Neyyattinkara Adithyan Murder : നെയ്യാറ്റിൻകരയിൽ യുവാവിനെ വെട്ടിക്കൊലപ്പെടുത്തിയ കേസിൽ 4 പേർ പോലീസ് പിടിയിൽ

തിരുവനന്തപുരം : നെയ്യാറ്റിൻകര കുടങ്ങാവിളയിൽ യുവാവിനെ വെട്ടിക്കൊലപ്പെടുത്തിയ സംഭവത്തൽ നാല് പേർ പോലീസ് പിടിയിൽ. ഇന്നലെ മാർച്ച് 27-ാം തീയതി രാത്രിയിൽ ഊരുട്ടുകാലയിൽ 23 കാരനായ ആദിത്യനെ വെട്ടിക്കൊലപ്പെടുത്തി സംഭവത്തിൽ വെൺപകൽ സ്വദേശിയായ ജിബിൻ, കണ്ണറവിള സ്വദേശി മനോജ്, ചപ്പാത്ത് സ്വദേശി അഭിജിത്ത്, കഴുവൂർ സ്വദേശി രജിത്ത് എന്നിവരെയാണ് നെയ്യാറ്റിൻകര പോലീസ് പിടികൂടിയത്.

പിടിയിലായ നാല് പേരും മുൻപ് ആദിത്യൻ ജോലി നോക്കിയിരുന്ന പർപ്പടക കമ്പനിയിൽലെ ജീവനക്കാരും സുഹൃത്തുക്കളും ആയിരുന്നു. ആദിത്യന്റെ ബൈക്ക് ഭാസ്കർ നഗറിലെ ഒരു സ്വകാര്യവ്യക്തിക്ക് പണയപ്പെടുത്തിയിരുന്നു. ഇതിന് ലഭിക്കേണ്ട തുകയെ ചൊല്ലിയുള്ള തർക്കങ്ങളാണ് വാക്കുതർക്കത്തിലേക്കും പിന്നീട് കൊലപാതകത്തിലും കലാശിച്ചത്.

ഇന്നലെ രാത്രി കുടങ്ങാവിളക്ക് സമീപം കാറിൽ എത്തിയ സംഘം ആദിത്യനെ ചർച്ചയ്ക്ക് വേണ്ടിയായിരുന്നു വിളിച്ചുവരുത്തുകയായിരുന്നു. ബൈക്കിൽ എത്തിയ ആദിത്യനെ കാറിലെത്തിയ സംഘം വെട്ടിയതിന് ശേഷം കടന്നുകളയുകയായിരുന്നു. വെട്ടേറ്റ ആദിത്യൻ സംഭവ സ്ഥലത്ത് വെച്ച് തന്നെ മരിച്ചു. 

അക്രമികൾ സഞ്ചരിച്ച് കാറിനെ കേന്ദ്രീകരിച്ചുള്ള അന്വേഷണത്തിലാണ് പോലീസ് പ്രതികളെ പിടികൂടിയത്. കാർ വാടകയ്ക്കെടുത്താണ് പ്രതികളെ കൃത്യം നടത്തിയത്. കാർ നെയ്യാറ്റിൻകര ഓല സ്വദേശി അച്ചുവിൻറെ ഉടമസ്ഥതയിൽ ഉള്ളതാണെന്ന് പോലീസ് മനസ്സിലാക്കി. ഇത് അന്വേഷിച്ച് പോലീസ് അച്ചുവിന്റെ വീട്ടിലെത്തി അന്വേഷിച്ചിരുന്നു. ഇതിന്റെ മനോവിഷമത്തിൽ അച്ചുവിന്റെ പിതാവ് സുരേഷ് ആത്മഹത്യ ചെയ്തു. വീട്ടിൽ പോലീസ് എത്തിയതിനെത്തുടർന്നുള്ള മനോവിഷമത്തിൽ ആയിരുന്നു ആത്മഹത്യ എന്നാണ് ബന്ധുക്കൾ  പറയുന്നത്. 

ആദിത്യന്റെ മരണത്തിൽ നേരിട്ട് പങ്കുള്ള മറ്റുള്ളവർക്ക് വേണ്ടിയുള്ള തിരച്ചിലും പോലീസ് തുടർന്നുവരുന്നു. തിരുവനന്തപുരം മെഡിക്കൽ കോളേജിൽ പോസ്റ്റ്മോർട്ടത്തിനുശേഷം ആദിത്യന്റെ മൃതദേഹം ബന്ധങ്ങൾക്ക് വിട്ടുനൽകി. അമരവിള കേന്ദ്രീകരിച്ച് പ്രവർത്തിക്കുന്ന മൈക്രോ ഫിനാൻസ് സ്ഥാപനത്തിലെ ജീവനക്കാരനായിരുന്നു ആദിത്യൻ.