Crime News: ചെങ്കോട്ടുകോണത്ത് യുവാവ് പെട്രോൾ ഒഴിച്ച് കത്തിച്ച സ്ത്രീ മരിച്ചു

തിരുവനന്തപുരം: ചേങ്കോട്ടുകോണത്ത് യുവാവ് പെട്രോളൊഴിച്ച് കത്തിച്ച സ്ത്രീ മരിച്ചു ചേങ്കോട്ടുകോണം സ്വദേശിനിയായ ജി സരിതയാണ് മരിച്ചത്. സംഭവം നടന്നത് ഇന്നലെ രാത്രി 8 മണിയോടെയായിരുന്നു.   പൗഡിക്കോണം ചെല്ലമംഗലം സ്വദേശിയായ ബിനു ആണ് സരിതയെ തീ കൊളുത്തിയത്. ബിനുവിൻ്റെ മക്കൾ പഠിക്കുന്ന സ്കൂളിലെ ജീവനക്കാരിയാണ് മരിച്ച സരിത.

പൊള്ളലേറ്റ ബിനുവും ആശുപത്രിയിൽ ചികിത്സയിലാണ്. ചേങ്കോട്ടുകോണം മേലെ കുണ്ടയത്ത് താമസിക്കുന്ന സരിതയുടെ വീട്ടിൽ ഇന്നലെ രാത്രി എട്ടുമണിയോടെ എത്തിയ ബിനു വാക്കുതർക്കത്തിനിടെ കൈയിൽ കരുതിയിരുന്ന പെട്രോൾ സരിതയുടെ ദേഹത്ത് ഒഴിച്ചു കത്തിക്കുകയായിരുന്നു. ഇയാൾ സരിതയുടെ വീട്ടിലെത്തിയപ്പോൾ കയ്യിൽ ഒരു കന്നാസിൽ 5 ലിറ്റർ പെട്രോളുമുണ്ടായിരുന്നു. തീ പടർന്നു പിടിച്ചപ്പോൾ ഇയാളുടെ ദേഹത്തും പൊള്ളലേറ്റു.  

തീ ദേഹത്തേക്ക് പടർന്നതോടെ ബിനു വീട്ടിനു പിന്നിലെ കിണറ്റിലേക്ക് എടുത്തു ചാടി.   യുവതിയുടെ മകളുടെ നിലവിളി കേട്ട് എത്തിയ നാട്ടുകാരാണ് യുവതിയെ മെഡിക്കൽ കോളേജിലെത്തിച്ചിരുന്നു. കഴക്കൂട്ടത്തു നിന്നെത്തിയ അഗ്നിശമന സേനാംഗങ്ങൾ കിണറ്റിലിറങ്ങിയാണ് ബിനുവിനെ രക്ഷിച്ചത്. ബിനുവിന്റെ സ്കൂട്ടറിൽ നിന്നും വെട്ടുകത്തിയും മുളകുപൊടിയും പോലീസ് കണ്ടെടുത്തിരുന്നു. മരിച്ച സരിതയും ബിനുവും തമ്മിൽ ദീർഘനാളത്തെ പരിചയമുണ്ട്.  വിവാഹിതനും രണ്ട് കുട്ടികളുടെ പിതാവുമായ ബിനു എ.സി മെക്കാനിക്കാണെന്നാണ് റിപ്പോർട്ട്. സ്വകാര്യ സ്‌കൂൾ ബസിലെ ആയയായി ജോലി ചെയ്യുകയാണ് സരിത. സരിതയ്ക്ക് ഡിഗ്രിക്ക് പഠിക്കുന്ന മകളുണ്ട്. പ്രതിയുടെ രണ്ടു മക്കളും സരിത ജോലി ചെയ്യുന്ന സ്‌കൂളിലാണ് പഠിക്കുന്നത്. സരിതയുടെ ഭർത്താവ് 10 വർഷം മുൻപ് മരിച്ചു. 

എന്നാൽ സരിതയുടെ ടൂ വീലറിൽ പെട്രോൾ തീർന്നതിനാൽ തന്നോട് അഞ്ചു ലിറ്റർ പെട്രോൾ വാങ്ങി വരാൻ ആവശ്യപ്പെടുകയായിരുന്നെന്ന് ആശുപത്രിയിലേക്ക് കൊണ്ടുപോകുന്നതിനിടെ ബിനു പൊലീസിനോട് പറഞ്ഞു. പെട്രോളുമായി എത്തിയപ്പോൾ സരിത അതുവാങ്ങി സ്വന്തം ശരീരത്തിലും തന്റെ ശരീരത്തിലും ഒഴിച്ച് തീകത്തിക്കുകയായിരുന്നെന്നും ബിനു പോലീസിനോട് പറഞ്ഞു. കഴക്കൂട്ടം പൊലീസ് കേസെടുത്ത് അന്വേഷണമാരംഭിച്ചു.