Youth Killed In Thiruvananthapuram: തിരുവനന്തപുരത്ത് യുവാവിനെ വെട്ടിക്കൊലപ്പെടുത്തി

തിരുവനന്തപുരം: നെയ്യാറ്റിൻകര കുടങ്ങാവിളയിൽ യുവാവിനെ വെട്ടിക്കൊലപ്പെടുത്തി.  നെയ്യാറ്റിൻകര ഊരുട്ടുകാലയിൽ ഷണ്മുഖൻ ആശാരി രാജലക്ഷ്മി ദമ്പതികളുടെ മകൻ ആദിത്യനെയാണ് ഒരു സംഘം വെട്ടിക്കൊലപ്പെടുത്തിയത്. 

ഇന്നലെ രാത്രി 8 മണിയോടുകൂടിയായിരുന്നു സംഭവം. നെയ്യാറ്റിൻകര കുടങ്ങാവിളക്ക് സമീപത്ത് വച്ചായിരുന്നു ആക്രമണം നടന്നത്. കാറിൽ എത്തിയ സംഘം
ആദ്യത്തിനെ വെട്ടിയശേഷം കാർ ഉപേക്ഷിച്ച് കടന്നുകളയുകയായിരുന്നു എന്നാണ് റിപ്പോർട്ട്. വെട്ടേറ്റ ആദിത്യൻ സംഭവസ്ഥലത്ത് വെച്ചുതന്നെ മരിക്കുകയായിരുന്നു എന്നാണ് പോലീസ് പറയുന്നത്.

ആദിത്യന്റെ ബൈക്ക് ഭാസ്കർ നഗറിൽ പണയപ്പെടുത്തിയിരുന്നു. ഇത് സംബന്ധിച്ച സാമ്പത്തിക ഇടപാടും അതിനെ ചൊല്ലിയുള്ള തർക്കവുമാണ് ആക്രമണത്തിൽ കലാശിച്ചതെന്നാണ് പ്രാഥമിക നിഗമനം. ഊരുട്ടുകാല സ്വദേശിയായ ആദിത്യൻ അമരവിളയിലെ മൈക്രോ ഫിനാൻസ് കളക്ഷൻ ഏജന്‍റാണ്. നെല്ലിമൂടുള്ള സ്ഥലത്ത് പണം പിരിക്കാൻ പോയ സമയത്ത് കഴിഞ്ഞ ദിവസം തർക്കമുണ്ടായിരുന്നു. ഈ തർക്കമാണ് കൊലപാതകത്തിൽ കലാശിച്ചതെന്നാണ് പോലീസ് പറയുന്നത്. 

നെല്ലിമൂടുള്ള സംഘമാണ് കൊലപാതകത്തിന് പിന്നിലെന്നാണ് പ്രാഥമിക വിവരമെന്നും കൂടുതല്‍ കാര്യങ്ങള്‍ അന്വേഷിച്ചു വരികയാണെന്നും പോലീസ് അറിയിച്ചു.  അക്രമിസംഘം എത്തിയ കാർ കേന്ദ്രീകരിച്ച് നെയ്യാറ്റിൻകര പോലീസ് അന്വേഷണം ആരംഭിച്ചിട്ടുണ്ട്. ആദിത്യന്റെ മൃതദേഹം നെയ്യാറ്റിൻകര ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.