായാൽ ഒരു മണിക്കൂറിനകം തന്നെ 1930 എന്ന നമ്പറിൽ സൈബർ പോലീസിനെ വിവരം അറിയിക്കണമെന്ന് കേരള പോലീസ് പങ്കുവച്ച കുറിപ്പിൽ വ്യക്തമാക്കുന്നു. എത്രയും വേ​ഗം പോലീസിൽ റിപ്പോർട്ട് ചെയ്താൽ തട്ടിപ്പിന് ഇരയായ വ്യക്തിക്ക് നഷ്ടപ്പെട്ട തുക തിരിച്ച് ലഭിക്കാനുള്ള സാധ്യത കൂടുതലാണെന്നും പോലീസ് പറയുന്നു.